Tri-Nation T20 Cup 2022: Imikino irimo kugana ku musozo

Tanzania 134-103 Rwanda

Rwanda 67-68 Uganda

Taliki 22-12-2022

Tanzania-Rwanda (Gahanga-09h30)

Tanzania-Uganda (Gahanga-13h45)

Kuri uyu wa Kane taliki 22 Ukuboza 2022 ni bwo hakinwa imikino  y’umunsi wa 8 y’irushanwa “Tri-Nation T20 Cup 2022″, iyi akaba ari imikino ibanziriza iy’umusi wa nyuma.

Imikino iteganyijwe, ikipe ya Tanzania irakina n’ikipe y’u Rwanda (09h30) nyuma iyi kipe  ya Tanzania ikine na Uganda (13h45). Iyi mikino yombi irabera kuri Sitade Mpuzamahanga ya Gahanga.

Mu mikino y’umunsi wa 7  yabaye taliki 20 Ukuboza 2022, ikipe y’u Rwanda yatsinzwe imikino 2.

Mu mukino wa mbere, ikipe y’u Rwanda yatsinzwe na Tanzania ku kinyuranyo cy’amanota 31.

Muri uyu mukino, ikipe ya Tanzania ni yo yatangiye ikubita agapira ishaka amanota « Batting » maze mu dupira 120 (20 Overs) ikora amanota 134 mu gihe abakinnyi 9 ari bo basohowe mu kibuga (9 Wickets).

Mu gice cya kabiri, ikipe y’u Rwanda yatangiye gukubita agapira ishaka amanota « Batting » aho yasabwaga 135 ngo yegukane intsinzi ya kabiri muri iri rushanwa.  Ubwo hari hamaze gukinwa udupira 114 (19 Overs), abakinnyi 10 basohowe mu kibuga aho bari bamaze gukora amanota  103.

Umukinnyi wa Tanzania, Kassimu Nassoro Chete ni we witwaye neza muri uyu mukino aho yakoze amanota 18 anasohora mu kibuga  abakinnyi 2 b’u Rwanda.

Mu mukino wa kabiri, ikipe y’u Rwanda yatsinzwe na Uganda.  Muri uyu mukino, ikipe y’u Rwanda ni yo yabanje gukubira agapira ishaka amanota « Batting », Uganda itangira itera agapira «Bowling ».

Mu dupira 105, ikipe y’u Rwanda yakoze amanota 67, abakinnyi 10 basohorwa mu kibuga (10 Wickets).

Mu gice cya kabiri, ikipe ya Uganda yatangiye gukubita agapira ishaka amanota  « Batting » aho yasabwaga 68. Mu dupira 53 (8.5 Overs), ikipe ya Uganda yakoze amanota 68 mu gihe abakinnyi 3 ari bo basohowe mu kibuga (3 Wickets).

Bilal Hassan ukinira Uganda ni we mukinnyi witwaye neza muri uyu mukino aho yakoze amanota 9 akanasohora mu kibuga abakinnyi batatu b’u Rwanda.

Kugeza ubu ikipe ya Uganda ni yo iyoboye urutonde n’amanota 15 aho mu mikino 9 yatsinze 7 inganya umwe, itsindwa undi. Ku mwanya  wa kabiri hari Tanzania n’amanota 11 aho mu mikino 9 yatsinze 5, inganya umwe itsindwa imikino 3 naho ku mwanya wa 3 hari u Rwanda n’amanota 2 aho mu mikino 10 yatsinze umwe, itsindwa 9.