Si ikibazo cy’u Bushinwa gutanga inguzanyo nyinshi- Perezida Kagame

  • NTAWITONDA JEAN CLAUDE
  • Ukwakira 20, 2022
  • Hashize imyaka 2
Image

“Umutego w’umwenda w’u Bushinwa” (Chinese Debt Trap) ni imvugo yamamaye ku Isi muri ibi bihe u Bushinwa bwemera guha inguzanyo nyinshi ibihugu bikennye n’ibikiri mu nzira y’Amajyambere, kandi bikemera gusinya n’amasezera y’ubwishyu y’igihe kirekire ku nyungu yo hasi cyane.

Perezida wa Repubulika y’u Rwanda Paul Kagame yavuze ko ikibazo atari icy’u Bushinwa butanga amafaranga, ahubwo we akibona ku bihugu bisaba izo nguzanyo ntibizikoreshe icyo byemeye kuzikoresha biyaka u Bushinwa.

Yabigarutseho mu kiganiro yagiranye n’Umunyamakuru w’Igitangazamakuru Mpuzamahanga cya Leta y’u Bushinwa (CGTN), cyibanze ku mubano w’u Rwanda n’icyo gihugu cyagize uruhare rukomeye mu iterambere ry’Igihugu mu myaka 20 ishize.

U Bushinwa bugenera ibihugu inguzanyo nyinshi bishaka zifashishwa mu kubaka ibikorwa remezo ariko abasesenguzi bavuga ko iyo ibyo bihugu binaniwe kuzishyura u Bushinwa bugira uburenganzira bwo gucunga imihanda y’ubucuruzi,

Kugeza ubu ibihugu by’Afurika bivugwaho kugira umwenda uhanitse w’u Bushinwa ni Djibouti n’Angola kuko urenga hejuru ya 40% by’umutungo rusange w’Igihugu, ndetse ukaba uniganzura umusaruro mbumbe w’igihugu kuri urwo rwego (GDP), harimo n’amafaranga ibyo bihugu bikura hanze.

Perezida Kagame yavuze ko ikibazo atari icy’u Bushinwa butanga inguzanyo, ahubwo ari icy’ibihugu bizisaba, ati: Rimwe na rimwe hari abantu bagiye bashinja u Bushinwa, bavuga ko ibihugu byagize ibyo bihabwa n’u Bushinwa, byafashe inguzanyo nyinshi, bikarangira biguye mu cyiswe umutego w’imyenda. Ahanini usanga atari ikosa ry’u Bushinwa!

Rimwe na rimwe bikwiye kuba bibonwa nk’ikibazo cy’uwafashe inguzanyo. Si inshingano z’u Bushinwa gutekerereza uwo bwagurije ngo bumusange buvuga buti urabona watse inguzanyo yo gukora iki, ukwiriye gukora ibi n’ibi, oya ni inshingano z’uwatse inguzanyo kumenya icyo yakira inguzanyo. Birashoboka ko baba baranasabye amafaranga yo gukoresha ibintu bizima ariko bikarangira badashoye imari mu buryo bukwiye maze ibintu bikagenda nabi. Sinkeka ko iki cyaba ikibazo cy’u Bushinwa.”

Muri iki kiganiro cyatangajwe ku wa Gatatu kuri CGTN Africa, Perezida Kagame yagaragaje uburyo u Bushinwa bwatanze umusanzu ukomeye mu rugendo rw’u Rwanda rwo guharanira kugera ku cyerekezo rwari rufite kuva mu mwaka 2000 kugeza mu 2020.

Ati: “Muri icyo gihe hari ibintu byinshi byakozwe, u Bushinwa bwagize uruhare mu guteza imbere ibikorwa remezo byacu, bwagize uruhare mu rwego rw’ubuzima, uburezi n’izindi nzego.”

Abajijwe ijambo rimwe rivuga ku mubano w’u Rwanda n’u Bushinwa mu myaka ishize yavuze ko ari ubwumvikane, yungamo ati: “Icyo nshaka gusobanura n’iryo jambo ni uko u Bushinwa buharanira kumva uruhande rwacu ndetse bugashaka gutera inkunga ibyo turimo gukora bumaze kumva ibyo dushaka. Tubasha kumenyesha u Bushinwa uko tubona ibintu n’ibyo dushaka n’aho twifuza ko bafasha.

Umunyamakuru yongeye kumubaza irindi jambo rimwe risobanura umubano yifuza kubona mu gihe kizaza  h’umubano w’u Rwanda n’u Bushinwa avuga “ukuramba” (sustainability).

Perezida Kagame yanabajijwe ikimuza mu mutwe bwa mbere iyo yumvise u Bushinwa nk’Umukuru w’Igihugu umaze gukorera uruzinnduko muri icyo gihugu inshuro esheshatu mu myaka 20 ishize, avuga ko atungurwa n’uburyo icyo gihugu cyavuye mu bihe bikomeye none ubu kikaba gifite ubuhangange ku rwego mpuzamahanga.

Ati: “Iyo urebye amateka, urebye ingorane buri gihugu cyose cyagiye gihangana na zo, ubasha gushima ibintu bimwe na bimwe. Ariko ibyo byose ni byo byagejeje u Bushinwa ku buhangange iki gihugu kigezeho. Bashoye imari mu bantu babo, bashora imari mu byiciro bitandukanye by’iterambere byaba ibikorwa remezo, mu kugeza uburezi ku baturage, iterambere ry’ikoranabuhanga… Ni ibintu ubona n’amaso yawe, urabyumva ndetse ukanabibamo.”

Yashimye abayobozi b’u Bushinwa bamaze imyaka myinshi bayoboye iki gihugu kuri ubu gituwe n’abaturage basaga miliyari 1.4 ariko igihugu kikaba gihora ku murongo, kirangwa n’urugendo ruhamye rw’iterambere, ahamya ko ari ikintu kitoroshye.

Perezida yavuze no ku ngingo y’uruhande rumwe rwigize nk’umupolisi w’Isi, aho rwumva abandi bose bagomba kugendera ku mabwiriza yarwo kandi bo badashobora kugira icyo baruvugaho, avuga ko aho bigeze u Rwanda rubyumva byaba ari ibitanga umusaruro rukabyigaho, byaba ari amatiku, uburyarya cyangwa kubogama rukabyirengagiza rugakomezanya n’umurongo warwo.

  • NTAWITONDA JEAN CLAUDE
  • Ukwakira 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE