Sobanukirwa ingamba z’Akarere ka Kirehe mu guhangana na VIH/SIDA

  • NYIRANEZA JUDITH
  • Ukuboza 7, 2023
  • Hashize amezi 6
Image

Hari uburyo butandukanye bwakoreshejwe n’Akarere ka Kirehe hagamijwe guhangana n’ubwandu bushya bwa virusi itera SIDA, harimo ubukangurambaga, gupima abaturage, gutanga udukingirizo no kwegereza abaturage serivisi z’ubuvuzi.

Nk’uko byatangajwe n’ubuyobozi bw’Akarere ka Kirehe, ingamba zikomatanyije zigamije gukangurira abaturage kwirinda virusi itera SIDA, hakozwe ubukangurambaga bw’ibyumweru bibiri bwahereye ku itariki ya 1-14 Nzeri 2023, bukorerwa mu bigo by’amashuri, mu makoperative, ahantu hatandukanye abaturage bahurira nko mu Nteko z’abaturage.

Nk’uko byagarutsweho n’umuyobozi mukuru w’ibitaro bya Kirehe Dr Munyemana Jean Claude, kugera mu mpera z’Ugushyingo, abantu 5010 ni bo bakurikiranwa n’inzego z’ubuzima bari bafite Virusi itera SIDA mu Karere ka Kirehe, muri bo 412 bakurikiranwa n’ibitaro naho 4598 bagakurikiranwa n’ibigo nderabuzima

Ku bijyanye n’ubukangurambaga yavuze ko hashyizwemo imbaraga kugira ngo abaturage basobanukirwe neza uko bakwirinda.

Ati: “Hakozwe ubukangurambaga ku rwego rw’Akarere bwamaze ibyumweru bibiri, butangirizwa mu isoko rya Gatore [….] Nibura twakoze ubukangurambaga inshuro 3 mu Tugari twose 60 tugize Akarere.

Mukandayisenga Janvière, Umuyobozi w’Akarere ka Kirehe wungirije ushinzwe imibereho myiza y’abaturage ashimangira ko izo ngamba zifasha guha ubumenyi abaturage bubafasha kwirinda virusi itera SIDA kandi hibandwa cyane cyane mu duce babona twakwibasirwa no kwandura kurusha utundi.

Ati: “Tugenda tujya muri ibyo bice abashoferi baparikamo tukabaganiriza, ariko bikajyana no gukomeza kwegera urubyiruko tukaruganiriza kugira ngo hakumirwe ubwandu bushya”.

Mukandayisenga Janvière, Visi Meya ushinzwe imibereho myiza y’abaturage

Hapimwe 15 750 habonekamo 37 banduye

Gupima abaturage ku bushake byarakozwe ku baturage 15750, hanyuma muri bo 37 basanganywe virusi itera SIDA bahita boherezwa ku bigo nderabuzima ngo batangire imiti.

Umuyobozi w’ibitaro bya Kirehe Dr Munyemana yagize ati: “Mu bukangurambaga bw’iminsi 14 bwakozwe muri Nzeri uyu mwaka, muri aka Karere hagamijwe gukumira ubwandu bushya bwa virusi itera Sida, mu baturage 15,750 bipimishije ku bushake, hagaragayemo abafite ubwandu bushya bwa virusi itera SIDA 37 bihwanye na 0.23%; mu gihe ku rwego rw’Igihugu igipimo cy’ubwandu bushya kiri kuri 0.27%”.

Hatanzwe udukingirizo 50 414

Umuyobozi w’ibitaro, Dr Munyemana yavuze ko hatanzwe udukingirizo 50 414 kugira ngo hakumirwe ubwandu bushya.

Umuyobozi Mukuru w’itaro bya Kirehe Dr Munyemana Jean Claude

Yagize ati: “Hatanzwe udukingirizo 50 414 muri icyo gihe cy’ubukangurambaga. Igikorwa cyo kugeza ku baturage udukingirizo byagiye bikorwa ku bigo nderabuzima, ahabereye ubukangurambaga, mu nama n’ahandi hahurira abantu benshi nko ku masoko mato arema ikigoroba azwi ku izina ry’udusoko twa ndaburaye”.

Visi Meya Mukandayisenga Janvière yongeyeho ati: “Twakoze dufatanyije n’abafatanyabikorwa, ahantu hahurira abantu benshi tukagenda dushyiraho udukingirizo tw’ubuntu, kugira ngo nibura n’ugiye gukora iyo mibonano mpuzabitsina ibe ikingiye; dukomeze kwirinda icyorezo cya SIDA”.

Serivisi z’ubuzima zegerejwe abaturage

Abipimishije bagasanga bafite virusi itera SIDA begerejwe serivisi, bahita batangira gufata imiti igabanya ubukana, bakayifatira ku bigo nderabuzima bitandukanye byo mu Karere ka Kirehe uko ari 19.

Muri rusange, Akarere ka Kirehe mu bijyanye n’ubwandu bwa virusi itera SIDA kari kuri 1.08%, mu gihe ku rwego rw’Igihugu ari 3%.

  • NYIRANEZA JUDITH
  • Ukuboza 7, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE