Rwamagana: Abarokotse Jenoside barasaba inka zo korora

  • NSHIMIYIMANA FAUSTIN
  • Ugushyingo 21, 2023
  • Hashize amezi 6
Image

Abarokotse Jenoside yakorewe Abatutsi mu 1994 batujwe mu Mudugudu wa Nyagahinga mu Karere ka Rwamagana barasaba guhabwa inka zo korora bikabafasha kugira ubuyzima bwiza no kwiteza imbere.

Bamwe mu barokotse Jenoside yakorewe Abatutsi mu 1994 batujwe Nyagahinga mu Kagari ka Ruhunda mu Murenge wa Gishari mu myaka itandukanye, bagaragaza ikibazo cyo kuba nta nka bafite zishobora kubaha amata n’ifumbire yo gukoresha mu mirima yabo bavuga ko bibadindiza mu iterambere.

Mukantwari Chantal w’imyaka 61 yatujwe mu Mudugudu wa Nyagahinga mu 1999 yavuze ko bakeneye gukorerwa ubuvugizi bagahabwa inka zokorora bitewe nuko kwigurira amata aho batuye bibagora.

Yagize ati: “Ni ikibazo kuba dushaje nta mata tunywa kandi kuyigurira bikaba bitugora bitewe nuko litiro igura amafaranga y’u Rwanda 500. Ubu se nzahashya nte indwara zituruka ku mirire mibi kandi nta mata nywa n’umuryango wanjye. Icyo twifuza ni uko mwadukorera ubuvugizi Leta ikaduha inka zo korora tukabona n’ifumbire yo gukoresha mu mirima yacu.”

Mukantagara Esperance yagize ati, “Dukeneye gusaza tunywa ku mata kuko ni ikibazo kuyabona tuyiguriye. Twifuza ko baduha ikiraro rusange nkuko babigenjeje Kitazigurwa natwe tukorora kuko gusaza wifuza amata ukayabura biradushengura. Twajya tugerageza tukazitaho kuko dufite amasambu hirya no hino bityo twabasha kuzitaho”.

Umuyobozi w’Akarere ka Rwamagana, Mbonyumuvunyi Radjab yavuze ko hari impungenge n’imbogamizi zo kuba nta hantu bakororera gusa ngo abafite ubushobozi bashobora kugaragaza ko babasha korora inka bakwiye kugana ubuyobozi bw’akarere.

Yagize ati: “Uwazagaragaza ko afite ubushobozi bwo korora inka akabutwereka rwose twamufasha akabona inka yo korora ariko impungenge dufite ni uko uko imidugudu yubatse bigoranye kuko ntawufite aho yakubaka ikiraro, ntawe ufite aho yahinga ubwo bwatsi nkuko amabwiriza ya Gira inka abivuga gusa uwaba afite ubushobozi yazatwegera tuzayimuha nta kabuza.”

Senateri Habiyakare Francois, uri mu Ihuriro ry’abagize Inteko Ishinga Amategeko baharanira kurwanya ruswa (APNAC Rwanda), yavuze ko hari igisubizo gishoboka ku bafite amikoro make barokotse Jenoside kuko ngo bashobora kubakirwa ikiraro rusange cyangwa bagahabwa amatungo magufi bitewe nuko nayo yabafasha kwiteza imbere.

Yagize ati: “Hari aborokotse Jenoside benshi twasuye ahantu hatandukanye ariko kimwe mu bisubizo twabonye nuko amikoro aba ari make yo kuba babona aho bororera inka ahubwo bubakiwe ikiraro rusange bakororera hamwe byaba ari byiza kurushaho cyangwa se niba inka bigoye bakabaha amatungo magufi nk’ihene, inkoko n’andi ku buryo nabwo bayororera hamwe kuko kuyororera mu nzu babamo ntibikwiye ariko bayashyize aho abana bakinira bakajya bayahirira mu buryo rusange. Ibyo ni ibintu bakwiye kujyaho inama bagatumaho ubuyobozi bakabwereka imishinga bafite.”

Abarokotse Jenoside yakorewe Abatutsi mu 1994 batujwe mu Mudugudu wa Nyagahinga bagizwe n’imiryango irenga 30 baturutse mu bice bitandukanye.

FAUSTIN NSHIMIYIMANA

  • NSHIMIYIMANA FAUSTIN
  • Ugushyingo 21, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE