Rubavu: Abagabo 76 ni bo bamaze kuboneza urubyaro

  • NTAWITONDA JEAN CLAUDE
  • Ukwakira 9, 2022
  • Hashize imyaka 2
Image

Ubuyobozi bw’Akarere ka Rubavu buvuga ko abagabo bagera kuri 76 ari bo bamaze kuboneza urubyaro bifungisha  burundu (vasectomy).  Ni umubare buvuga ko  ukiri muto bitewe  n’uko hakiri imyumvire irimo n’ishingiye ku myemerere ikoma mu nkokora iyi gahunda ifatwa nka bumwe mu buryo bwo kurwanya imirire mibi n’igwingira. 

Bamwe mu  baturage baganiriye n’Imvaho Nshya bavuze ko hari   abumva  ko umugabo waboneje urubyaro atongera kuzuza inshingano nk’umugabo, hari abatinya ko babaha akato cyangwa kubahimba amazina, impungenge ku gusenyuka kw’ingo,… Hakaba hari n’abumva ko kuboneza urubyaro bireba abagore gusa.

Ni mu gihe abitabiriye iyi gahunda bo bavuga ko iriya myumvire ikwiye guhinduka.

Niyibizi Laurent wo mu Kagari ka Nengo, mu Murenge wa Rubavu ni umwe mu baboneje urubyaro, yavuze uko yafashe iki cyemezo.

Ati: “Twari tumaze kubyara abana umunani, noneho tujya inama n’umugore wanjye, ndamubwira nti ntawundi twarenzaho reka njyewe njye kwifungisha. Hari undi  mugabo wari waragiyeyo ni we wangiriye inama”.

Yongeyeho  ati: “ Nta kibazo rwose umuntu agira, gutera akabariro birakomeza kandi n’imibanire yanjye n’umugore ni myiza nubwo bamwe baba bavuga ko byakurura ubwumvikane buke. Kwifungisha ni ibintu byoroshye nta n’umwanya munini umara kwa muganga[…]. Iyo ntaza kuboneza urubyaro nari gukomeza kubyara abo ntashoboye kurera bigatuma bamwe banahura n’iyo mirire mibi n’igwingira”. 

Niyongabo Musa Dieudonné wo mu Kagari ka Buhaza we yatangaje ko kuboneza urubyaro yabyumvise biruhanyije ariko nyuma aza kubiganira n’umugore we bafata icyemezo bamaze kugira abana 4, kuko   n’uburyo umugore yari yaragerageje bwatumaga abyibuha bidasanzwe.

Yagize ati: “Nabanje kugira ubwoba ariko maze kwifungisha nta mpinduka zindi nabonye zigeze zimbaho zidasanzwe, hashize imyaka ibiri mboneje urubyaro. 

Umusaruro byarawutanze kuko umugore wanjye akigerageza buriya buryo  wabonaga hakora umuntu umwe ariko ubu yabashije gukora nanjye ndakora”. 

Uwayisaba Gloriose wo mu Kagari ka Buhaza ni umubyeyi  uvuga ko gahunda yo kuboneza urubyaro ikwiye kwitabirwa haba ku mugabo cyangwa se umugore.

Ati: “…umugabo yaboneje urubyaro akifungisha burundu ntabwo namuhinduka,  umugore n’umugabo bagomba kujya inama ku buryo bwo kuboneza urubyaro, njye mbona ari byiza bituma ukora neza gahunda zawe z’iterambere”.

Ishimwe Pacifique Umuyobozi w’Akarere ka Rubavu wungirije ushinzwe iterambere ry’imibereho myiza y’abaturage

Yakomeje agira ati: “Naboneje urubyaro, ubu mfite abana batatu, mbasha kubona uko mbakorera, nkabitaho, umuto w’imyaka ibiri mujyana mu irerero ngacungana n’uko amasaha yo gutaha agera kugira ngo aze gusanga imirimo nateguye nayikoze. Iyo utaboneje urubyaro ntubona uko wita ku bana  bawe neza n’ubushobozi bugera aho bugashira bamwe bakaba banahura n’imirire mibi n’igwinira”.

Ishimwe Pacifique Umuyobozi w’Akarere ka Rubavu wungirije ushinzwe iterambere ry’imibereho myiza y’abaturage yavuze ko bakomeje ubukanguramba kugira ngo kuboneza urubyaro byitabirwe.

Ati: “Ku bufatanye n’imiryango itandukanye twakoze ubukangurambaga, kandi twishimira ko abagabo baboneje urubyaro badufasha kugenda bahugura abandi binyuze mu biganiro”. 

Yongeyeho ati: “Ubundi kurwanya imirire mibi n’igwingira ni ibintu bikomatanyije; kuboneza urubyaro ni kimwe mu bidufasha, kuko iyo umuntu abyara indahekana, uretse n’amakimbirane no kubona ibihagije umuryango  biba imbogamizi bikaba intandaro y’iki kibazo”. 

Ibi binashimangirwa na Dusingize Clemence, umukozi w’Ikigo cy’Igihugu gishinzwe Ubuzima (RBC) ushinzwe ubukangurambaga ku bijyanye no kurwanya imirire mibi. 

Yagize ati: “ Hari igihe abantu baba bafite ubumenyi indyo yuzuye bazi kuyitegura, gahunda z’uturima tw’igikoni bazikora, ariko iyo bataboneje urubyaro usanga muri wa muryango munini ibitunga abana bitaboneka neza ugasanga na yo yaba intandaro nyamukuru yo kugira imirire mibi n’igwingira”.

Ubuyobozi bw’ Akarere ka Rubavu bugaragaza ko umubare w’ abagore baboneza urubyaro wo uri hejuru ; nk’ abari muri gahunda yihariye y’ Umushinga wo kurwanya imirire mibi n’ igwingira (SPRP) ni ibihumbi 7.

Raporo y’Ikigo cy’Igihugu gishinzwe Ibarurishamibare (NISR) ku bushakashatsi bwakozwe ku baturage n’ubuzima, igaragaza ko ubwitabire bwo kuboneza urubyaro ku bagore bubatse ingo mu Rwanda bwavuye kuri 53% muri 2014/2015 bugera kuri 64% muri 2019/2020.

Niyongabo Musa akangurira abandi bagabo kuboneza urubyaro
Uwayisaba Gloriose yavuze inyungu yabonye mu kuboneza urubyaro
  • NTAWITONDA JEAN CLAUDE
  • Ukwakira 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE