REG W BBC yatsinzwe, APR WBBC yongera kwitwara neza mu Mikino Nyafurika

  • Imvaho Nshya
  • Ugushyingo 1, 2023
  • Hashize amezi 4
Image

REGW BBC yatsinzwe na Kenya Ports Authority amanota 72-42, bigoranye APRW BBC itsinda Vijana Queens yo muri Tanzania amanota 67-57 mu mikino ya ‘’FIBA Africa Women Basketball League 2023’’ yabaye ku mugoroba wo kuri uyu wa Kabiri, tariki ya 31 Ukwakira 2023.

Umukino wahuje REG na Kenya Ports Authority watangiye iyi kipe yo muri Kenya isatira cyane, Madina Okot atsinda amanota menshi. REGW BBC yaje kwinjira mu mukino mu minota ya nyuma y’aka gace maze karangiye amakipe yombi anganya amanota 13-13.

Kenya Ports Authority yasubiye mu gace ka kabiri ifite imbaraga cyane, ari na ko Victoria Reynolds na Okot batsindaga amanota menshi.

Chelsea Jennings wa REG yagize amakosa abiri hakiri kare, bituma Umutoza Mukaneza Espérance atangira kumuzigama.

Iyi kipe yagowe no kubona amanota kuko Betty Kalanga usanzwe uyitsindira menshi muri iyi minota byari byamugoye.

Igice cya Mbere cyarangiye Kenya Ports Authority iyoboye umukino n’amanota 32 kuri 19 ya REG W BBC.

Agace ka gatatu karanzwe n’ishyaka ku mpande zombi abakinnyi nka Chelsea Jennings na Victoria Reynolds batsindira amakipe yabo.

Aka gace karangiye Kenya Ports Authority ikomeje kuyobora umukino n’amanota 49 kuri 35 ya REG WBBC.

Mu gace ka kane ikipe ya REG W BBC yakinnye nabi cyane agace ka nyuma kuko yagatsinzemo amanota arindwi gusa.

Ni mu gihe Kenya ports Authority yongereye ikinyuranyo ibifashijemo n’abakinnyi nka Victoria, Okot na Morgan Taylor Green batsinda amanota menshi cyane.

Umukino warangiye Kenya Ports yatsinze REG WBBC ikinyuranyo cy’amanota 30 (72-42), uba umukino wa mbere iyi kipe itsinzwe mu gihe iyi kipe yo muri Kenya itaratakaza umukino muri aya marushanwa.

Amakipe yombi arasubira mu kibuga kuri uyu wa Gatatu, tariki 1 Ugushyingo 2023, aho Kenya Ports Authority ikina na Nile Legends yo muri Sudani y’Epfo saa sita zamanywa, mu gihe REG WBBC ihura na JKL Lady yo muri Uganda saa tatu z’ijoro.

APR WBBC yabonye intsinzi ya kabiri

Umukino wa APR WBBC na Vijana Queens yo muri Tanzania watangiye wegeranye cyane amakipe yombi atsinda amanota menshi abifashijwemo na Tumaini Ndosi na Abigayle Jane Jackson.

Agace ka mbere karangiye APR WBBC iyoboye umukino n’amanota 18 kuri 17 ya Vijana Queens.

Mu gace ka kabiri iyi kipe yo muri Tanzania yatangiranye nyinshi mu gace ka kabiri itsinda amanota menshi, ikinyuranyo kigera kuri arindwi.

Mu minota ya nyuma y’aka gace,APR W BBC yongeye gutsinda amanota menshi.

Igice cya mbere kirangira Vijana Queens yigaranzuye APR W BBC iyitsinda amanota 31-30.

Mu gace ka gatatu amakipe yombi yakomeje kugendana kuko ikinyuranyo ntikirenge amanota atatu.

Mu gace ka nyuma, Ikipe y’Ingabo yiminjiriyemo ingufu yongera kuyobora umukino no gutsinda amanota menshi ibifashijwemo na Tetero Odile na Uwizeye Assouma.

Umukino warangiye APR WBBC yatsinze Vijana Queens amanota 67-57, iba intsinzi ya kabiri yegukanye muri iyi mikino Nyafurika y’abagore.

Amakipe yombi arasubira mu kibuga kuri uyu wa Gatatu, tariki 1 Ugushyingo 2023, Vijana Queens ikina na Gladiators y’i Burundi saa cyenda, mu gihe APRW BBC ikina na Equity Bank yo muri Kenya saa kumi n’ebyiri z’umugoroba. 

Iyi mikino yose ibera muri gymnasium ya Lycée de Kigali.

SHEMA IVAN

  • Imvaho Nshya
  • Ugushyingo 1, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE