Ruhango: Hakiriwe ibibazo 656 birimo ibyakemuwe n’ibyahawe umurongo

  • NTAWITONDA JEAN CLAUDE
  • Nzeri 11, 2022
  • Hashize imyaka 2
Image

Abaturage bo mu Karere ka Ruhango barashima gahunda Akarere kihaye, aho abayobozi ku rwego rw’Akarere n’Imirenge, Utugari, Abagize inama y’umutekano n’ibindi bigo nka WASAC basanga abaturage aho batuye hagamijwe gukemura ibibazo byabo, mu cyumweru kimwe hakaba hamaze kwakirwa ibibazo 656, bimwe muri byo birakemuka ibindi bihabwa umurongo n’igihe ntarengwa cyo kubikemura.

Ibi aba baturage babigarutseho kuri uyu wa Gatanu mu Murenge wa Byimana mu Karere ka Ruhango, mu cyumweru cyihariye cyo kwakira no gukemura ibibazo by’abaturage mu kwezi kw’imiyoborere myiza, gifite insanganyamatsiko igira iti ‘Dutange serivise nziza, dukemura ibibazo by’abaturage ku gihe’.

Umubyeyi wari ufite ikibazo cyo kuba mu kubaka umuyoboro w’amazi hari aho byamwangirije, yavuze ko icyo kibazo cyahawe umurongo, kandi abyishimiye.

Musabyimana Potien wari ufite ikibazo cy’umukoresha utaramuhembye akaba afite ibirarane by’amezi arindwi, yasubijwe ko icyo kibazo kigiye kwigwaho bitarenze italiki ya 15 Ukwakira.

Yavuze ko kumanuka bakegera abaturage bibafasha ko umuturage atagomba gusiragira buri munsi, ashaka serivisi ngo ayibure.

Yongeyeho ko ubwo buryo bwo gukemura ibibazo byajya bikorwa nka gatatu mumwaka.

Niyirora Clemantine utuye mu Mudugudu wa Kamonyi, Akagari ka Kirengeri, Umurenge wa Byimana yavuze ko gahunda yo kwegera abaturage bakabatega amatwi bagakemura ibibazo byabo, ibafasha cyane.

Yagize ati: “Bifasha abaturage kubera yuko niba Meya ahagurutse akava ku Karere akaza hano mu Byimana, umuturage wagombaga gufata tike ijya mu Ruhango aba amuboneye hafi kandi agasubizwa. Tike wagakoresheje ujya mu Ruhango uba uyigabanyije.”

Ku rundi ruhande ariko yabajije ikibazo cy’uburenganzira bw’umwana yabyaye, ku mitungo ya se, kuko imirima yakamufashije kumurera yagurishijwe. Yahawe ibisobanuro birebana n’Uburyo bwamufasha gukemura icyo kibazo.

Umuyobozi w’Akarere ka Ruhango Habarurema Valens yasobanuriye abaturage ko nibakurikira neza, ibibazo byabo bibona igisubizo cya nyuma gishimishije.

Yagize ati: “Twiyemeje gukemura ibibazo by’abaturage tubasanze aho bari [….], si ngombwa ko buri wese yagera ku Karere. Buri wese yinigure agaragaze aho yagejeje ikibazo akaba atarakibonera igisubizo”.

Mu bibazo birenga 100, tumaze kubonamo 2 gusa  bisaba kwitabaza inzego zo hejuru. Icyizere ntituzongera kubona imirongo miremire ijya kubazwa Guverineri mu gihe twe tuba twatanze umurongo kandi umuturage avuga ko yanyuzwe”.

Umuyobozi w’Akarere ka Ruhango yibukije abaturage ko bajya bagisha inama mbere yo kujya mu nkiko kuko usanga baba batazi amategeko. Yabibukije kandi ko ibirego byageze mu nkiko bitagaruka ku Karere.

Yongeyeho ko batarangiza ikibazo bagendeye ku marangamutima, ko ari umunsi wo kukirangiza uyu munsi atari umwanya wo guhererekanya ikibazo nk’agapira. Ati: Dushaka ko ikibazo gikemuka mu buryo ndakuka”.

Yavuze kandi ko biyemeje gusanga abaturage aho bari, aho kugira ngo baze ku Karere, babazanire ibibazo babasanga ku Karere, babaruhura gukora ingendo ndende kuko bafite ubushobozi bwo kuba babegera, ni nazo nshingano zacu.

Mu Murenge wa Kinazi hahuriye Imirenge ya Kinazi, Mbuye na Ntongwe hakirwa ibibazo 149, mu Murenge wa Ruhango hakiriwe 45, mu Murenge wa Kabagari hahuriye Kabagari, Bweramana na Kinihira hakirwa ibibazo 223, naho mu Mirenge ya Mwendo na Byimana hakirwa ibibazo 239.

Meya yavuze ko iyi gahunda yo gusanga abaturage aho batuye ngo bagire inama abaturage banabigishe bateganya ko yajya ikorwa nibura gatatu mu mwaka, buri mezi ane ane, kuko ari abaturage ari n’ubuyobozi babonye ko iyi gahunda itanga umusaruro.

Mu gutega amatwi abaturage no gukemura ibibazo, taliki ya nyuma ku bitabonewe ibisubizo ako kanya ari iya 30 Ukuboza 2022.

  • NTAWITONDA JEAN CLAUDE
  • Nzeri 11, 2022
  • Hashize imyaka 2
TANGA IGITEKEREZO
Nzayisenga Janvier says:
Nzeri 12, 2022 at 9:39 am

Nanjye rwose mboneyeho gushimira cyane ubuyobozi bwacu bwa Ruhango ubonako tujyenda dutera imbere aho Valens atuyoboreye turanishimira amatara meza yo kumuhanda tumaze kubona n’ ibindi byinshi cyane DUKORANE UMURAVA DUTERE IMBERE

Andika igitekerezo

AMATEGEKO AGENGA IYANDIKA RY'IGITEKEREZO CYAWE