Taekwondo: Irushanwa “Korean Ambassador’s Cup” rigiye kuba ku nshuro ya 9

  • Imvaho Nshya
  • Ugushyingo 18, 2022
  • Hashize imyaka 2
Image

Ishyirahamwe ry’umukino njyarugamba wa Taekwondo  “RTF” ku bufatanye na Ambasade ya Koreya mu Rwanda ryateguye irushanwa mpuzamahanga  ngarukamwaka  “The Korean Ambassador’s Cup Taekwondo Championships 2022” rizaba mu mpera z’iki Cyumweru taliki 19 na 20 Ugushyingo 2022 muri Expo Ground “PSF” i Gikondo.

Iri rushanwa biteganyijwe ko rizakinwa gusa mu cyiciro cyo kurwana “Kyorugi” mu makipe y’abakuru “Seniors” mu bagabo n’abagore.

Umunyamabanga Mukuru wa RTF,  Mbonigaba Boniface  atangaza ko  amakipe hafi ya yose yo mu Rwanda azitabira bakaba bategereje n’ayandi aturutse hanze mu bihugu byo mu Karere k’Afurika y’Iburasirazuba.

Umunyamabanga Mukuru wa RTF,  Mbonigaba Boniface 

Akomezaa avuga ko  ubundi irushanwa nyirizina riba taliki 20 Ugushyingo 2022 ariko bakaba barasabye abakinnyi bose ko  taliki 19 Ugushyingo 2022 bagomba kuba bahari kugira ngo bapimwe ibiro banashyirwa mu byiciro.

Mbonigaba yasobanuye impamvu bahisemo gutegura irushanwa mu cyiciro cyo kurwana  “Kyorugi” mu bakuru  ko ari ukugira ngo batangire gutegura abakinnyi  kuko mu mwaka utaha bafite amarushanwa  yo gushaka itike y’imikino Olempike 2024 mu cyiciro cyo kurwana kuko kugeza ubu ntabwo barongeramo icyiciro cyo kwiyereka “Poomsae”.

Ambasaderi wa Koreya mu Rwanda, Hon. Jin-weon CHAE yatangaje ko bishimira gufatanya na RTF mu bikorwa binyuranye byo guteza imbere umukino. Yakomeje avuga ko uyu mukino ari umwe mu mikino imaze gutera imbere mu Rwanda bakaba bizeza kuzakomeza gutanga ubufasha bwabo mu kuwuteza imbere.

Ambasaderi wa Koreya mu Rwanda, Hon. Jin-weon CHAE

Abakinnyi bazahatana muri “The Korean Ambassador’s Cup Taekwondo Championships 2022” bazaba bagabanyije mu byiciro hakurikijwe ibiro. Mu bagabo hari abatarengeje ibiro 58, abatarengeje 68 n’abafite hejuru y’ibiro 68.

Mu bagore hari icyiciro cy’abatarengeje ibiro 49, abatarengeje 57 n’abari hejuru y’ibiro 57.

Abakinnyi n’amakipe bazaba bahize abandi mu irushanwa bazahabwa imidali n’ibikombe ndetse banahabwe ibindi bihembo birimo n’ibikoresho bya Taekwondo.

Iri rushanwa  ryaherukaga gukinwa muri 2021 aho igikombe kiruta ibindi cyatwawe na Dream Fighters TC ikurikirwa na Police TC  naho Dream TC  iza ku mwanya wa gatatu. Nizeyimana Savio ukinira  Police TC ni we watowe nk’umukinnyi w’irushanwa mu bagabo naho mu  bagore aba Ndacyayisenga Aline. Mu ngimbi, Nteziyaremye Ismael yegukanye igihembo cy’uwitwaye neza  naho mu bangavu  uwitwaye neza aba Umuhoza Adinette.

Umukinnyi wahize abandi mu kwiyereka “Poomsae” mu bagabo ni Rugambwa Junior (Dream Fighters TC) naho mu bagore  aba  Isaro (KITA). Kayitare Benon ni we watowe nk’umusifuzi wahize abandi, Hakizamungu Jean Claude utoza Kirehe TC  yegukana igihembo cy’umutoza mwiza kurusha abandi.

  • Imvaho Nshya
  • Ugushyingo 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE