RDF yafashe mu mugongo umuryango w’umusirikare wayo waguye muri CAR

  • NTAWITONDA JEAN CLAUDE
  • Nyakanga 11, 2023
  • Hashize amezi 11
Image

Ubuyobozi bw’Ingabo z’u Rwanda (RDF) bwashenguwe bikomeye n’inkuru y’inshamugongo y’umusirikare woherejwe mu butumwa bw’amahoro bw’Umuryango w’Abibumbye  muri Repubulika ya Santarafurika (MINUSCA) waburiye ubuzima mu gico cy’umutwe witwaje intwaro.

RDF yamaganye icyo gitero ndetse yihanganisha umuryango n’inshuti z’umusirikare w’u Rwanda waguye mu butumwa bwo guharanira amahoro y’abaturage b’Igihugu cy’amahanga.

Ku wa Mbere taliki ya 10 Nyakanga, ni bwo icyo gitero gitunguranye cyagabwe ku basirikare b’u Rwanda bari mu bikorwa byo gucunga umutekano mu bilometero 3 uvuye i Sam- Ouandja mu Ntara ya Haute- Kotto iherereye mu Majyaruguru y’Iburasurazuba bwa Repubulika ya Santarafurika (CAR)

RDF kandi yashimangiye ko nta cyakoma mu nkokora abasirikare boherejwe mu butumwa bw’amahoro biyemeje kurinda abasivili n’ibyabo byose, haba muri MINUSCA ndetse n’ahandi hose bari muri bikorwa byo kubungabunga amahoro.

Uwo mutwe wagabye igitero utaramenyekana wabuze abarwanyi bawo bahise  bahasiga ubuzima ndetse n’udi umwe afatwa akiri muzima, kuko Ingabo z’u Rwanda zahise zirwanaho ndetse zibasha kubasubiza inyuma.

Ubuyobozi  bw’Umuryango w’Abibumbye bwamaganye icyo gitero cy’ubugome kigamije guhungabanya umutekano w’abasivili, bugaragaza ko butazatezuka mu guharanira amahoro arambye. 

Intumwa y’Umunyamabanga Mukuru wa Loni muri Santarafurika akaba n’Umuyobozi wa MINUSCA Madamu Rugwabiza Valentine, yijeje ko ingabo zoherejwe kugarura amahoro muri icyo gihugu zitazatezuka ku nshingano zo kubungabunga amahoro no kurinda abasivili. 

Madamu Rugwabiza yagize ati: “Namaganye igitero cy’uyu munsi i Sam-Ouandja cyaguyemo umwe mu basirikare bacu. Ndashimira ubutwari no kwirwanaho guhamye kandi kwihuse kw’abasirikare b’u Rwanda bahise baburizamo icyo gitero bakarinda ubuzima bw’abasivili.”

Yakomeje ashimangira ko MINUSCA izakomeza guhagarara yemye mu gushyira mu bikorwa inshingano zayo zo kurinda abasivili ifatanyije n’abayobozi ba Repubulika ya Santarafurika.

Jean Pierre Lacroix, Umunyamabanga Mukuru wungirije ushinzwe ibikorwa byo kubungabunga amahoro ku Isi, yihanganishije Guverinoma y’u Rwanda, umuryango w’umusirikare wabuze ubuzima n’Abanyarwanda muri rusange ku bw’iyo nkuru y’inshamugongo. 

Yagize ati: “Igitero cy’ubugome cyagabwe ku Ngabo ziri mu Butumwa bwa Loni bwo kurinda abasivili no gukora ubutabazi, cyatwaye ubuzima bw’ingabo y’amahoro yavuye mu Rwanda. Ibitekerezo byanjye biri kumwe na Guverinoma n’abaturage b’u Rwanda, hamwe n’umuryango n’inshuti by’umusirikare wabuze ubuzima.”

Ubuyobozi bwa MINUSCA buvuga ko ingabo ziri muri ubwo butumwa zikomeje gukurikirana inyeshyamba zahungiye i Sam-Ouandja, aho guhera ku wa 5 Nyakanga ako gace kongerewe abasirikare  n’abapolisi bari mu butumwa bw’amahoro, haba mu Mujyi no mu nkengero zawo. 

Izo ngabo n’abapolisi bongerewe nyuma y’aho uwo mujyi wari wibasiwe n’igitero cy’inyeshyamba cyahitanye ubuzima bw’abaturage, ariko izo nyeshyamba zikaba zarahise zihunga umujyi nyuma yo kubona ko umutekano wakajijwe.

Ubuyobozi bwa MINUSCA bwaboneyeho gusaba abayobozi ba Santarafurika gukoresha uburyo bwose bushoboka mu gushakisha no kugaragaza abagabye ibitero ku ngabo z’amahoro maze bakagezwa imbere y’ubutabera mu maguru mashya. 

MINUSCA yibukije kandi ko kugaba igitero no kwica umusirikare uri mu butumwa bw’amahoro bw’Umuryango w’Abibumbye bifatwa nk’icyaha cy’intambara gihanwa n’amategeko y’Igihugu na mpuzamahanga. 

  • NTAWITONDA JEAN CLAUDE
  • Nyakanga 11, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE