Triathlon:  Hakizimana  na Mutimukeye begukanye  irushanwa ryo Kwibohora  

  • Imvaho Nshya
  • Nyakanga 4, 2022
  • Hashize imyaka 2
Image

Abagabo (27,5 km)

1. Hakizimana Felicien 1h19’37”

2. Tuyisenge Samuel  1h21″35″

3. Ngendahayo Damien 1h23’07”

Abagore (27, 5 km)

1. Mutimukeye Saidati 1h45’30”

2. Nizeye Valentine 1h56’20”

3. Uwitonze Francine 2h02’09”

Ku Cyumweru taliki 03 Nyakanga 2022, ishyirahamwe ry’umukino wa Triathlon mu Rwanda “RTF” ryateguye irushanwa ryo kwibohora ribera mu Karere ka Huye “Huye Duathlon Liberation Challenge 2022”.

Ubusanzwe umukino wa Triathlon ukomatanya imikino 3 irimo koga, kunyonga igare no Gusiganwa n’amaguru ariko  hakinwe imikino 2 gusa ari yo kunyonga igare no kwiruka “Duathlon”.

Iri rushanwa “Huye Duathlon Liberation Challenge 2022”  ryitabiriwe n’abakinnyi 18 aho basiganwe intera ya kilometero 27,5.

Mu bagabo, Hakizimana Felicien ni we wegukanye umwanya wa mbere aho yakoresheje isaha 1, iminota 19 n’amasegonda 37. Yakurikiwe na Tuyisenge Samuel (1h21″35″) naho ku mwanya wa gatatu haza Ngendahayo Damien (1h23’07”).

Hakizimana Felicien wegukanye umwanya wa mbere

Nyuma yo kwegukana iri rushanwa, Hakizimana Felicien yatangaje ko icyamufashije ari uko yigiriye icyizere bikiyongeraho n’ubunararibonye  yakuye mu marushanwa atandukanye yakinnye umwaka ushize.

Yakomeje avuga ko kuba irushanwa riheruka yararitsinze yaje afite icyizere ko yongera agakora nk’ibyo yari yakoze akaryegukana. Hakizimana ashimangira ko icyamufashije cyane ari uko atahagaritse imyitozo.

Mu bagore hari hitabiriye abakinnyi 4 hasoza 3 aho Mutimukeye Saidati  yegukanye isiganwa aho yakoresheje isaha 1, iminota 45 n’amasegonda 30. Yakurikiwe na Nizeye Valentine (1h56’20”) naho ku mwanya wa 3 haza Uwitonze Francine (2h02’09”).

Mutimukeye Saidati

Muri iri rushanwa kandi hakinnye umukinnyi umwe ufite ubumuga,  Rukundo Augustin aho yabaye uwa 11 muri rusange akoresheje  isaha 1, iminota 39 n’amasegonda 59.

Rukundo Augustin

Perezida wa RTF , Mbaraga Alexis yatangaje ko irushanwa ryagenze neza nubwo basa n’abarimo kongera gutangira nyuma ya COVID-19 kuko abantu batarongera kwitabira ku bwinshi nka mbere ariko barizera ko mu minsi iri imbere bizasubira ku rwego  byariho mbere ya COVID-19.

Yakomeje avuga ko bakinnyi bigaragara ko bafite impano kandi bizeye ko bazahagararira neza igihugu.

Perezida wa RTF , Mbaraga Alexis (Ubanza ibumoso)

Ati : “Ibi biradutera ingufu zo kujya mu Turere gushaka abakinnyi bafite impano kuko barahari.

Ku bijyanye n’uko abitabiriye irushanwa ari bake, Mbaraga avuga ko bagiye kongera ubukagurambaga no gutanga amakuru gusa ikibazo bahura na cyo akaba ari uko amakipe adafite ubushobozi buhagije bwo kuzana abakinnyi bayo bose, kuba ibikoresho bidahagije n’ibindi.

Ati : “Dukeneye ko mu Turere iyi siporo bayijyamo bagashyiramo ingengo y’imari, kandi ndumva bizakunda  bityo n’abitabira  umubare ukiyongera.”

Iri rushanwa ryatangijwe na Meya w’Akarere ka Huye, Sebutege Ange ndetse aranarikurikirana. Nyuma yashimiye RTF kuri iri rushanwa bateguye rikabera mu Karere ka Huye. Yakomeje ashishikariza urubyiruko kwitabira siporo zitandukanye anizeza ko  amarushanwa nk’aya azakomeza kubera muri aka Karere.

Meya w’Akarere ka Huye, Sebutege Ange ubwo yatangizaga irushanwa

Irushanwa “Huye Duathlon Liberation Challenge 2022” ryateguwe na RTF ku bufatanye n’abaterankunga batandukanye barimo BRALIRWA binyuze mu kinyobwa cyayo  cya “Coca Cola”, Sunlam n’Ikigo cy’Imari n’Imigabane mu Rwanda “RSE”.

  • Imvaho Nshya
  • Nyakanga 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE