Ubwato bwa Hoteli mu kiyaga cya Kivu bwiteguye kwakira abakiliya

  • Imvaho Nshya
  • Ugushyingo 8, 2023
  • Hashize amezi 4
Image

Ubwato bwa mbere bwa hoteli y’inyenyeri eshanu mu Rwanda, Kivu Queen uBuranga, bwiteguye gukora no kwakira abakiliya guhera muri uyu mwaka, baba abo mu Rwanda ndetse n’abaturutse mu bice bitandukanye by’Isi.

Ni nyuma y’aho bwatangiye kugeragezwa no kureremba mu kiyaga cya Kivu guhera tariki ya 03 Mata 2023, hagenzurwa ko bwujuje ibisabwa byose kugira ngo iyo hoteli ibe yatangira kwakira abantu no gukurura ba mukerarugendo baturutse mu bihugu bitandukanye.

Amashusho yakwirakwijwe mu bitangazamakuru no ku mbuga nkoranyambaga, agaragaza iyo hoteli ireremba hejuru y’amazi, abayibona bose bakaba bakururwa n’ubwiza bugaragarira mu buhanga yubakanywe.

Mantis Kivu Queen uBuranga ni ubwato bwa hoteli ifite ibyumba 10 bigezweho (cabin), kimwe gishobora kwakira abantu bo ku rwego rw’Abakuru b’Ibihugu n’ikindi cy’abanyacyubahiro basanzwe.

Buri cyumba cyateguriwe kuba kirimo ikintu cyose umuntu yakenera  nk’uko yaba ari muri hoteli isanzwe y’inyenyeri eshanu, ni ukuvuga ubwiherero n’ubwogero, pisine, ibyuma bitanga ubushyuhe n’ubukonje, televiziyo, resitora, akabare (bar), n’ibindi bitandukanye.

Ubu bwato bwujujwe na sosiyete yo muri Afurika y’Epfo yitwa AfriNest, imikorere yabwo ikazagenzurwa na Mantis izobereye mu gucunga amahoteli agezweho ku rwego mpuzamahanga.

Mantis ni ikigo gikomeye gikomoka mu Bufaransa kibarizwa muri Accor Group, ikigo gikomeye kurusha ibindi ku mugabane w’i Burayi, ndetse kikaba kiri no ku mwanya wa gatandatu ku Isi mu gutanga serivisi zo kwakira abantu.

Ni ikigo gisanzwe gifite hoteli icunga yitwa Mantis Kivu Marina Bay, ifite ibyumba 79 birimo kimwe gishobora kwakira nk’Umukuru w’Igihugu, iherereye mu Karere ka Rusizi, mu Burengerazuba bw’u Rwanda.

Hoteli Mantis Kivu Queen uBuranga yitezweho gutanga serivisi izenguruka mu mazi akora ku Turere twa Rubavu, Karongi, Nyamasheke na Rusizi, ikaba ari umushinga ukomeye uzateza imbere ubukerarugendo n’ubucuruzi bwambukiranya imipaka.

Ku rundi ruhande abasura u Rwanda baje kuruhukira muri iyo hoteli bazabona amahirwe atangaje yo kwigira ku muco n’amateka by’u Rwanda, gusura ahantu nyaburanga hatandukanye mu Gihugu, kuzenguruka Umurwa Mukuru wa Kigali nk’umujyi wubatse izina ku isuku n’ibindi.

NTAWITONDA JEAN CLAUDE

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE