Rally: Karan yegukanye RMGR 2022 bimwongerera amahirwe yo kwegukana shampiyona y’Afurika

Karan Patel ukomoka muri Kenya ni we wegukanye irushanwa mpuzamahanga ryo gusiganwa mu modoka “Rwanda Mountain Gorilla Rally 2022” ryabaga ku nshuro ya 22 kuva taliki 23 kugeza 25 Nzeri 2022.

Nyuma yo kwegukana iri rushanwa rya 5 ku ngengabihe ya shampiyona y’Afurika muri uyu mwaka wa 2022, Karan Patel  yongereye amahirwe yo kwegukana  iyi shampiyona  aho ahanganye  na Leroy Gomes ukomoka muri  Zambia.

Ku munsi wa 3 w’iri siganwa hakinwe uduce 4, muri utu duce, Karan Patel yegukanyemo 3 harimo  agace ka  Kamabuye 1, Kamabuye 2 ndetse na Gako B 2 mu gihe agace kandi kegukanwe na Jas Mangat ukomoka muri Uganda.

Utu duce twaje twiyongera ku duce 4, Karan Patel yari yegukanye ku munsi wa  kabiri na wo wari wabereye mu Karere ka Bugesera.

Leroy Gomes ni we wasoje umunsi wa mbere ayoboye isiganwa aho yarushaga amasegonda 13  Karan Patel wari uri ku mwanya wa kabiri.

Nyuma yo kwegukana agace ka 11 ka Kamabuye 2 (27.07 km), Karan Patel yahise afata umwanya wa mbere ku rutonde rusange aho yarushaga Leroy Gomes amasegonda 12.

Karan Patel nyuma y’agace ka 12   yasoreje muri rusange ku mwanya wa mbere aho muri kilometero 171.29  yakoresheje isaha 1, iminota 19 n’amasegonda 40.

Nyuma yo kwegukana iri siganwa, Karan yavuze ko ryari rikomeye gusa bwari ubwa kabiri aryitabiriye. Yakomeje avuga ko agiye gukomeza kwitegura irushanwa rya nyuma rizabera muri Zambia kugira ngo azagerageze kwitwara neza kuko byamuha amahirwe yo kwegukana shampiyona y’Afurika.

Ku mwanya wa kabiri haje Leroy Gomes ukomoka muri Zambia wahabwaga  amahirwe menshi yo kwegukana iri siganwa aho yakoresheje isaha 1, iminota 19 n’amasegonda 53.

Anwar Hamza ukomoka muri Kenya ni we waje ku mwanya wa gatatu akaba yarakoresheje isaha 1 iminota 21 n’amasegonda 21.

Abakinnyi b’u Rwanda basoje ni Gakwaya Jean Claude wasoreje ku mwanya wa 12 naho Kanangire Christian asoreza ku mwanya wa 13.

Giancarlo Davite ukina nk’Umunyarwanda wari wasoreje ku mwanya wa 9, ku munsi wa kabiri nta bwo yasoje isiganwa.

Miss Kalimpinya Queen wari ukinnye isiganwa mpuzamahanga ku nshuro ya mbere atwaye “Drive” aho yari afatanyije na Ngabo Olivier nta bwo yasoje isiganwa kuko yavuyemo hasigaye agace kamwe ngo isiganwa risozwe.

Miss Kalimpinya yatangaje ko irushanwa ryari rikomeye ariko kuba ari ubwa mbere yari akinnye atwaye byamushimishije kandi ko hari amasomo menshi yize.

Akomeza avuga ko ubusanzwe yakundaga gutwara ariko atari afite gahunda yo kuzakina amasiganwa nk’aya “Rally”. Miss Kalimpinya asobanura ko yatangiye gukina muri 2019 ariko afasha umushoferi “Co-Drive” nyuma afata umwanzuro  wo  gutwara.

Uwo bafatanyaga, Ngabo Olivier yavuze ko bavuyemo ku gace kabanziriza aka nyuma bitewe nuko imodoka yabatengushye aho yagize  ikibazo ikaguma muri Vitesi ya 2 bituma amasaha abafata bavamo. Ati : “Nta bwo byatunaniye ahubwo ni ikibazo cy’imodoka”.

Perezida w’ishyirahamwe ry’umukino  wo gusiganwa mu modoka mu Rwanda “RAC”, Gakwaya Christian  yatangaje ko irushanwa  muri rusange ryagenze neza  kuva ku musi wa mbere kugeza risojwe. Ati : “Iyo nta mpanuka yabaye biba ari byiza.”

Yakomeje avuga ko bishimira ko hasoje imodoka nyinshi (14) kandi ko byageze mu duce twa nyuma hakirimo guhangana ku bahataniraga kwegukana isiganwa.

Gakwaya avuga ko muri gahunda bafite harimo kongera umubare w’abakinnyi b’Abanyarwanda ndetse bakongera n’amasiganwa mpuzamahanga akaba menshi.

Isiganwa rya nyuma  ni ryo rizerekana uzegukana shampiyona y’Afurika 2022

Iri rushanwa mpuzamahanga “Rwanda Mountain Gorilla Rally 2022” ryari ribaye ku nshuro ya 22 akaba yari iya 6 rishyizwe ku ngengabihe y’amarushanwa atanga amanota ku bakinnyi begukana shampiyona y’Afurika “FIA African Rally Championship”.

Umwaka ushize wa 2021,  Carl Tundo ukomoka muri Kenya yegukanye iri siganwa anahita yegukana shampiyona y’Afurika 2021.

Uyu mwaka si ko byagenze  kuko Leroy Gomes wari ku mwanya wa mbere n’amanota 102  atabashije kwegukana irushanwa.  Karan Patel nyuma yo kweguna “Rwanda Mountain Gorilla Rally 2022” yahise yongera amahirwe yo kuba yakwegukana shampiyona y’Afurika  aho bizamenyekana nyuma y’irushanwa rya 6 ari na ryo rya nyuma rikazabera muri Zambia taliki 21 kugeza 23 Ukwakira 2022.

Nyuma y’iri siganwa ryo mu Rwanda, Leroy Gomes (Zambia) ayoboye  urutonde rw’Afurika  “FIA African Rally 2022” n’amanota 126 akurikiwe na Karan Patel (Kenya) n’amanota 105 naho ku mwanya wa 3 haza Anwar Hamza (Kenya) ufite amanota 55 akaba anganya na Jeremy Wahome (Uganda) naho ku mwanya wa 5 hari Jas Mangat (Uganda) ufite amanota 49.

Kugira ngo Patel Karan azegukane shampiyona y’Afurika ni uko azegukana iri rushanwa rya nyuma ryo muri Zambia ariko bigasaba ko Leroy Gomes  atazaba yasoreje mu bakinnyi 8 ba mbere. Leroy Gomes  uzaba ari gukinira mu rugo arasabwa gusa gusoreza mu bakinnyi 8 ba mbere kuko akeneye amanota 10 gusa.

Umukinnyi w’u Rwanda uri kuri uru rutonde ni Giancarlo Davite akaba ari ku mwanya wa 7 n’amanota 38. Mbere y’iri siganwa akaba yari ari ku mwanya wa 3.