Tennis: Tristan na Mariam begukanye icyiciro cya mbere cy’irushanwa ry’abakiri bato

19 Gashyantare 2022 Saa 22:30

Yanditswe na Sedar Sagamba Ku ya 19 Gashyantare 2022 Saa 22:30 Iminota 2 yo gusoma

Tennis: Tristan na Mariam begukanye icyiciro cya mbere cy’irushanwa ry’abakiri bato — Tristan Stringer wegukanye umwanya w ambere mu cyiciro cya mbere cy'irushanwa “J4 Kigali International Junior Open 2022”

Tristan Stringer ukomoka muri USA na Mariam Ibrahim ukomoka mu Misiri ni bo bitwaye neza begukana icyiciro cya mbere cy’irushanwa ryo ku rwego rw’Isi mu batarengeje imyaka 18 mu mukino wa Tennis “ITF World Tennis Tour Juniors U-18” ryabereye mu Rwanda kuva taliki 14 kugeza 18 Gashyantare 2022.

Iri rushanwa “J4 Kigali International Junior Open 2022” ryari ryatangiye taliki 12 Gashyantare 2022 hakinwa imikino y’amajonjora nyuma taliki 14 hatangira irushanwa nyirizina ryari ryitabiriwe n’abakinnyi 83 baturutse mu bihugu 33 ku Isi hose.

Ku wa Gatanu taliki 18 Gashyantare 2022 ni bwo habaye imikino ya nyuma aho mu bahungu, Tristan Stringer ukomoka muri USA yatsinze ku mukino wa nyuma Pranav Karthik ukomoka mu Buhinde amaseti 2-0 (6-2 na 7-6).

Tristan Stringer yageze ku mukino wa nyuma asezereye muri ½ Hady El Kordy wo mu Misiri ku maseti 2-1 (5-7, 6-2 na 6-4) na ho Pranav Karthik asezerera Michael Kouame (France) ku maseti 2-1 (7-6,2-6 na 6-4).

Mu gukina ari babiri, ikipe ya Pranav Karthik (India) na Derin Sen (Australia) yatsinze ikipe yari igizwe na Youssef Elshafei (Misiri) na Harrison Gradin (Suwede) amaseti 2-0 (5-3 na 4-1).

Mu bakobwa, Mariam Ibrahim (Misiri) yegukanye irushanwa atsinze ku mukino wa nyuma India Fenieys (France) amaseti 2-0 (6-3 na 7-5). Mariam Ibrahim (Misiri) yari yageze ku mukino wa nyuma atsinze muri ½ Manal Ennaciri (Maroc) amaseti 2-0 (6-2 na 6-4) naho India Fenieys we atsinda Beverley Nyangon bombi bo mu Bufaransa amaseti 2-0 (7-6 na 6-2).

Mariam Ibrahim wegukanye umwanya wa mbere mu bakobwa

Mu cyiciro cy’abakina ari babiri, ikipe yari igizwe na Manal Ennaciri (Maroc) na India Fenieys (France) yatsinze ikipe ya Jadesola Cole (England) na Stad Fani Fanyi Nformi (Cameroun) amaseti 2-1 (5-7, 6-2 na 10-8).

Imikino yose y’iri rushanwa ikaba yarabereye ku bibuga biri muri IPRC Kigali ku Kicukiro.

Kuva kuri uyu wa mbere taliki 21 Gashyantare 2022 haratangira imikino y’icyiciro cya kabiri aho izitabirwa n’abakinnyi 32 mu bahungu na 32 mu bakobwa bose hamwe bakaba 64. Iyi mikino izasozwa taliki 25 Gashyantare 2022.