RSSB Tigers BBC na Patriots BBC zatangiranye intsinzi imikino ya kamarampaka

RSSB Tigers BBC na Patriots BBC zatangiye neza imikino ya kamarampaka (Playoffs) yo guhatanira igikombe cya Shampiyona y’Icyiciro cya Mbere muri Basketball y’abagabo, nyuma yo gutsinda imikino ya mbere ya ½ yabaye mu ijoro ryo ku wa Gatatu, tariki ya 5 Kanama 2026, muri BK Arena.

RSSB Tigers BBC yatsinze APR BBC amanota 97-82, mu gihe Patriots BBC yatsinze REG BBC amanota 84-75. Umukino wari utegerejwe na benshi wahuje RSSB Tigers BBC iheruka gukora amateka yo kwegukana BAL 2026 na APR BBC yari imaze kwegukana ibikombe bitatu bya shampiyona bikurikirana.

Amakipe yombi yatangiye umukino atsindana umusubirizo, Craig Randall wa APR BBC na Tyler Tarik Bey wa RSSB Tigers BBC bayobora bagenzi babo mu gutsinda amanota. Agace ka mbere karangiye amakipe yombi anganya amanota 22-22.

Mu gace ka kabiri, RSSB Tigers BBC yatangiye neza, ifata ikinyuranyo cy’amanota umunani (34-26), ibifashijwemo na Lars Licken Ishimwe na Antino Jackson.

Icyakora, APR BBC yagarutse mu mukino mu minota ya nyuma y’igice cya mbere ibikesha Ntore Habimana, Adonis Flier na Craig Randall, maze isoza igice cya mbere iyoboye n’amanota 46 kuri 43.

Mu gace ka gatatu, umukino wakomeje kwegerana, ariko Tyler Tarik Bey na Shema Osborn bafasha RSSB Tigers BBC kongera kuyobora, aka gace karangira ifite amanota 71 kuri 66 ya APR BBC.

Mu gace ka nyuma, RSSB Tigers BBC yakomeje gukina neza yongera ikinyuranyo cy’amanota ibifashijwemo na Tyler Tarik Bey na Zouzoua Nisre Mimi, mu gihe Craig Randall wa APR BBC wari usanzwe uzwiho gutsinda amanota atatu atabashije kugera ku rwego yari asanzweho.

Umukino warangiye RSSB Tigers BBC yegukanye intsinzi y’amanota 97-82, itangira neza urugendo rwo guhatanira igikombe cya shampiyona.

Tyler Tarik Bey ni we wabaye umukinnyi watsinze amanota menshi muri uyu mukino, aho yinjije amanota 39, akurikirwa na Leonard Craig Randall II wa APR BBC watsinze amanota 25.

Mu wundi mukino wa ½ wabaye kuri uwo mugoroba, Patriots BBC yatsinze REG BBC amanota 84-75, na yo itangira neza imikino ya kamarampaka. Indi mikino  ya ½ iteganyijwe ku wa Gatanu, tariki ya 7 Kanama 2026, muri BK Arena.