RwandAir yatsindiye ibihembo 3 mu Bwongereza

  • NTAWITONDA JEAN CLAUDE
  • Nzeri 26, 2022
  • Hashize imyaka 2
Image

Sosiyete Nyarwanda ikora ubwikorezi bwo mu kirere (RwandAir), yatsindiye ibihembo bitatu birimo kuba yaje ku mwanya wa mbere mu kugira abakozi n’abapilote b’abanyamwuga muri Afurika.

RwandAir yasohokanye isheja mu bihembo mpuzamahanga ngarukamwaka bihabwa ibigo by’indege byatangiwe i London mu Bwongereza. 

Uretse igihembo cyo kuba ihiga izindi Sosiyete mu kugira abakozi n’abapilote b’indashyikirwa, RwandAir yanahawe igihembo cy’uko indege zayo zihorana umucyo n’isuku kurusha izindi muri Afurika .

RwandAir yaje ku mwanya wa mbere w’urutonde rw’ibindi bigo bitanga serivisi z’ubwikorezi bwo mu Kirere ku mugabane w’’Afurika 

Umuyobozi Mukuru wa RwandAir Yvonne Makolo, yagize ati: “Dutewe ishema cyane no kuba abakozi bacu bashimiwe na Skytrax kubera ubwitange bagaragaza. Twanejejwe no kumenya ko abakiliya bacu bahitamo kugurukana natwe kandi bakaba barabashije gutandukanya ireme rya serivisi dutanga n’iz’abandi.”

Itangwa ry’ibyo bihembo mpuzamahanga ryatangiye mu mwaka wa 1999 ubwo ikigo mpuzamahanga Skytrax cyatangizaga ubushakashatsi mpuzamahanga  ku buryo abakiliya banyurwa na serivisi z’ingendo zo mu Kirere. 

RwandAir ni kimwe mu bigo bikora kinyamwuga muri Afurika kandi bikora bifite icyerekezo cyo kurushaho kunoza serivisi kandi zigakomeza kujyana n’Igihe. 

Kuri ubu RwandAir igana mu byerekezo 28 mu bihugu 22 muri Afurika, u Burayi, mu Burasirazuba bwo Hagati ndetse n’Aziya. 

Ku rundi ruhande, Qatar Airways nk’umufatanyabikorwa ukomeye wa RwandAir, ni yo yaje ku mwanya wa mbere ku Isi yose. Ni umwanya  icyo kigo gitsindiye inshuro 7 zose, uyu mwaka kikaba cyakurikiwe na Singapore Airlines. 

Ubu bushakashatsi bwakozwe ku bigo birenga 350 bitanga serivisi z’indege ku Isi. Qatar na Singapore Airlines byahawe ibihembo  icyenda kuri buri kimwe, ari na byo byahize ibindi uko bikurikiranye. 

Ikindi kigo cyabikurikiye ni Delta Air yegukanye ibihembo bitandatu na Turkish Airlines yiganje mu bigo byahize ibindi i Burayi ikaba yatsindiye ibihembo 4.

  • NTAWITONDA JEAN CLAUDE
  • Nzeri 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE