Tour du Rwanda 2023: Mulubrhan yegukanye intera ya gatatu ahita ayobora isiganwa

Huye-Musanze (199,5 km)

1. Mulubrhan Henok  5h13’37”

2. Lecerf William Junior 5h13’37”

3. Budiak Anatolii  5h13’39”

4. De La Parte Victor  5h13’44”

5. Calzoni Walter  5h13’48”

Urutonde rusange (448 km)

1. Mulubrhan Henok 11h20’59”

2. Lecerf William 11h20’59”

3.Budiak Anatolii 11h21’01”

4.De La Parte Victor 11h21’06”

5.Calzoni Walter  11h21’10”

Imyanya Abanyarwanda bariho

10. Muhoza Eric 11h21’10”

28. Niyonkuru Samuel  11h22’14”

31. Nsengimana Jean Bosco 11h26’13”

36. Manizabayo Eric 11h26’50”

43. Mugisha Moise 11h30’48”

71. Masengesho 11h43’49”

79. Nsengiyumva Shemu  11h57’04”

80. Hakizimana Felicien  11h58’13”

82. Bigirimana Jean Nepo 12h26’36”

Taliki 22-02-2023

Musanze-Karongi (138, 3 km)

Mulubrhan Henok ukomoka muri Eritrea akaba akinira ikipe ya Green Project–Bardiani–CSF–Faizanè yo mu Butaliyani yegukanye intera ya gatatu ya Tour du Rwanda 2023 ahita anafata umwanya wa mbere ku rutonde rusange by’agateganyo.

Iyi ntera ndende muri iri siganwa yakinwe taliki 21 Gashyantare 2023 yatangiriye mu Karere ka Huye isorezwa mu Mujyi wa Musanze aho abasiganwe  banyuze mu Mujyi wa Kigali basoza bakoze intera ya kilometero 199,5.

Mulubrhan Henok ufite imyaka 23 y’amavuko  ni we wegukanye iyi ntera aho yakoresheje amasaha 5, iminota 13 n’amasegonda 37 akaba yagereye ku murongo rimwe na Lecerf William Junior  ukinira ikipe ya Soudal-Quick-Step Devo  yo mu Bubiligi  ari na ho akomoka.

Aba bakinnyi bombi baje ku mwanya wa mbere  nyuma yo gushyikira abakinnyi 3 bari bayoboye isiganwa umwanya muremure kugeza ku bilometero 185, aba ni Nsengimana Jean Bosco (Rwanda), South African Marc Pritzen (South Africa) na James Fouche (New Zealand).

Mur iyi ntera, James Fouche yasoreje  ku mwanya wa 30, Nsengimana Jean Bosco asoreza ku mwanya wa  34 naho Marc Pritzen asoreza ku mwanya wa 38.

Nyuma yo gutangira isiganwa ari ku mwanya wa 3 ku rutonde rusange,  ku ntera ya kabiri akajya ku mwanya wa kabiri, Mulubrhan Henok ubu ni we uyoboye isiganwa muri rusange aho mu bilometero 448 amaze gukoresha amasaha 11, iminota 20 n’amasegonda 59, akaba anganya ibihe na Lecerf William Junior  uri ku mwanya wa 2 yagiyeho avuye ku mwanya wa 32.

Mulubrhan umaze kwegukana shampiyona y’Afurika inshuro ebyiri yikurikiranya  (2022 na 2023) nyuma yo gutsinda iyi intera yatangaje ko gutsindira mu Rwanda byari inzozi ze kuva akiri muto.

Yakomeje avuga ko hari igihe yashoboraga gutsinda ariko  ntiyagira amahirwe  nk’uko byamugendekeye uyu munsi. Ati: “Ubu rero natangiye gutekereza uburyo nagumana umwanya wa mbere ku rutonde rusange  kuko ni yo  ntego nari mfite ariko nashakaga kubanza nkegukana intera kuko bizakomeza kuba mu bihe byiza nagize mu marushanwa nakinnye”.

Umukinnyi uri hafi y’aba bakinnyi bombi ku rutonde rusange ni Budiak Anatolii ukomoka muri Ukraine akaba akinira ikipe ya Terengganu Polygon CT yo muri Malaysia, ari inyuma ho amasegonda 2.

Vernon Ethan wegukanye intera ya mbere n’iya kabiri  akaba yari ayoboye isiganwa, mu ntera ya gatatu yasoreje ku mwanya wa 64  bituma ajya ku mwanya wa 57 ku rutonde rusange avuye ku mwanya wa mbere.

Umukinnyi kabuhariwe muri uyu mukino, Chris Froome muri iyi ntera ya gatatu  yasoreje ku mwanya wa 22  bituma yigira imbere ku rutonde rusange aba uwa 21  avuye ku mwanya wa 46.

Ku rutonde rusange, umukinnyi w’Umunyarwanda uza hafi ni Muhoza Eric urimo gukinira ikipe ya Bike Aid mu Budage  akaba ari ku mwanya wa 10 yagezeho avuye ku mwanya 27.

Muri iyi ntera ya gatatu, abakinnyi 86 ni bo batangiye isiganwa aho 82 ari bo bashoboye gusoza.  Abakinnyi 4 batasoje ni Hagen Carl Fredrik  (Q36.5 Pro Cycling Team), Dauge Lucas  (Team Novo Nordisk), Kurits Joonas  (Tartu2024 Cycling Team) na Sekkak Imad  (Maroc).

Intera ya 4, Musanze-Karongi

Kuri uyu wa ,Gatatu taliki 22 Gashyantare 2023 ni bwo hakinwa intera ya 4  ya Tour du Rwanda 2023 aho abasiganwa bahagurukira mu Mujyi wa Musanze basoreze i Karongi banyuze mu Karere ka Rutsiro. Abasiganwa barasoza bakoze intera ya  kilometero  138,3.