Perezida w’Angola yitezwe mu Rwanda aje kuruhuza na RDC

Perezida wa Repubulika y’Angola João Manuel Goncalves Lourenço yitezwe i Kigali mu ruzinduko ruri muri gahunda y’ibikorwa by’ubuhuza bigamje gukemura amakimbirane ya Politiki akomeje gufata indi ntera hagati y’u Rwanda na Repubulika Iharanira Demokarasi ya Congo (RDC). 

Umubano w’ibihugu byombi wajemo agatotsi ubwo inyeshyamba z’Abanyekongo za M23 zongeraga kubura intwaro zivuga ko zirimo guharanira uburenganzira bw’abenegihugu bavuga Ikinyarwanda, by’umwihariko abo mu bwoko bw’Abatutsi bahohoterwa bitwa Abanyarwanda. 

Leta ya Congo yo yahise ivuga ko yatewe n’u Rwanda, imvugo ishimangira impungenge izo nyeshyamba zagaragaje aho zifuza kugirana ibiganiro n’abagize Guverinoma kugira ngo abo baturage na bo babone uburenganzira bakwiye mu Gihugu cyabo. 

Uruzinduko rwa Lourenço ruje rukurikira inama iherutse guhuriza Abakuru b’Ibihugu bitatu by’Umuryango w’Afurika y’Iburasirazuba (EAC) yiga kuri iki kibazo, ndetse n’iyahuje ba Minisitiri b’Ububanyi n’Amahanga b’u Rwanda na RDC ku buhuza bw’uw’Angola.

Ba Minisitiri basoje inama bemeranyijwe  ko ibibazo by’umutekano muke mu Burasirazuba bwa RDC bigomba gukemuka binyuze mu biganiro. 

Abo baminisitiri banahuye na Perezida Lourenço wabahaye icyerekezo cy’uburyo uburyo umubano w’u Rwanda na RDC wakongera kuzahurwa nk’ibihugu by’abaturanyi bisangiye imipaka n’amateka menshi.

Biteganyijwe ko Perezida Lourenço nagera i Kigali ahura na Perezida wa Repubulika y’u Rwanda Paul Kagame mu rwego rwo gukomeza inshingano ze nk’umuhuza w’ibihugu byombi.

Mu gihe Guverinoma ya RDC ishinja u Rwanda gutera inkunga inyeshyamba za M23 ndetse ikaba itanatinya kuvuga ko ari u Rwanda ruyihishe inyuma, Guverinoma y’u Rwanda yamagana ibyo binyoma bigamije guhunga ibibazo nyakuru Igihugu gihanganye na cyo igashimangira ko ahubwo itewe impungenge na FARDC yifatanyije n’umutwe w’iterabwoba wa FDLR washinzwe n’abasize bahekuye u Rwanda.

Ubutumwa bwatanzwe na Perezidansi y’Angola, bushimangira ko imbaraga João Lourenço akomeje gushyira mu bikorwa by’ubuhuza igamije kugabanya umwuka mubi wavutse hagati y’ibihugu byombi waje kuvamo nokuba Ambasaderi w’u Rwanda muri icyo gihugu yarahambirijwe.

Undi witabira iyo nama ni Amb Tete Antonio, indorerezi ihoraho y’Umuryango w’Afurika Yunze ubumwe (AU), waraye ageze i Kigali ku mugoroba wo ku wa Kane. Biteganyijwe ko aza mu biganiro mu bubasha afite nk’Umuyobozi w’Inama Nkuru y’Abaminisitiri bo mu Bihugu bigize Inama Mpuzamahanga y’Akarere k’Ibiyaga Bigari (ICGLR).

Ku rubuga rwa twitter, Antonio yagize ati: “Iteka nishimira kuba hano (mu Rwanda)”

Biteganyijwe kandi ko Perezida Lourenço aza kuganira n’Umuryango w’abagize Diaspora y’Angola mu Rwanda mu gihe hakorwa ibirori byo kwizihiza isabukuru ya 47 y’Ubwigenge kuri uyu wa Gatanu taliki ya 11 Ugushyingo 2022.