Sobanukirwa inama zafasha kurwanya ibyonnyi n’indwara mu bihingwa

  • NYIRANEZA JUDITH
  • Ugushyingo 22, 2023
  • Hashize amezi 6
Image

Mu buhinzi hari uburyo bushobora kugabanya umusaruro mu gihe umuhinzi adakurikirana neza ibihingwa bikaba byakwibasirwa n’ibyonnyi cyangwa se indwara.

Hari inama zigirwa abahinzi hagamijwe kurinda ko imyaka yabo yakwibasirwa n’indwara n’ibyonnyi, kandi byoroha kubirwanya, iyo umuhinzi ashobora kumenya gutandukanya ibyonnyi n’indwara.

Impuguke zitanga inama zo guhangana n’ibibazo bituruka ku byonnyi n’indwara zirimo gusura umurima kenshi, gufumbira, guhinduranya ibihingwa mu murima n’izindi.

Umuhinzi wo mu Karere ka Muhanga, Uwizeye yatangarije Imvaho Nshya ko ibyonnyi ari ibyatsi bimera mu myaka bikaba byagabanya umusaruro.

Yagize ati: “Ibyonnyi numva ari ibyatsi bimera mu bihingwa nk’urwiri, kura isuka n’ibindi bikaba byagabanya umusaruro, kuko ibihingwa bisa n’ibiba bicuranwa n’ibyo byatsi bindi”.

Undi muhinzi wo mu Karere ka Rwamagana, Munezero yasobanuye ko indwara ari iziterwa n’udukoko turya imyaka.

Ati: “Numva ari udukoko twibasira imyaka, tukayirya tukaba twayivunaguza ikuma, turimo inda, nkongwa, inanda, n’ibindi bikaba byagabanya umusaruro”.

Umuyobozi w’Ishami rishinzwe imbuto n’ifumbire muri RAB, Daniel Rwebigo yasobanuye itandukaniro riri hagati y’ibyonnyi n’indwara.

Yagize ati: “Icyonnyi ni agakoko, igisimba cyangwa umuntu uzabyangiza mu buryo bigaragara ibimenyetso bigaragara ku buryo n’icyo byangije bigaragara n’amaso tugendagenda naho indwara yo ni nka mikorobe itabonwa n’amaso ahubwo ubona ibimenyetso, cyangwa aho cyaboze, bisaba gupima mu byuma byabugenewe.

Ku ngingo yo gutera imbuto ku gihe, Rwebigo asobanura ko bituma nk’icyonnyi kitibasira imyaka nk’uko byaba ari mu murima umwe, kandi binoroshya guhangana n’ibyo byonnyi.

Yatanze urugero, ati: “Inama yo guhingira rimwe, byoroshya kurwanya nkongwa, kuruta ko umurima umwe ari wo wakwibasirwa n’icyo cyonnyi”.

Indi nama ni ugusura imirima kenshi kugira ngo akurikirane imikurire y’ibihingwa, habaye hari icyonnyi cyangwa uburwayi imyaka itabarwe hakiri kare.

Gufumbira ni ingenzi na byo kuko bifasha abahinzi kwita ku butaka ngo bukungahare ku ntungagihingwa bityo kikagira ubudahangarwa.

Ifumbitre ifasha kongera umurumbuko w’ubutaka n’ubushobozi bwo gufasha igihingwa gutanga umusaruro.

Leta yorohereza abahinzi ibaha ifumbire kuri Nkunganireya 40%, ndetse hari n’ifumbire (DAP) iherutse gutanga yunganiwe 100% yo kubagaza ibigori.

Rwebigo yagize ati: “Mu ibagara abahinzi bite ku ifumbire ituma igihingwa kigira igikuriro cyiza, kikagira ubudahangarwa. Nko ku ifumbirew ifitemo umunyu wa azote ni ngombwa kuyikoresha neza ihita irenzwaho itaka kuko iguruka, umuhinzi akirinda kuyanika kuko iraguruka”.

Ishami ry’umuryango w’Abibumbye ryita ku buhinzi, FAO ritangaza ko ku Isi ifumbire ikoreshwa igeze kuri kilogarama 140 kuri hegitari hagamijwe kongera umusaruro.

Guhinduranya ibihingwa mu murima bituma ubukana bw’indwara bugabanyuka, bityo bigafasha ko igihe ihinduranya ry’ibihingwa rikozwe neza bigabanya kwibasirwa n’indwara.

Yongeyeho kandi ko umuhinzi agomba guhoza ijisho mu murima, agakuramo kare ibyonnyi bishobora kuzamo harimo n’ibyatsi.

Yagize ati: “Kubagara no gukuramo ibyatsi, dushishikariza abahinzi kubikuramo uko babibonyemo guhoza ijisho ku murima kugera n’ubwo haba habura nk’ibyumweru biytatu ngo basarure kuko ibyo byatsi bicura ibihingwa”.

Gukurikirana igihingwa kandi byoroha iyo hahujwe ubutaka byoroshya gukurikirana ibihingwa, kubonera umusaruro isoko.

NYIRANEZA JUDITH

  • NYIRANEZA JUDITH
  • Ugushyingo 22, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE