Taekwondo : Maroc yegukanye umwanya wa mbere muri shampiyona  y’Afurika mu kurwana

Kuva taliki 13 kugeza 17 Nyakanga 2022, mu Rwanda habereye shampiyona y’Afurika mu mukino njyarugamba  wa Taekwodo  “African Taekwondo Championships 2022” aho yakinwe mu bice bibiri birimo icyiciro cyo kwiyereka  “Poomsae” n’icyiciro cyo kurwana “Kyorugi”.

Taliki 13 na 14 Nyakanga 2022 habaye igice cy’iri rushanwa  kigizwe no kwiyereka  “Poomsae”.  Muri iki gice, u Rwanda rwitwaye neza rweguka imidali 15 aho rwaje ku mwanya wa 3 mu gihe Misiri yegukanye umwanya wa mbere naho Senegal iza ku mwanya wa kabiri.

Taliki 16 na 17 Nyakanga 2022 hakinwe icyiro cyo kurwana “Kyorugi”, ikipe ya Maroc yitwaye neza yegukana umwanya wa mbere   aho yegukanye imidali 15 harimo 8 ya Zahabu, 3 ya Feza n’indi 4 y’Umuringa.

Iyi kipe yegukanye umwanya wa mbere ibikesha abakinnyi bayo bitwaye neza mu byiciro bitandukanye barimo Bassel Ayoub   wegukanye umudali wa zahabu  mu bafite ibiro 87 mu bagabo,  Wasfi Abdelbasset wegukanye zahabu mu batarengeje ibiro 63 mu bagabo.

Mu bagore hari  abakinnyi 6 begukanye umudali wa zahabu mu byiciro bitandukanye barimo Elaasal Nezha (U-49 kg), Laaraj Nada (U-57 kg), Aboufaras Fatima Ezzahra (73 kg), Sahib Soukaina (U-46kg, El Oumaima (U-53 kg) na Salih Safia  (U-62 kg).

Ku mwanya wa kabiri haje ikipe ya Misiri yegukanye imidali 13 harimo 3 ya Zahabu, 5 ya Feza n’indi 5 y’Umuringa. Ku mwanya wa 3 haje ikipe ya Cote d’Ivoire yegukanye imidali 7 harimo 2 ya Zahabu, 3 ya Feza n’indi 2 y’Umuringa.

Ikipe ya Tunisia yahawe igikombe nk’ikipe yagaragaje korohera  “Fair Play Team”. Iyi kipe muri rusange yasoreje ku mwanya wa 4 aho yegukanye imidali 4 irimo  2 ya Zahabu, 1 wa Feza n’undi 1 w’Umuringa.

Ku ruhande rw’ikipe y’u Rwanda muri iki cyiciro yasoreje ku mwanya wa 13 aho yegukanye umudali umwe wa Bronze  wegukanwe na Umuhoza Adinette mu cyiciro cy’abari munsi y’ibiro 67 mu bagore.

Muri iri rushanwa ryose, Aaron François Kobenan (Cote d’Ivoire) ni we mukinnyi witwaye neza mu bagabo naho Nezha Elaasal (Maroc) aba umukinnyi witwaye neza  mu cyiciro cy’abagore.

Nyuma y’iri rushanwa, Perezida w’ishyirahamwe ry’umukino wa Taekwondo mu Rwanda “RTF”, Dr. Hakizimana David yatangaje ko bishimira  ko shampiyona y’Afurika yabereye  mu Rwanda ku nshuro ya mbere.

Yakomeje agira  ati : “ Iyi ni intambwe ishimishije duteye kuba nyuma y’imyaka 12 uyu mukino umaze ukinwa mu Rwanda tubasha guhamagara Afurika yose ikaza hano.”

Yagarutse kandi ku musaruro w’ikipe y’u Rwanda aho awishimira. Ikipe y’u Rwanda yari igizwe n’abakinnyi  28 barimo  13 bakinnye mu kwiyereka   “Poomsae”  na 15 bakinnye mu cyiciro cyo kurwana “Kyorugi”.

Perezida wa RTF, Dr. Hakizimana ati : “Umusaruro twakuyemo ni mwiza cyane, twabaye  aba gatatu muri Afurika mu kwiyereka,  mu kurwana twari tubizi ko tugifite byinshi byo gukora, twabonye umudali umwe  w’Umuringa, gusa abakinnyi bacu ubu bagiye ku rutonde rw’abakinnyi bakina amarushanwa  mpuzamahanga.”

Dr. Hakizimana avuga ko kandi abakinnyi b’u Rwanda bungutse byinshi kuko bahuye n’abakinnyi bakomeye ku rwego mpuzamahanga, ibi bikaba bizabafasha mu rugendo rwo gushaka itike y’imikino Olempike izabera i Paris 2024.

Umunyamabanga Uhoraho muri Minisiteri ya Siporo “MINISPORTS”, Shema Maboko Didier yatangaje ko  bishimiye kuba u Rwanda rwaremerewe kwakira iri rushanwa  kuko hari n’ibindi bihugu  byaryifuzaga.

Yakomeje avuga ko mu bijyanye n’imibare ari ubwa mbere shampiyona y’Afurika yitabiriwe n’ibihugu byinshi mu mateka kandi  ko kuba yarabereye muri BK Arena isanzwe yakira indi mikino nka Basketball na Volleyball  byerekanye ko yakwakira n’imikino njyarugamba.

Shema  agaruka ku musaruro w’ikipe y’u Rwanda yavuze ko  ari ubwa mbere  hitabiriye abakinnyi benshi. Ati : “Byaduhaye icyizere ko umukino urimo kugenda utera imbere  mu myaka 12  umaze  kuba dufite abakinnyi bakina ku rwego mpuzamahanga.”

Perezida w’impuzamashyirahamwe y’umukino wa Taekwondo muri Afurika “ African Taekwondo Union (AFTU)”, Issaka Ide  nyuma y’iri rushanwa yashimiye Perezida w’u Rwanda, Paul Kagame  ku bufasha bwatanzwe binyuze muri MINISPORTS kugira ngo iri rushanwa rigende neza.

Yagize ati : “Nanyuzwe n’uko irushanwa ryagenze, ndashimira igihugu cy’u Rwanda n’ishyirahamwe ry’umukino wa Taekwondo mu Rwanda”.

Akomeza avuga ko yishimiye kuba mu Rwanda uyu mukino umaze igihe gito ukinwa, ariko  hakaba haragaragaye ubushake bwo gukina n’abakomeye. Ati : “ Birerekana ko Taekwondo muri Afurika irimo kugenda  izamuka  kubona igihugu nk’iki kibasha gutegura irushanwa nk’iri kandi rikagenda neza.”

Muri rusange ibihugu 38 ni byo byitabiriye  iyi shampiyona y’Afurika mu mukino wa Taekwondo “African Taekwondo Championships 2022”. Ibi ni u Rwanda, Maroc, Misiri, Cote d’Ivoire, Tunisia, Niger, Senegal, Burkina Faso, Nigeria, Kenya, Gabon, Mali , Uganda, Algeria, RDC, Burundi, Central African Republic, Botswana, Mozambique, Ghana , Chad, Guinea, Eswatini, Cameroon, Congo Brazzaville, Benin, Cape Verde, Sudan, Guinea-bissau, Gambia, Djibouti, Tanzania, Lesotho, Libya, Togo, Zimbabwe, Somalia na Equatorial Guinea.