PSF yiyemeje gukora cyane no gusora neza mu kubaka u Rwanda

  • NTAWITONDA JEAN CLAUDE
  • Ugushyingo 19, 2022
  • Hashize umwaka 1
Image

Urugaga rw’Abikorera mu Rwanda (PSF) rwatangaje ko rugiye gukora birushijeho mu rwego rwo guteza imbere Igihugu nk’uko byagarutsweho na Perezida wa PSF Bafakulera Robert, mu muhango wo gushimira abasora neza kuri uyu wa Gatandatu tariki 19 Ugushyingo 2022.

Bafakulera avuga ko aho abikorera bageze babikesha ubuyobozi bwiza bw’Igihugu n’inama budahwema kugira abikorera kugira ngo bashobore gutera imbere.

PSF ishimira Ubuyobozi bw’Ikigo cy’Imisoro n’Amahoro (RRA) kuri gahunda nziza yo gushimira abasora bizihijwe ku nshuro ya 20.

Ukwezi kwahariwe abasora ni uburyo bwiza bwo guhuza abasora n’Ikigo cy’Imisoro n’Amahoro, bakarebera hamwe uko abasora bitabira ibikorwa byo gusora, imbogamizi bahura na zo ndetse bakakira n’ibyifuzo byabo.

Urugaga rw’Abikorera mu Rwanda rushima uko Abasora bagiye bahindura imyumvire bakumva ko gusora atari agahato ahubwo ari inshingano ku munyarwanda wese ukunda igihugu.

Aha ni ho Bafakulera, Perezida wa PSF, ahera agira ati “Intego yacu ni ukurushaho gukora cyane, kugira ngo koko ibikorwa byacu biteze imbere igihugu cyacu”.

Akomeza avuga ati: “Gusora neza kandi ku gihe ni inshingano zacu, kubikora uko bikwiriye bikaba bidufasha kubaka u Rwanda twifuza.

Intambwe yatewe mu gihugu cyacu ntiteze gusubira inyuma, ni cyo gituma natwe tutazatezuka ndetse n’ababifitemo intege nke tuzajya tubahwitura”.

Bafakulera avuga ko mu rwego rwo kurushaho gukangurira abikorera kuba inkingi y’iterambere ry’igihugu, Urugaga  rwitoreye inzego guhera ku Kagari kugera ku rwego rw’igihugu.

Izi nzego zubatswe hagendewe ku nkingi zirimo Serivisi, inganda, ubucuruzi, ubuhinzi ndetse n’urwego rwihariye rurimo abagore, urubyiruko n’abafite ubumuga.

Urugaga kandi rushishikariza abikorera guhuza imbaraga kugira ngo babashe kugera ku bikorwa binini (Collective Investments) kandi ngo aho byakozwe neza, byashoboye gutanga umusaruro, biteza imbere abishyize hamwe ndetse n’igihugu muri rusange.

Ku bufatanye n’Ikigo cy’imisoro, abikorera bubakirwa ubushobozi kugira ngo barusheho kumenya uko imenyekanisha ndetse no gutanga imisoro bikorwa.

Ati: “Dushimira Ikigo cy’Imisoro n’Amahoro kubera ubufatanye mu guhugura abikorera.

Twishimira kandi n’ikoranabuhanga ridufasha mu buryo bwose, nubwo hari bamwe bagihura n’imbogamizi mu gukoresha iri koranabuhanga, tukaba dusanga amahugurwa akwiriye kujya abaho kenshi kugira ngo abantu barusheho gusobanukirwa ibijyanye no gukoresha ikoranabuhanga, cyane cyane gukoresha EBM”.

Urugaga rw’Abikorera mu Rwanda rusaba ko habaho ubukangurambaga ku mategeko n’amabwiriza arebana n’imisoro kugira ngo abikorera bashobore kugira amakuru ahagije ku birebana n’imisoro.

PSF igaragaza ko mu gihe ubufatanye bw’Ikigo cy’Imisoro n’Amahoro n’abasora bukomeje gutya, idashidikanya ko igipimo cy’umusaruro uva mu misoro kizakomeza kuzamuka.

Insanganyamatsiko y’uyu mwaka iragira iti ‘Dusore neza, twubake u Rwanda twifuza’. 

  • NTAWITONDA JEAN CLAUDE
  • Ugushyingo 19, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE