Perezida wa IRMCT yasuye inzibutso za Jenoside 4 mu Rwanda

  • NTAWITONDA JEAN CLAUDE
  • Nzeri 9, 2022
  • Hashize imyaka 2
Image

Perezida w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) Graciela Gatti Santana, yasoje uruzinduko rwe rwa mbere agiriye mu Rwanda asuye inzibutso za Jenoside enye, asobanurirwa amateka ndetse anunamira abasaga miliyoni bishwe muri Jenoside yakorewe Abatutsi.

Umucamanza Graciela Gatti Santana yatangiye kuyobora IRMCT guhera taliki ya 1 Nyakanga 2022, akaba ayoboye urwo rwego rwashyiriweho gukurikirana ibibazo by’ubutabera byasizwe n’Urukiko Mpuzamahanga rwashyiriweho u Rwanda (ICTR) rwashyiriweho kuburanisha imanza z’abakekwaho Jenoside biganjemo abahoze ari abayobozi n’abasirikare bakuru muri Guverinoma yateguye ikanashyira mu bikorwa Jenoside yakorewe Abatutsi.

Muri uru ruzinduko rw’iminsi ine, Umucamanza Graciela Gatti Santana yatangiye asura Urwibutso rwa Jenoside rwa Kigali aho yashyize indabo ku mva ziruhukiyemo abasaga 250,000 bishwe muri Jenoside yakorewe Abatutsi.

Yanasuye kandi urwibutso rwa Nyamata n’urwa Ntarama ziherereye mu Karere ka Bugesera, yunamira inzirakarengane zazize Jenoside ziharuhukiye, anasobanurirwa amateka yihariye ya jenoside yakorewe muri ako Karere.

Kuri uyu munsi wa nyuma w’uruzinduko rwe, Umucamanza Graciela Gatti Santana yasuye Urwibutso rwa Nyanza ya Kicukiro, aherekejwe na Perezida w’Umuryango IBUKA uharanira inyungu z’abacitse ku icumu rya Jenoside Egide Nkuranga, n’abahagarariye amashyirahamwe y’abarokotse Jenoside yakorewe Abatutsi.

Graciela Gatti Santana mu Rwibutso Jenoside rwa rwa Kigali

Perezida wa IRMCT yanahuye n’abayobozi bakuru mu nzego za Guverinoma ndetse no mu rwego rw’ubutabera. Mu bamwakiriye mu biro harimo Minisitiri w’Ubutabera akaba n’Intumwa Nkuru ya Leta y’u Rwanda Dr. Emmanuel Ugirashebuja, Minisitiri w’Ubumwe n’Inshingano Mboneragihugu Dr. Jean‑Damascène Bizimana na  Minisitiri w’Ububanyi n’Amahanga n’Ubutwererane Dr. Biruta Vincent.

Mu bandi bayobozi bamwakiriye harimo Visi Perezida w’Urukiko rw’Ikirenga Marie Thérèse Mukamulisa, Perezida w’Urukiko rw’Ubujurire François Regis Rukundakuvuga n’Umushinjacyaha Mukuru wa Repubulika y’u Rwanda Aimable Havugiyaremye hamwe n’itsinda ayoboye.

Ibiganiro yagiranye n’abayobozi bo mu Rwanda  byibanze ku mishinga IRMCT ishyize imbere n’ibikorwa irimo gukora ubu, akaba yashimye uburyo u Rwanda rwiyemeje gushingira ubuzima bw’Igihugu ku bwiyunge, kurwanya Jenoside n’ingengabitekerezo yayo, no kudatezuka ku gukomeza guha icyubahiro abazize Jenoside yakorewe Abatutsi.

Izindi ngingo zagarutsweho mu biganiro yagiranye n’inzego zitandukanye, harimo n’urubanza rwa Félicien Kabuga kuri ubu ruri mu maboko ya IRMCT. Yagaragaje aho urwo rubanza rugeze hashingiwe ku byaha yashinjwaga na ICTR ndetse n’ibyo u Rwanda rumukurikiranyeho.

Perezida wa IRMCT Gatti Santana yashimiye u Rwanda rudatezuka na rimwe mu gushyigikira ibikorwa by’uru rwego umubano n’ubufatanye buhorabo bisigasirwa umunsi ku wundi.

Yanaboneyeho gushimangira ko na we atazatezuka mu kurushaho gushimangira umubano IRMCT ifitanye na Guverinoma y’u Rwanda n’Abanyarwanda, mu gihe cyose azamara ku buyobozi bw’urwo rwego

Perezida Gatti Santana yafashe umwanya wo kumenyana no kuganira n’abakozi ba IRMCT mu Rwanda, aho yanasobanuriwe byimbitse imirimo yihariye y’Ishami ry’uru rwego i Kigali.

Mu Rwibutso rwa Jenoside rwa Nyamata
Ku Rwibutso rwa Jenoside rwa Ntarama
Ku Rwibutso rwa Jenoside rwa Nyanza ya Kicukiro
  • NTAWITONDA JEAN CLAUDE
  • Nzeri 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE