Twinjirane mu bwato bwa Hoteli bwatangiye kwakira abakiliya mu Kiyaga cya Kivu

  • NTAWITONDA JEAN CLAUDE
  • Ukuboza 14, 2023
  • Hashize amezi 5
Image

Ibyari inzozi byabaye impamo, ubwato burimo hoteli ‘Mantis Kivu Queen uBuranga’ bwatangiye kwakira abifuza kwihera amaso ibyiza bitatse u Rwanda bubafasha gutembera no kuruhukira mu Kiyaga cya Kivu.  

Iyo hoteli idasanzwe, Mantis Kivu Queen uBuranga, yitezweho kujya itembereza abashyitsi mu rugendo ruzajya rumara iminsi itatu kuva mu Majyaruguru werekeza mu majyepfo y’Ikiyaga cya Kivu.

Ukibonera ubwo bwato hanze wumva ugize amatsiko yo kubugeramo imbere bitewe n’ubwiza ndetse n’umwihariko y’uburyo bwubatse, aho ifite ibyangombwa byose bya hoteli y’inyenyeri eshanu.

Kwinjiramo imbere biri mu bikomeje gutera amatsiko abatari bake, aho abenshi bumva bafite n’amatsiko menshi yo kuruhukira muri hoteli igenda mu mazi y’Ikiyaga cya Kivu usanga ahanini aba atuje cyane.

Ubuyobozi bwa Mantis Kivu Queen uBuranga buvuga ko ari bwo bwa mbere burimo hoteli nini butangiye gukorera mu Rwanda, akaba ari amahirwe akomeye mu rwego rw’ubukerarugendo no kwakira abashyitsi haba abo mu Rwanda n’abo ku rwego mpuzamahanga.

Abagana iyi hoteli, bazajya bakora urugendo rw’iminsi itatu/amajoro abiri ndetse hari n’uburyo bwo guhitamo gusura Pariki y’Igihugu y’Ibirunga na Pariki y’Igihugu ya Nyungwe mbere cyangwa nyuma yo gusura Kivu Queen uBuranga.

Mu bindi abagana ubu bwato bazajya bakora harimo kureba uko uburobyi bwo mu Rwanda bukorwa, kureba inyoni z’ubwoko butandukanye, gukina umukino wo gutwara ubwato uzwi nka “kayaking” ndetse no gusura bimwe mu birwa biri mu kiyaga cya Kivu.

Mu bice abagenda muri ubwo bwato bazajya basura harimo Ikirwa cyitiriwe Napoleon, Ikirwa cya Teddy Bear, Ikirwa cya Monkey ndetse n’Akarwa k’Amahoro.

Ubu bwato burimo hoteli y’ibyumba 10 bifite umwihariko utandukanye. Bufite resitora n’akabari, “piscine” na “jacuzzi” hamwe n’umwanya munini wo hanze ufasha abashyitsi kuruhuka mu gihe bari gutembera mu Kiyaga cya Kivu.

Muri ibyo byumba harimo kimwe gishobora kwakira abantu bo ku rwego rw’Abakuru b’Ibihugu n’ikindi cy’abanyacyubahiro basanzwe.

Buri cyumba cyateguriwe kuba kirimo ikintu cyose umuntu yakenera  nk’uko yaba ari muri hoteli isanzwe y’inyenyeri eshanu, ni ukuvuga ubwiherero n’ubwogero, pisine, ibyuma bitanga ubushyuhe n’ubukonje, televiziyo, resitora, akabare (bar), n’ibindi bitandukanye.

Mantis Kivu Queen uBuranga ifite umwihariko ku bifuza gutembera u Rwanda kuko ni ho hantu honyine mu Rwanda ushobora gutembera mu kiyaga cya Kivu, kimwe mu biyaga binini muri Afurika, wibereye muri hoteli.

Mu rugendo rw’iminsi itatu, abashyitsi bazaba bafite amahirwe yo gusura ibice bitandukanye by’igihugu ari na ko ubona amahirwe yo kumenya ibikorwa bitandukanye bihakorerwa.

Stephane Castell, Umuyobozi ukuriye Mantis mu Rwanda yagize ati: “Twishimiye ko ku nshuro ya mbere, abasura u Rwanda bazaba bashobora gusura ingagi muri Pariki y’Igihugu y’Ibirunga ndetse no kureba inkende n’izindi nyamaswa ziri muri Pariki y’Igihugu ya Nyungwe bitabaye ngombwa ko bakora urugendo rurerure rw’amasaha atandatu banyuze mu nzira y’umuhanda.”

Yavuze kandi ko bishimiye korohereza abagenzi kugera ku zindi hoteli za Mantis ziri mu Rwanda ari zo Mantis Akagera Game Lodge (muri Pariki y’Igihugu y’Akagera, Intara y’Iburasirazuba), Mantis Kivu Marina Bay Hotel (muri Rusizi, Intara y’Iburengerazuba) na Mantis EPIC Hotel & Suites (iherereye i Nyagatare, Intara y’Iburasirazuba).

Craig Erasmus, Visi Perezida ushinzwe Ibikorwa bya Fairmont na Mantis muri Afurika yo munsi y’ubutayu bwa Sahara, yagize ati: “Abashyitsi kandi bazajya babasha gusobanukirwa indangagaciro z’ibanze za Mantis, batembere tumwe mu duce dukurura ba mukerarugendo mu Rwanda ndetse banagire uruhare mu bukerarugendo butabangamira ibidukikije.”

Ubu bwato bwujujwe na sosiyete yo muri Afurika y’Epfo yitwa AfriNest, imikorere yabwo ikazagenzurwa na Mantis izobereye mu gucunga amahoteli agezweho ku rwego mpuzamahanga.

Kivu Queen uBuranga iri mu mahoteli agenzurwa na Mantis, ikigo kiri mu bigize Accor, sosiyete ikomeye mu bijyanye n’amahoteli ku Isi. Iyi hoteli yiyongereye ku yandi mahoteli akomeye mu Rwanda ndetse ikaba yazanye uburyo bushya bw’ubukerarugendo mu Rwanda butari bumenyerewe ari nako igira uruhare mu guteza imbere imibereho y’abaturiye ikiyaga cya Kivu.

Ubuyobozi bwa Mantis bwemeza ko kugera muri Mantis Kivu Queen uBuranga birimo gukorwa mu buryo bubiri bw’inzira y’umuhanda abashyitsi bakoresha i Gisenyi mu Karere ka Rubavu cyangwa ku Rwesero mu Karere ka Nyamasheke.

Ibyumba biri muri iyi hoteli biteye amabengeza
Kuruhukira ku gitanda nk’iki kiri hejuru y’amazi biri mu bunararibonye utakwifuza guhomba
Umukino wa Kayaking na wo uri mu bunararibonye abagenda muri iyi hoteli bazajya bagira amahirwe yo gukina
  • NTAWITONDA JEAN CLAUDE
  • Ukuboza 14, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE