Tennis : Ikipe y’u Rwanda irakina umukino wa kabiri muri «Davis Cup 2022»

  • Imvaho Nshya
  • Nyakanga 6, 2022
  • Hashize imyaka 2
Image

Mu irushanwa  mpuzamahanga rikomeje kubera mu Rwanda  mu mukino wa Tennis “Davis Cup 2022”, ikipe y’u Rwanda kuri uyu wa Gatatu taliki 06 Nyakanga 2022 irakina umukino wa kabiri n’ikipe y’igihugu ya Tanzania.

Ku munsi wa mbere w’iri rushanwa taliki 04 Nyakanga 2022, ikipe y’u Rwanda iri mu itsinda A hamwe na Tanzania, Uganda na Sudan yitwaye neza itsinda Uganda imikino 3-0.

Muri iri tsinda A uretse umukino w’u Rwanda na Tanzania, ikipe ya Uganda irakina na Sudan.

Mu itsinda B,  Botswana irakina na Angola naho Congo Brazzaville ikine na RDC. Iyi mikino yose irabera muri IPRC Kigali ku Kicukiro.

Ku munsi wa kabiri w’iri rushanwa taliki 05 Nyakanga 2022 habaye imikino ibiri yo mu itsinda B aho ikipe ya Togo yatsinze Congo Brazzaville imikino 3-0.

Umukino wa mbere, Loglo Komlavi (Togo) yatsinze  Biboussy Duhamel Franklin  (Congo Brazzaville) amaseti 2-0 (6-0 na 6-2). Mu mukino wa kabiri, Setodji Thomas wa Togo  yatsinze  Mokobo Armel (Congo Brazzaville) amaseti 2-0 (6-0 na 6-0).

Mu mukino wa gatatu aho bakina ari babiri, ikipe ya  Akomlo M’lapa Tingou na Padio Hod’abalo Isak (Togo) yatsinze ikipe ya Mamata Paterne na Mokobo Armel ( Congo Brazzaville) amaseti 2-0 (6-1 na 6-4).

Ikipe ya Togo
Ikipe ya Congo Brazzaville

Undi mukino, ikipe ya RDC yatsinze Angola imikino 3-0. Umukino wa mbere, Saidi Christian (RDC) yatsinze Tipewa Cleuson (Angola) amaseti 2-0 (6-2 na 6-0).

Umukino wa kabiri, Bushamuka William (RDC) yatsinze Quitomina Zidario (Angola) amaseti 2-0 (6-2 na 6-1).

Mu mukino wa gatatu bakina ari babiri, ikipe ya RDC yari igizwe na Bolangi Bienvenu na Bushamuka William yatsinze ikipe ya Angola yari igizwe na Andre Fernando na Neves Joao amaseti 2-0 (6-2 na 6-2).

Nyuma y’umunsi wa kabiri, ikipe y’u Rwanda ni yo iyoboye urutonde mu itsinda A n’inota rimwe inganya na Sudan. Ku mwanya wa 3 hari Uganda naho ku wa 4 hari Tanzania zose nta nota zifite.

Mu itsinda B, ikipe ya Togo iyoboye urutonde n’amanota 2 inganya na RDC iri ku mwanya wa kabiri, ikipe ya Botswana iri ku mwanya wa 3 aho ikurikiwe na Congo Brazzaville na Angola aho nta nota na rimwe zifite.

Iyi mikino “Davis Cup 2022” ni iyo mu cyiciro cya 4 (Group IV) aho amakipe arimo guhatanira kuzamuka mu cyiciro cya gatatu (Group III).

  • Imvaho Nshya
  • Nyakanga 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE