Triathlon: Ngendahayo na Uwanyirigira begukanye irushanwa ritangira umwaka w’imikino 

  • Imvaho Nshya
  • Ugushyingo 5, 2023
  • Hashize amezi 7
Image

Ku wa Gatandatu tariki 04 Ugushyingo 2023 mu Karere ka Gicumbi habereye irushanwa ritangiza umwaka w’imikino wa 2023-2024   mu ishyirahamwe ry’umukino wa Triathlon mu Rwanda “RTF”.

Iri rushanwa “Gicumbi Duathlon National Championship Challenge 2023” ryakinwe mu bice bibiri aho abakinnyi bose bitabiriye babanje gusiganwa ku maguru ibilometero 5 nyuma basiganwa ku igare ibilometero 20 basoza basiganwa ku maguru ibilometero 2,5 basoza bakoze intera ya kilometero 27,5.

Mu bagabo, Ngendahayo Jeremie ukinira Karongi Sports Club ni we wegukanye umwanya wa mbere aho yakoresheje isaha 1, iminota 2 n’amasegonda 59. Ku  mwanya wa kabiri haje Gatete Vital wakoresheje isaha 1, iminota 7 n’amasegonda 59 naho ku mwanya wa gatatu haza Iradukunda Eric wakoresheje isaha 1, iminota 8 n’amasegonda 40.

Mu bagore, Uwanyirigira Liliane yabaye uwa mbere akoresheje isaha 1, iminota 24 n’amasegonda 50 akurikirwa na Mukamuhire wakoresheje isaha 1, iminota 25 n’amasegonda 50 naho ku mwanya wa 3 haza Nyirarukundo Rosette wakoresheje isaha 1 n’iminota 30.

Mu bakoresheje amagare asanzwe bakaba bakomoka mu Karere ka Gicumbi, Ufiteyezu Emmanuel yaje ku mwanya wa mbere aho yakoresheje isaha 1, iminota 7 n’amasegonda 5, ku mwanya wa kabiri haje Kwizera François Regis wakoresheje isaha 1, iminota 18 n’amasegonda 16 naho ku mwanya wa 3 haza Ishimwe Daddy wakoresheje isaha 1 n’iminota 19.

Muri iri rushanwa kandi hanakinnye, Rukundo Augustin mu cyiciro cy’abafite ubumuga.

Ngendahayo Jeremie wegukanye irushanwa yatangaje ko ryari rigoye cyane kubera imvura ari na byo byabanje kumugora mu gusiganwa n’amaguru ariko kuko yari afite imyitozo y’igare byamufashije kwitwara neza.

Yakomeje avuga ko intego ye ari ugukomeza kwitwara neza akazasoza umwaka w’imikino ari uwa mbere.

Perezida wa RTF, Mbaraga Alexis yatangaje ko bishimiye uko irushanwa ryagenze kuko ryitabiriwe n’urubyiruko rwinshi rw’i Gicumbi ari yo ntego baba bafite iyo bajyanayo irushanwa nk’iri.

Yakomeje avuga ko ubwitabire budahagije ariko ahanini biterwa n’ibikoresho kuko kubibona bitoroshye, gusa barimo gukomeze gukora ubuvugizi kugira ngo amakipe abone ibikoresho bihagije by’ibanze.

Umuyobozi w’Akarere ka Gicumbi wungirije ushinzwe imibereho myiza y’abaturage, Mbonyintwari Jean Marie Vianney yashimiye ubuyobozi bwa RTF kuba barahisemo gutangirira umwaka w’imikino mu Karere ka Gicumbi.

Yakomeje avuga ko bazakomeza gufatanya mu gutegura iri rushanwa ndetse ko bagiye gushakira abakinnyi ibikoresho bigezweho.

Ubwo iri rushanwa riheruka mu 2022 ryari ryegukanwe na Iradukunda Eric mu bagabo na Nyirarukundo Rosette mu bagore.

Biteganyijwe ko irushanwa rya kabiri rizabera i Kigali tariki 25 Ugushyingo 2023.

NYIRANEZA JUDITH

  • Imvaho Nshya
  • Ugushyingo 5, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE