Tri-Nation T20 Cup 2022: Uganda yatsinzwe na Tanzania ikomeza kuyobora urutonde

Tanzania 137-132 Uganda

Uganda 59-57 Rwanda

Taliki 20-12-2022

Tanzania-Rwanda (Gahanga-09h30)

Rwanda-Uganda (Gahanga-13h45)

Ikipe ya Uganda ntabwo yahiriwe n’imikino y’umunsi wa 6 w’irushanwa “Tri-Nation T20 Cup 2022″ aho yatsinzwe umukino wa mbere.

Iyi mikino y’umunsi wa 6 yabaye kuri uyu wa Mbere taliki 19 Ukuboza 2022, ikipe ya Uganda yatsinzwe na Tanzania.

Muri uyu mukino, ikipe ya Uganda ni yo yatangiye ikubita agapira ishaka amanota «Batting» ubwo hari hamaze gukinwa udupira  106 (17.4 Overs) abakinnyi 10 basohowe mu kibuga (10 Wickets) mu gihe iyi kipe yari imaze gukora amanota 132.

Mu gice cya kabiri, ikipe ya Tanzania yasabwaga  amanota 133 yatangiye gukubita agapira ishaka amanota «Batting» maze mu dupira 115 (19.1 Overs) ikora amanota 137 mu gihe abakinnyi 5 ari bo basohowe mu kibuga (5 Wickets).

Iyi kipe ya Tanzania ikaba yahise yegukana intsinzi ari na yo ya mbere ku ikipe ya Uganda kuko aya makipe yombi yakinnye imikino 4, aho yanganyije umukino umwe, Uganda itsinda 2 naho Tanzania itsinda umwe.

Muri uyu mukino,  Jumbe Salum Ally ukinira ikipe ya Tanzania ni we mukinnyi witwaye neza aho yasohoye mu kibuga abakinnyi 4 ba Uganda anakora amanota 24.

Mu mukino wa kabiri, ikipe ya Uganda yatsinze u Rwanda. Iyi kipe y’u Rwanda ni yo yatangiye ikubita agapira ishaka amanota « Batting »  ubwo hari hamaze gukinwa udupira 87 (14.3 Overs), abakinnyi 10 basohowe mu kibuga (10 Wickets)  aho bari bamaze gukora amanota 57.

Mu gice cya kabiri, ikipe ya Uganda yatangiye gukubita agapira ishaka amanota aho yasabwaga 58. Mu dupira 35 (5.5 Overs) iyi kipe yahise ikora amanota 59 mu gihe umukinnyi umwe ari we wasohowe mu kibuga (1 Wicket).

Ssenyondo Henry ukinira Uganda ni we witwaye neza muri uyu mukino aho  yakoze amanota 14 anasohora mu kibuga abakinyi 3 b’u Rwanda.

Nyuma y’imikino y’umunsi wa 6, Uganda ikomeje kuyobora urutonde  n’amanota 13, Tanzania iri ku mwanya wa kabiri n’amanota 9 naho ikipe y’u Rwanda iri ku mwanya wa 3 n’amanota 2.

Gahunda y’imikino y’umunsi wa 7

Kuri uyu wa Kabiri  taliki 20  Ukuboza 2022, irushanwa rirakomeza hakinwa imikino y’umunsi wa 7 aho ikipe ya Tanzania ikina n’u Rwanda (09h30) nyuma ikipe y’u Rwanda  ikine na Uganda (13h45). Imikino yombi irabera kuri Sitade Mpuzamahanga ya Gahanga.

Iri rushanwa ririmo kubera mu Rwanda kuva taliki 13 Ukuboza 2022 ryateguwe mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.