REMA yakomoje ku duce twa Pulasitiki tujya mu maraso tugatera Kanseri

  • NTAWITONDA JEAN CLAUDE
  • Kamena 5, 2023
  • Hashize amezi 12
Image

Ushobora kuba uri mu bantu bahora kwa muganga wivuza kanseri n’izindi ndwara zitandura udasobanukiwe n’uko zaje nyamara zikomoka ku mazi unywa cyangwa amafi urya byandujwe n’uduce tutaboneshwa ijisho twa pulasitiki (microplastics). 

Umuyobozi Mukuru w’Ikigo cy’Igihugu gishinzwe kubungabunga ibidukikije (REMA) Juliet Kabera, yahishuye iby’ubushakashatsi bwagaragaje ko utwo duce twa pulasitiki twanduza amaraso, ibihaha, abana bataravuka n’amashereka ku mubyeyi wonsa. 

Yakomeje agira ati: “Izo microplastic zigira uruhare mu gutera indwara zitandura ndetse usanga zivugwaho kuba ziteza kanseri zitandukanye.

Niba tuvuga ngo izo microplastic ziri no mu mafi, zikaba zava mu mafi tukazifata mu mafunguro zikajya mu mubiri, murumva ko zihuzwa no kuba zitera kanseri zitandukanye. 

Uko ufata nyinshi ni na ko n’ibyago byo kuba wakwandura kanseri byiyongera. Utwo duce tutaboneshwa n’amaso turi ahantu henshi; mu mazi, mu muyaga, mu butaka…”

Ubushakaskatsi bwakozwe ku bantu bakuru 22  na Heather Leslie, Umuhanga muri Siyansi wo mu Buholandi, bwagaragaje ko 17 muri bo bafite utwo duce mu maraso kandi nta wavuga ko nta ngaruka tugira ku buzima. 

Umuyobozi Mukuru wa REMA Juliet Kabera

Madamu Kabera avuga ko uburyo bwizewe bwo gukumira ibyago biterwa n’utwo duce twa Pulasitiki ari ukwanga gukoresha ibikoresho bya Pulasitiki, cyane cyane amasashi n’ibindi bikoreshwa rimwe kuko ari byo byanduza ibidukikije cyane. 

Yagaragaje ko nk’abantu bakoresha uducupa twa Pulasiti banywa amazi, bashobora gukira inyota ariko bamize twa duce twa Pulasitiki tugenda tukivanga n’amaraso maze tugateza ibyago byinshi.

Ati: “Murumva ko nihereyeho nkavuga nti oya ibi bintu ntabwo ngiye kubikoresha, mba ngize uruhare runini mu kubica ku isoko. Nk’ubu twaciye amasashi abantu bahahiramo ariko ntabwo biyabuza kwinjira binyuze muri magendu kuko abantu batari bavuga bati ntabwo turi bubikoreshe.”

Yasabye buri wese kubigira ibye kugira ngo ibyo bikoresho bigira ingaruka ku buzima no ku bidukikije bicike, kubera ko guhindura imyumvire ari wo musingi wo kubihashya burundu. 

Guhindura imyumvire ngo bizanafasha guca intege abakibyinjiza mu gihugu mu buryo bwa magendu kuko bazaba batakibona ababagurira, maze bahindukire banjye ku bicuruzwa byemewe. 

Minisitiri w’ibidukikije Dr Mujawamariya Jeanne d’Arc, na we yasabye Abanyarwanda guhuza imbaraga bakarwanya ibikoresho bya Pulasitiki bikoreshwa inshuro imwe nk’amacupa y’amazi, imiheha, ibiyiko, amakanya  n’ibindi byanduza amazi, ubutaka, umwuka duhumeka n’ubuzima bwa muntu by’umwihariko. 

Ministiri Dr Mujawamariya yagaragaje ko hari ibikoresho abantu bakoresha bisimbura ibyangiza ubuzima bwabo n’ubw’urusobe rw’ibinyabuzima. Ati: “Nimureke duhe ibidukikije umwanya wo guhumeka…”

Na we yashimangiye ko gukoresha ibikoresho bya pulasitiki biterwa no kwanga guhinduka kandi hari ibindi bikoresho abantu bakoresha bakabungabunga amagara yabo n’ibidukikije muri rusange. 

Ku Cyumweru taliki 4 Kamena 2023, hakozwe siporo rusange yahujwe n’ubukangurambaga burwanya ibikoresho bya Pulasitiki
Minisitiri w’Ibidukikije Dr. Mujawamariya Jeanne d’Arc ageza ijambo ku bitabiriye siporo rusange
  • NTAWITONDA JEAN CLAUDE
  • Kamena 5, 2023
  • Hashize amezi 12
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE