Perezida Tshisekedi yongeye gushinja u Rwanda gutera RDC mu izina rya M23

  • NTAWITONDA JEAN CLAUDE
  • Nzeri 21, 2022
  • Hashize umwaka 1
Image

Ibirego bya Repubulika Iharanira Demokarasi ya Congo (RDC) ku Rwanda ko ari rwo ruteza umutekano muke mu Burasirazuba bw’icyo gihugu bikomeje kwiyongera, mu gihe ako gace kabarurwamo imitwe yitwaje intwaro isaga 130. 

Mu Nteko Rusange y’Umuryango w’Abivumbye iteranye ku nshuro ya 77 (UNGA)  Perezida wa Repubulika ya Demokarasi ya Congo Félix Antoine Tshisekedi Tshilombo, yongeye gushinja u Rwanda “ubushotoranyi kuri RDC mu izina ry’umutwe w’inyeshyamba za M23. 

Muri iyo Nteko Rusange iteraniye i New York muri Leta Zunze Ubumwe z’Amerika, Tshisekedi yavuze ko nubwo bafite ubushake bwo kubana mu mahoro n’abaturanyi, u Rwanda rubirengaho rugakora ubushotoranyi bwitwaje intwaro bwahindutse ibikorwa by’iterabwoba mu Burasirazuba bwa RDC. 

Nyuma yo gutangaza ayo magambo, abasesenguzi mu bya Politiki batandukanye bakomeje gutanga ibitekerezo bigaragaza uburyo gushinja u Rwanda kugira uruhare mu bibazo bya RDC ari uguhunga inshingano zo kurandura umuzi w’igiteza umutekano muke muri icyo Gihugu. 

Tshisekedi yavuze ko kuva mu kwezi kwa Werurwe uyu mwaka, u Rwanda rwongeye gushotora igihugu cye binyuze mu  gufasha umutwe w’inyeshyamba wa M23 mu buryo bw’ibikoresho n’abasirikare, rurenze ku mahame shingiro ya Loni n’ay’umuryango w’Ubumwe bw’Afurika (AU/UA).

Nyamara uretse kuba ibyo bihera mu magambo gusa, ndetse bikaba ari n’indirimbo imaze imyaka ikabakaba 10, nta gihamya ifatika Guverinoma ya RDC igaragaza ko u Rwanda ari rwo rutera inkunga uwo mutwe washinzwe n’Abanyekongo biganjemo abo mu Bwoko bw’Abatutsi bamburwa uburenganzira ku gihugu n’ubutaka bwa ba sekuruza. 

Tshisekedi yagize ati: “Namaganye nivuye inyuma, [ndi] hano hantu hafite igisobanuro gikomeye ku buzima bw’Isi, ubu bushotoranyi bwa kenshi igihugu cyanjye gikorerwa n’umuturanyi wacyo u Rwanda rwihishe mu mutwe w’iterabwoba witwa M23”.

Yongeyeho ko uruhare rw’u Rwanda mu makuba Abanyekongo babayemo mu bice avuga ko igisirikare cyarwo kigaruriye, n’urwa M23 ifatanyije na cyo, “rutakigibwaho impaka”.

Leta y’u Rwanda yakomeje kugaragaza ko ibyo birego bidafite ishingiro ndetse inakomoza ku cyaba igisubizo gitanga umuti urambye kuri ibyo bibazo. 

Ivuga kandi ko nta nyungu n’imwe u Rwanda rwaba rufite mu kwivanga mu bibazo by’Abenegihugu banze kumvikana ku burenganzira basangiye ku gihugu cyabo. 

Uretse kuba u Rwanda rubihakana kandi, n’Umutwe wa M23 wemeza ko iyo uza kubona inkunga y’u Rwanda utari kumara igihe kinini utaragera i Kinshasa. 

Kuva ku italiki ya 13 y’ukwezi kwa Kamena 2022, umutwe wa M23 ugenzura umujyi wa Bunagana wo mu Ntara ya Kivu y’Amajyaruguru kugeza  hafi y’umupaka wa RDC na Uganda, ukaba warigaruriye n’utundi duce tumwe two muri iyo Ntara.

  • NTAWITONDA JEAN CLAUDE
  • Nzeri 21, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE