Rayon Sports yaguze umunyezamu wo muri Cameroon 

Rayon Sports yatangaje ko yasinyishije umunyezamu ukomoka muri Cameroon, Junior Dande wakiniraga Canon Sportif de Yaoundé. Kuri uyu wa Gatatu, tariki ya 8 Nyakanga 2026, ni bwo Rayon Sports yanyujije ubutumwa ku mbuga nkoranyambaga zayo, itangaza ko yungutse Junior Dande.

Uyu mukinnyi w’imyaka 28 yanyuze mu makipe atandukanye arimo As Vita Club yo muri RDC kuva 2022 kugeza 2024, Sewe Sports yo muri Côte d’Ivoire na UMS de Loum y’iwabo muri Cameroon.  Yanakiniye ikipe y’Igihugu ya Cameroon mu byiciro bitandukanye birimo abatarengeje imyaka 20, 23 n’ikipe nkuru. 

Gusinya kwa Junior Dande muri Rayon Sports bishobora gushyira iherezo ku ahazaza ha Kwizera Olivier wagoranye mu kongera amasezerano. Uyu mukinnyi wa 13 uguzwe muri rusange nyuma ya Boris Gbenou wo muri Repubulika ya Centrafrique. Issa Djiguiba wo muri Mali, Ibrahim Djingarey wo muri Niger, Antonio Atisso Kodjo wo muri Bénin, Charles Tchouplaou wo muri Tchad na Matumona Wakonda Kanda wo muri RDC.

Ni mu gihe Abanyarwanda bashya ari Ndayishimiye Didier, Nshuti Didier Nisingizwe Christian, Nkundimana Fabio, Nizeyimana Mubarak na Muhoza Daniel. Rayon Sports ikomeje umwiherero uri kubera mu Karere ka Gicumbi, dore ko iyi kipe iri kwitegura irushanwa rya CECAFA Kagame Cup, CAF Confederation Cup n’andi y’imbere mu gihugu.

Mbere yo gukina aya marushanwa, iritegura umukino mpuzamahanga wa gicuti uzayihuza na Gor Mahia yo muri Kenya, uteganyijwe kuri Rayon Day izaba tariki ya 18 Nyakanga 2026.