Triathlon: Hakizimana na Uwizeye begukanye “Rwamagana Duathlon National Championship 2022”

  • Imvaho Nshya
  • Ukwakira 1, 2022
  • Hashize umwaka 1
Image

Ishyirahamwe ry’umukino wa Triathlon mu Rwanda “RTF”, ku wa Gatandatu taliki 01 Ukwakira 2022 ryateguye irushanwa rya kane  muri uyu mwaka w’imikino ribera mu  Karere ka Rwamagana nyuma y’imyaka 7 ritahabera  “Rwamagana Duathlon National Championship 2022”.

Hakizimana Felicien ukina ku giti cye mu bagabo na Uwizeye Valentine ukinira ikipe ya CS Karongi mu bagore ni bo begukanye iri rushanwa ryakinwe ku ntera ya kilometero 27,5.

Iri rushanwa ryaherukaga kubera i Rwamagana muri 2015, abasiganwa baturutse mu makipe atandukanye arimo CS Karongi, ikipe ya Kigali, Gicumbi Green TC, Abakinnyi bakomoka i Rwamagana ndetse n’abakinnye ku giti cyabo.

Uretse icyiciro cy’abagabo n’abagore, iri rushanwa kandi ryanitabiriwe n’abakinnyi bakuze  kuko hagaragayemo umukinnyi wakinnye afite imyaka irenga 50 y’amavuko.

Iyi ntera ireshya na kilometero 27.5  abakinnyi bayisiganwe bahereye ku cyicaro cya Polisi i Rwamagana, banyura umuhanda werekeza ahasuzumirwa ibinyabiziga, bafata umuhanda munini Rwamagana-Kigali, bageze imbere gato ya Gare y’Akarere ka Rwamagana, bakomeje inzira yerekeza ahazwi nko mu Cyarabu, bagaruka aho batangiriye.

Ku ikubitiro, aba bakinnyi basiganwe kilometero 5  n’amagaru, aho bazengurutse inshuro ebyiri.

Nyuma  basezengurutse iyi ntera inshuro 8 ku igare basoza bakoze kilometero 20, basoza basiganwa ku maguru aho bakoze intera ya kilometero 2,5.

Mu bagabo, Hakizimana Felicien ni we wegukanye iri rushanwa aho yakoresheje isaha 1, iminota 11 n’amasegonda 20. Yakurikiwe na Iradukunda Eric (1h13’40”) naho ku mwanya wa 3 haza Tuyisenge Samuel  (1h13’43”) aba bombi bakaba bakinira ikipe ya CS Karongi.

Nyuma yo kwegukana iri rushanwa, Hakizimana Felicien yavuze ko ryari rikomeye gusa ko icyamufashije ari imyitozo  y’imbaraga amaze iminsi akora.

Akomeza avuga ko agiye gukomeza kwitegura kugira ngo mu marushanwa ari imbere  harimo na shampiyona y’Afurika azitware neza.

Mu cyiciro cy’abagore, iri rushanwa ryegukanywe na Uwizeye Valentine ukinira Ikipe ya CS Karongi  aho  yakoresheje isaha 1, iminota 22 n’amasegonda 3. Yakurikiwe na Nyirarukundo Rosette wakoresheje isaha 1, iminota 24 n’amasegonda 46 naho ku mwanya wa 3 haje  Mutimukeye Saidate wakoresheje isaha 1 n’Iminota 25.

Nyirarukundo Rosette akaba ari we wari wegukanye irushanwa riheruka ryabereye i Gicumbi muri Nzeri 2022.

Uwizeye Valentine yari amaze  igihe aba uwa kabiri  nyuma yo kwegukana irushanwa ku nshuro ye ya mbere yavuze ko abikesha kwitoza cyane. Akomeza avuga ko  agiye kubikomeza kugira ngo azegukane n’andi marushanwa.

Uretse aba bakinnyi bakinnye mu cyiciro cy’abanyamwuga, hanahembwe abakinnyi bakinnye nk’abatarabigize umwuga. Nkubiri Boniface  ufite imyaka  52 y’amavuko, Nizeyimana Eric ukinira ikipe ya Gicumbi na Bikorimana Theoneste wa Rwamagana bahembwe nk’abakinnyi bagaragaje guhatana  n’ubwo bakoresheje amagare atari aya kinyamwuga.

Perezida wa RTF, Mbaraga Alexis yavuze ko irushanwa ryagenze neza kuko iyo risojwe nta mpanuka cyangwa ikindi cyaritambamiye biba ari byiza.Yakomeje avuga ko bishimira n’ubwitabire muri rusange cyane cyane ku ruhande ry’abagore.

Perezida wa RTF, Mbaraga Alexis

Mbaraga yashimiye Umuyobozi w’Akarere ka Rwamagana wakurikiranye iri rushanwa ndetse akiyemeza ko bagiye gushyigikira uyu mukino.

Umuyobozi w’Akarere ka Rwamagana, Mbonyumuvunyi Radjab yishimiye imikoranire iri hagati y’Akarere na RTF aniyemeza ko bagiye gushyira imbaraga muri uyu mukino  cyane cyane mu bakiri bato kugira ngo mu minsi iri imbere hazabe hari abakinnyi bakomeye babaserukira ndetse banaserukira igihugu.

Umuyobozi w’Akarere ka Rwamagana, Mbonyumuvunyi Radjab

Yakomeje avuga ko mu irushanwa ry’ubutaha bazanafatanya na RTF mu kuritegura ndetse no guhemba abazitwara neza.

  • Imvaho Nshya
  • Ukwakira 1, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE