Rally 2022 : Leroy Gomes ni we uyoboye isiganwa  nyuma y’umunsi wa kabiri

  • Imvaho Nshya
  • Nzeri 24, 2022
  • Hashize imyaka 2
Image

Leroy Gomes ukomoka muri Zambia  ni we uyoboye irushanwa  mpuzamahanga ryo gusiganwa mu modoka “Rwanda Mountain Gorilla Rally 2022” nyuma y’umunsi wa kabiri

Iri siganwa ryatangiye ku wa Gatanu taliki 23 Nzeri 2022 hakinwa  agace ko kwiyereka  “Super Stage” kuri Kigali Convention Centre  maze Karan Patel ukomoka muri Kenya asoza ari ku mwanya wa mbere.

Ku munsi wa kabiri w’iri siganwa  ririmo gukinwa ku nshuro 22 akaba ari iya 6 rigiye ku ngengabihe ya shampiyona y’Afurika, taliki 24 Nzeri 2022 imodoka 19 ni zo zitabiriye intera ya mbere  yakiniwe mu Karere ka Bugesera   i Gako, Gasenyi, Nemba na Ruhuha.

Abasiganwa bakinnye uduce  “Stage”  turindwi aho basoje bakoze intera ya kilometero 100,35.

Umukinnyi Leroy Gomes ukomoka muri Zambia akaba  anayoboye urutonde rwa shampiyona y’Afurika muri uyu mwaka wa 2022 ni we wasoje ari ku mwanya wa mbere  aho amaze gukoresha iminota 47 n’amasegonda 33. Gomes yegukanye uduce tubiri muri 7 twakinwe. Yegukanye agace ka 1  “Gako 1” n’aka 5 “Gasenyi 1”.

Ku mwanya wa kabiri hari Patel Karan ukomoka muri Kenya umaze gukoresha iminota 47 n’amasegonda 46. Patel Karan yegukanye uduce 4 harimo agace ka 2 “Gasenyi 1”, aka 4 “Gako 2”, aka 6 “Nemba 2” n’aka 7 “Ruhuha 1”.o

Ku mwanya wa 3 hari Anwar Hamza ukomoka muri Uganda umaze gukoresha iminota 48 n’amasegonda 45.

Umukinnyi w’Umunyarwanda uri hafi ni Giancarlo Davite uri ku mwanya wa 9 aho amaze gukoresha iminota 54 n’amasegonda 07.

Miss Kalimpinya Queen ari ku mwanya wa 17 aho amaze gukoresha isaha 1 n’iminota 15.

Imodoka zitasoje umunsi kabiri  ni 2 zirimo  iya Bwette Sameul ufatanya na Nsamba Aaron (Uganda) yavuyemo ku gace ka mbere ndetse n’imodoka ya  Mayaka Julien (Rwanda)  ufatanya na Salim Abdallah (Burundi) yavuyemo nyuma y’agace ka 4.

Isiganwa rirasozwa kuri iki Cyumweru

Kuri iki Cyumweru taliki 25 Nzeri 2022 ni bwo isiganwa risozwa hakinwa intera ya 2 ikinirwe Kamabuye na Gako.

  • Imvaho Nshya
  • Nzeri 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE