U Rwanda na Denmark byemeje ubufatanye burimo kwita ku bimukira  

  • NTAWITONDA JEAN CLAUDE
  • Nzeri 9, 2022
  • Hashize imyaka 2
Image

Leta y’u Rwanda n’iya Denamark byiyemeje kongera imbaraga mu biganiro n’ubufatanye mu nzego zitandukanye uhereye ku bijyanye no guhangana n’imihindagurikire y’ikirere no kurengera ibidukikije, imiyoborere myiza, ishyirwa mu bikorwa rya Politiki zijyanye n’impunzi n’abasaba ubuhungiro nk’uko bikubiye mu masezerano yashyizweho umukono muri Kamena 2021.

Leta ya Denmark yiyemeje gufungura ibiro mu Mujyi wa Kigali bikazayoborwa n’Abadipolomate babiri, mu kurushaho gushyigikira no gukurikirana iterambere ry’umubano ukomeje kwaguka hagati y’ibihugu byombi.

Kuri ubu hatangiye kurebwa ku ngingo zinyuranye zo gushimangira ubufatanye hagati y’ibihugu byombi, bw’uko impunzi n’abasaba ubuhungiro binjira muri Denmark mu buryo butunguranye bazajya boherezwa mu Rwanda kugira ngo ubusabe bwabo bubanze busuzumwe banacungiwe umutekano.

Bitegayijwe ko n’abazagera mu Rwanda bakahakunda bazaba bafite uburenganzira bwo kuhatura bakoroherezwa kugera ku mahirwe y’imibereho nk’ay’abandi baturage b’Igihugu.

Amasezerano ibihugu byombi bifitanye azatangira kubahirizwa byuzuye mu gihe ibihugu byombi bizaba byujuje ibisabwa biteganywa n’Umuryango Mpuzamahanga, birimo ibirebana n’uburenganzira bw’impunzi ndetse n’umutekano wabo.

Minisiteri y’Ububanyi n’Amahanga n’Ubutwererane y’u Rwanda yemeje ko ibiganiro ku birebana no kuzuza ibisabwa byose bikomeje, kandi impande zombi ziyemeje gukomeza kureba amahirwe yose ashoboka yafasha kuzuza ibikubiye muri ayo masezerano.

Impande zombi zigaragaza ko ubu bufatanye bushingiye ku kuba Politiki na gahunda bigenga abimukira n’abasaba ubuhungiro byarangiritse cyangwa bidakora, ari na yo mpamvu hakenewe umuvuno mushya mu gushaka igisubizo kirambye gihangira amahirwe y’ubuzima bwiyubashye abahunga ibihugu byabo berekeza I Burayi, akenshi usanga biganjemo Abanyafurika.

Abimukira n’abasaba ubuhungiro bafite ubushobozi ni bo usanga bifashisha abacuruza abantu kugira ngo babashe kunyura mu nzira zitemewe bimukira mu bindi bihugu, mu gihe abanyantege nke ari na bo bakeneye ubufasha kurusha abandi usanga Babura uko bava mu bihugu byabo cyangwa bagahera mu nzira rwagati.

Itangazo ryashyizwe hanze n’ibihugu byombi, rigaragaza ko “Ingendo zitemewe zikorwa n’ababatwara na zo zigira ingaruka ku mutekano w’ibihugu bikikije inzira z’abimukira kandi bikaba bishobora guhungabanya icyizere abaturage bafite muri gahunda mpuzamahanga yo kurengera impunzi.”

Ni muri urwo rwego hakenewe gukemura ikibazo haherewe ku mpamvu shingiro zitera ubwimukira butemewe mu bihugu baturukamo ndetse n’ibyo banyuramo, harimo no kureba ku busumbane buri mu bijyanye no kubona amahirwe y’imirimo no kubaka ubushobozi hagati y’Afurika n’u Burayi.

U Rwanda na Denmark byiyemeje gufatanya mu kubyumvisha abafatanyabikorwa barimo Ishami ry’Umuryango e’Abibumbye ryita ku Mpunzi (UNHCR), Umuryango Mpuzamahanga uharanira uburenganzira bw’Abimukira, Umuryango w’Afurika Yunze ubumwe ndetse na Komisiyo y’Umuryango w’Ubumwe b’u Burayi (EU Commission).

Impande zombi ziyemeje kwegera aba bafatanyabikorwa kugira ngo batangize ibiganiro mpuzamahanga bigamije kungurana ibitekerezo kuri iyi gahunda ikiri nshya ibonwamo amahirwe akomeye yo gukemura ibibazo by’abimukira n’abasaba ubuhungiro.

  • NTAWITONDA JEAN CLAUDE
  • Nzeri 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE