Taekwondo: Ikipe ya Police TC ni yo yegukanye “Korean Ambassador’s Cup 2022”

Ikipe ya Police TC ni yo yitwaye neza yegukana igikombe cy’irushanwa mpuzamahanga “Korean Ambassador’s Cup Taekwondo Championships 2022”

Iri rushanwa ryabereye muri Expo Ground “PSF” i Gikondo taliki 20 Ugushyingo 2022 ritegurwa n’ishyirahamwe ry’umukino wa Taekwondo  “RTF” ku bufatanye na Ambasade ya Koreya mu Rwanda.

Abakinnyi bahatanye mu cyiciro cyo kurwana “Kyorugi” mu bakuru “Seniors” mu bagabo n’abagore aho hari hitabiriye amakipe 20 harimo 15 yo mu Rwanda, amakipe abiri yo muri Kenya, ikipe imwe yo muri RDC, ikipe imwe yavuye i Burundi n’ikipe imwe y’impunzi.

Ikipe ya Police HBC ni yo yegukanye umwanya wa mbere aho yakurikiwe na  Dream Fighters TC  yari yegukanye iri rushanwa muri 2021  naho Dream  TC iza ku mwanya wa gatatu.

Mu bakinnyi ku giti cyabo, mu bagore, Umutesi Adeline ukinira  Police TC  ni we watowe nk’umukinnyi w’irushanwa, mu gihe mu bagabo ari Ngiriyaremye Dan ukinira Dream Fighters TC.

Mu bindi bihembo byatanzwe kandi, ikipe ya IYF-Burundi ni yo yahize izindi mu kugira  ishyaka “Taekwondo Team Spirit”. Teddy Salumu, umutoza wa Aigle de Fer yo muri DRC na Wilcliff Okoth wa Regional TC  yo muri Kenya ni bo batowe nk’abatoza beza kurusha abandi, mu gihe Munyaneza Basile ari we wahembwe nk’umusifuzi w’irushanwa.