U Buhinde bwifurije u Rwanda Isabukuru nziza yo Kwibohora 29

  • NTAWITONDA JEAN CLAUDE
  • Nyakanga 4, 2023
  • Hashize amezi 11
Image

U Buhinde ni kimwe mu bihugu bikomeje kwifatanya n’u Rwanda kwizihiza Isabukuru ya 29 yo Kwibohora, aho Abanyarwanda bishimira uko Igihugu cyabo cyongeye kubona ubuzima nyuma y’uko Ingabo za RPA zihagaritse Jenoside yakorewe Abatutsi mu 1994, zigatangiza urugendo rw’iterambere rishingiye ku bumwe n’ubwiyunge.

Abanyarwanda nanone kandi bizihirwa kuri uyu munsi bishimira ndetse baha agaciro umutekano babonye, icyubahiro n’agaciro basubijwe n’icyizere cyo kubaho cyagarutse, ubu kikaba cyariyongereye kikagera ku mpuzandengo y’imyaka ikabakaba 70  ku burame.

Mu butumwa yanyujije ku mbuga nkoranyambaga, Minisitiri w’Ububanyi n’Amahanga akaba n’umwe mu bagize Inteko Ishinga Amategeko y’u Buhinde Dr. Subrahmanyam Jaishankar, yifurije abagize Guverinoma y’u Rwanda n’Abanyarwanda muri rusange kwishyuka kuri uyu munsi, yizeza ko u Buhinde bwiyemeje gukomeza guteza imbere umubano ufitanye n’urw’Imisozi Igihumbi.

Yagize ati: “Mwishyuke Minisitiri w’Ububanyi n’Amahanga Dr. Biruta Vincent, Guverinoma y’u Rwanda n’Abanyarwanda bose, kuri uyu Munsi wo Kwibohora. Twiyemeje kurushaho guteza imbere ubutwererane dufitanye nk’ibihugu n’ubuduhuriza mu miryango mpuzamahanga.”

Minisitiri Dr. Biruta na we yahise amusubiza agira ati: “Urakoze! Twiteguye gukorana namwe mu kurushaho gushimangira ubufatanye n’ubutwererane bw’u Rwanda n’u Buhinde.”

U Rwanda n’u Buhinde bifitanye umubano w’akadasohoka kandi w’igihe kirekire, ukomeza gukura umwaka ku wundi. U Rwanda rwafunguye Ambasade i New Delhi bwa mbere mu mwaka wa 1999, maze rushyiraho Ambasaderi warwo wa mbere muri icyo Gihugu mu mwaka wa 2001.

Guhera icyo gihe kugeza n’uyu munsi, ibyo bihugu byombi byakomeje kwagura ubufatanye mu nzego zinyuranye zirimo ubukungu, uburezi, ubutwererane mu bya dipolomasi n’izindi nzego.

U Buhinde na bwo bwafunguye Ambasade yabwo i Kigali taliki ya 15 Kanama 2018, buhita bunagira Oscar Kerketta Ambasaderi wa mbere ufite icyicaro i Kigali, mu gihe mu myaka yabanje uwabaga ahagarariye inyungu z’u Buhinde mu Rwanda yari Ambasaderi ufite icyicaro i Kampala muri Uganda.

Kugeza ubu mu Rwanda habarizwa Abahinde barenga 3,000 bahuriye mu ishyirahamwe ryashinzwe kuva mu mwaka wa 2011, ari na wo Muryango w’Abahinde wa mbere washinzwe mu Rwanda.

Mu myaka 29 ishize nyuma yo guhagarika Jenoside yakorewe Abatutsi, Guverinoma y’u Buhinde yishimira ko nta muturage wayo n’umwe wigeze ahohoterwa, yicwa cyangwa ngo akomeretswe ari mu Rwanda, bityo na bo bakaba bari mu bishimira umusaruro wo kwibohora kuzuye kw’Abanyarwanda.

Ku birebana n’ubutwererane mu by’ubukungu, u Buhinde buza ku mwanya wa kabiri mu bihugu byashoye imari nyinshi mu Rwanda mu mwaka wa 2022, nk’uko bigaragara muri Raporo y’Urwego rw’Igihugu rw’Iterambere (RDB).

Iyo raporo yerekana ko u Buhinde bwashoye  mu Rwanda miliyoni 151 z’amadolari y’Amerika, nyuma y’u Bushinwa bwashoye miliyoni 182.4 z’amadolari, maze u Budage bukaza ku mwanya wa gatatu kuko bwashoye miliyoni 131.2 z’amadolari.

U Buhinde na none kandi buza mu bihugu bya mbere u Rwanda rwoherezamo ibicuruzwa byinshi, aho mu mwaka ushize rwoherejeyo ibicuruzwa bifite agaciro ka miliyoni 70.9 z’amadolari y’Amerika.

Hagati y’umwaka wa 2020 na 2021 ibihugu byombi byakoranye ubucuruzi bufite agaciro ka miliyoni 140.96 z’amadolari y’Amerika, aho Buhinde ari bwo bwari bwacuruje menshi mu Rwanda kuko bwagejeje kuri miliyoni 134.29 z’amadolari y’Amerika, mu gihe u Rwanda rwohereje ibifite agaciro ka miliyoni 6.67 z’amadolari y’Amerika.

  • NTAWITONDA JEAN CLAUDE
  • Nyakanga 4, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE