Kenya: Perezida Kagame yitabiriye umusangiro wateguwe na William Ruto 

Perezida wa Repubulika y’u Rwanda, Paul Kagame yifatanyije n’abandi Bakuru b’Ibihugu mu musangiro wateguwe na Perezida wa Kenya William Ruto na Madamu Rachel Ruto, bagamije guha icyubahiro Abakuru b’Ibihugu na Guverinoma bitabiriye Inama ihuza u Bufaransa n’ibihugu bya Afurika (Africa Forward Summit). Bikubiye mu Butumwa bwatangajwe n’Ibiro by’Umukuru w’Igihugu Village Urugwiro binyuze mu itangazo bashyize hanze mu Ijoro  ryo ku wa 11 Gicurasi 2026. 

Ubwutumwa bwashyizwe hanze buragira buti: “Perezida Kagame yifatanyije n’abandi Bakuru b’Ibihugu mu musangiro wateguwe na Perezida William Ruto na Madamu we Rachel Ruto mu rwego rwo guha icyubahiro Abakuru b’Ibihugu na Guverinoma bitabiriye Inama yiswe ‘Africa Forward Summit.’”

Biteganyijwe ko kuri uyu wa Kabiri, Perezida Kagame ayobora ikiganiro ku ikoreshwa ry’ikoranabuhanga rigezweho ririmo ubwenge buhangano (AI), anageze ijambo ku bayobozi b’ibigo byo muri Afurika n’u Bufaransa rijyanye n’ibikorwa by’inganda bitangiza ibidukikije n’ikoreshwa ry’ingufu zidahumanya ikirere.

Iyi nama y’iminsi ibiri iteraniye i Nairobi, yitabiriwe n’abarenga 4,000 baganira ku bufatanye bwa Afurika n’u Bufaransa mu guteza imbere ibiganiro, ubucuruzi, ishoramari, guhanga ibishya ndetse n’iterambere rirambye.