SOS igiye gukiza ubushomeri urubyiruko rusaga ibihumbi 120

  • ZIGAMA THEONESTE
  • Ugushyingo 29, 2023
  • Hashize amezi 3
Image

Umuryango SOS Children’s Village Rwanda wita ku bana batagira kivurira watangaje ko ufite gahunda yo gukura mu bushomeri urubyiruko ibihumbi 124 mu myaka itanu iri imbere, ibaha amahurwa n’ubumenyi ngiro mu myuga itandukanye no kubahuza n’ibigo bitanga akazi bakagahabwa, bigakorwa mu rwego rwo guhangana n’ubushomeri bwugarije urubyiruko.

Ni ibyatangajwe na SOS i Kigali kuri uyu wa Gatatu  tariki 29 Ugushyingo 2023, ubwo yatangaga impamyabushobozi ku rubyiruko 120, zijyanye n’amasomo bize mu gihe cy’umwaka binyuze mu mushinga YouthCan.

Ni amahugurwa bahawe mu cyiciro cya kabiri bahugurwa ku bucuruzi, kwakira neza abakiliya no kwamamaza ibikorwa by’ ubucuruzi.

Urubyiruko runahugurwa ku bijyanye n’amashanyarazi, Abuporombiye, kubaza, ubudozi, kwakira neza abakiliya, kwamamaza ibicuruzwa n’ibijyanye n’ubuhinzi nk’isoko y’imibereho y’abanyarwanda benshi.

Abakurikiye aya masomo barimo abasoje amashuri yisumbuye, Kaminuza ndetse n’abandi batagize amahirwe yo gukomeza kwiga barimo ababyariye iwabo.

Bahamya ko aya mahugurwa yabagiriye akamaro ku buryo byatumye bahabwa akazi abandi bakaba bateganya kuzayabyaza umusaruro bihangira akazi cyangwa se ubumenyi ngiro bahawe bakabukoresha neza mu kazi mu gihe bakoreye abandi.

Iradukunda Joselyne yagize ati: ”Ntabwo ndatangira gukora ariko ntekereza ko bizagenda neza kuko nungutse byinshi birimo gutinyuka no gukorana n’abandi.”

Nshimiyimana Prince usoje amahugurwa yo kwakira neza abakiliya no kwamamaza ibicuruzwa avuga ko ubwo yohekerezwaga mu imenyerezamwuga kompanyi yahise imushima ubu akaba afite akazi.

Ati: “Byaramfashije kuko aho nimenyereje umwuga noherejwe na SOS ni ho nkora bampaye akazi.”

Umuyobozi Mukuru wa SOS Kwizera Jean Bosco, yagaragaje ko iki cyiciro cya kabiri cy’aba banyeshuri bajyanye ubumenyi buzabafasha kumenya uko bamenya kwikemurira ibibazo mu kazi no mu bundi buzima.

Yagize ati: “Dukora amahugurwa yo mu buryo bubiri aho umunyeshuri agira ubumenyi ahabwa mu ishuri akagira n’igihe amara mu kazi yimenyereza. Ntanze nk’urugero mu mwaka bamara amezi atandatu  biga mu ishuri bamara andi mezi atandatu bakora muri Kampani umuntu abona impamyabumenyi ari uko yujije ibyo bibiri, icyo gihe tuvuge niba barize gukora ibijyanye n’amazi (Polombelie).Tugira amasezerano na WASAC kugira abo bana bahugurwe.”

Yongeyeho ati: “Mu ishuri niba barize ibintu babe bashobora kubikora koko mu buryo bufatika bikabaha amahirwe yo kuba babona akazi muri izi kompanyi.”

Mu mishinga yose SOS ifite mu gihugu yatangaje ko iteganya guhugura urubyiruko mu ngeri zitandukanye, nibura urubyiruko rutari munsi y’ibihumbi 124 mu myaka itanu iri imbere.

Mwambari Faustin Umuyobozi Mukuru ushinzwe umurimo muri Minisiteri y’Abakozi ba Leta n’Umurimo (MIFONTRA)yagaragaje ko urubyiruko rugira amahirwe yo guhabwa amahugurwa rukwiye kwihatira kugira indangagaciro nzima zijyanye n’akazi gakenewe ku isoko ry’umurimo.

Yagize ati: “Kubimenya ni kimwe no kubigaragaza ni ikindi nawe ugomba kugaragaza ko ufite ubunararibonye n’ubushobozi mu byo ukora. Niba uje ugaragaza ubushobozi buhambaye nta muntu wakwitesha.”

Uwo muyobozi kandi yanibukije urubyiruko by’umwihariko abashaka kwikorera, gukoresha imbaraga zose kugira ngo babone igishoro, bagategura imishinga izatuma Banki zibaha amafaranga  y’inguzanyo yavamo igishoro.

Ati: “Urubyiruko rushaka ibintu byihuse… ahubwo mushyiremo imbaraga, abashaka kuba ba rwiyemezamirimo bizabasaba kwihangana. Niba ushaka gukorera abantu kora neza ntawe uzaguha akazi kubera ko akugiriye impuhwe.

Niba ushaka gukora ibintu neza jya ku ikoranabuha urebe uko abo mu bihugu byateye imbere nk’u Bushinwa babikora… ndashaka ko mumenye gukora akazi kandi akazi mubonye ntimuhombye abo mugiye gukorera ku buryo batazabona uburyo bwo kubitesha”.

Abanyeshuri basoje amahugurwa SOS ibaha ibikoresho by’ibanze bazakoresha mu kazi. Igaragaza ko muri gahunda ifite binyuze mu mushinga YouthCan mu myaka itanu abanyeshuri bazaba bahuguwe bazagera ku 1850. Kugeza ubu SOS ifitanye amasezerano na Kompanyi 80 zitanga akazi ku rubyiruko irimo guhugura zizayifasha guha akazi urubyiruko rurangije aya mahugurwa bityo igahamya ko bizafasha mu guhangana n’ikibazo cyugarije urubyiruko.

  • ZIGAMA THEONESTE
  • Ugushyingo 29, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE