U Rwanda na Costa Rica byasinyanye amasezerano y’ubwikorezi bwo mu kirere

U Rwanda na Costa Rica byashyize umukono ku masezerano y’ubwikorezi bwo mu kirere, hashingiwe ku masezerano y’imikoranire ibihugu byombi byasinye mu 2023.

Ku ruhande rw’u Rwanda ayo masezerano yashyizweho umukono na Ambasaderi w’u Rwanda muri Canada na Repubulika ya Dominika, Higiro Prosper mu gihe ku ruhande rwa Costa Rica yasinywe  n’Umuyobozi Mukuru w’Ikigo gishinzwe Ubwikorezi bwo mu Kirere muri Costa Rica, Marcos Castillo Masis.

Ayo masezerano akaba afunguye amarembo agamije guhuza no guteza imbere ingendo z’indege hagati y’ibihugu byombi no kwagura amahirwe aboneka mu bukerarugendo, ubucuruzi n’ishoramari hagati y’impande zombi.

Akaba asinywe nyuma y’inama ya ICAN 2025 igamije guteza imbere no koroshya ubwikorezi bwo mu kirere mu buryo burambye.

U Rwanda na Costa Rica bifitanye umubano mu bya dipolomasi watangiye mu 2001, ndetse impande zombi zifite ubushake mu kwagura imikoranire mu bikorwa bitandukanye birimo iby’ubukungu n’ishoramari.