Perezida Kagame yifatanyije mu kababaro na UAE yapfushije Perezida

  • NTAWITONDA JEAN CLAUDE
  • Gicurasi 24, 2022
  • Hashize imyaka 2
Image

Perezida wa Repubulika y’u Rwanda Paul Kagame, uri i Davos mu Busuwisi aho yitabiriye Inama y’Ihuriro Mpuzamahanga ku Bukungu (WEF), yatanze ubutumwa bwihanganisha Perezida uriho n’abaturage ba Leta Zunze Ubumwe z’Abarabu (UAE) muri ibi bihe bitoroshye bari mu cyunamo cy’iminsi 40 nyuma y’urupfu rw’uwari Perezida Sheikh Khalifa bin Zayed al-Nahyan.

Perezida Kagame yavuze ko u Rwanda rwifatanyije mu kababaro na Perezida Sheikh Mohamed bin Zayed bin Sultan Al Nahyan GCMG n’abaturage ba UAE, ashimangira ko Abanyarwanda bazakomeza kwibuka Sheikh Khalifa wari inshuti y’u Rwanda, binyuze mu kurushaho kwimakaza umubano mwiza hagati y’ibihugu byombi.

Ubwo butumwa bwo kwihanganisha UAE Perezida Kagame yabwoherereje Perezida wa UAE akaba n’Umuyobozi wa Abu Dhabi Sheikh Mohamed bin Zayed bin Sultan Al Nahyan GCMG, ari na we wari usanzwe ayoboye iki gihugu mu gihe Sheikh Khalifa yari asigaye ari Perezida w’icyubahiro gusa kubera uburwayi bwa stroke bwamuzahaje guhera mu 2014.

HH Sheikh Khalifa yashizemo umwuka taliki ya 13 Gicurasi 2022 agejeje ku myaka 73 y’amavuko, igihugu gihita cyinjira mu cyunamo cy’iminsi 40 aho ibendera ry’Igihugu ryamanuwe muri kimwe cya kabiri muri Leta z’Abarabu zose.

Ku wa Mbere taliki ya 23 Gicurasi, ni bwo Perezida Kagame yatanze ubwo butumwa bwo gukomeza abaturage abinyujije mu Munyamabanga wa Leta muri Minisiteri y’Ububanyi n’Amahanga ya UAE Sheikh Shakhboot Bin Nahyan Al Nahyan, ubwo bagiranaga ibiganiro byihariye mu nama ya WEF.

Umwe mu bayobozi bakuru baherekeje Perezida Kagame yabwiye itangazamakuru ati: “Baganiriye no ku zindi ngingo zitandukanye z’ubutwererane bw’ibihugu byacu byombi.”

Inama ya WEF ihurije hamwe abayobozi n’impuguke mu by’ubukungu basaga 2,000 nyuma y’imyaka ibiri ishize iba hifashishijwe ikoranabuhanga kubera icyorezo cya COVID-19 cyahungabanyije Isi yose, by’umwihariko ingendo mpuzamahanga zikaba zaragiye zikumirwa mu bihe bitandukanye.

Inama iteranye ku nsanganyamatsiko igira iti: “Amateka mu Gihe cyo Guhinduka: Uruhare rwa Politiki za Leta n’Ingamba z’Ubucuruzi”, ikaba ishimangira urugamba rukenewe ku Isi yose mu guhangana n’ingaruka z’icyorezo cya COVID-19 ku bukungu n’imibereho y’abaturage.

Abayobozi bitezweho kuganira no gushakira ibisubizo ingorane zibasiye ubuzima n’ubukungu bwa muntu ari na ko bashyira imbere ingamba z’ubukungu, izo kubungabunga ibidukikije ndetse no gukemura ibibazo by’umuryango binyuze mu bufatanye mpuzamahanga.  

Nk’uko bigaragara mu itangazo ryashyizwe ahagaragara n’Ibiro by’Umukuru w’Igihugu, biteganyijwe ko Perezida Kagame aza kuyobora ibiganiro bigaruka ku rugendo rumaze gukorwa mu ishyirwa mu bikorwa ry’Isoko Rusange ry’Afurika (AfCFTA), ku nsanganyamatsiko igira iti: “Ihuriro ry’Inshuti z’Isoko Rusange ry’Afurika.” 

Biteganyijwe ko ibyo biganiro abiyobora afatanyije na Perezida wa Zimbabwe Emmerson Mnangagwa, uwa Botswana Mukgweetsi Masisi, uwa Namibia Hage Geingob, na Visi Perezida wa Nigeria Yemi Osibanjo.

Perezida Kagame kandi yitezwe mu kindi kiganiro kigaruka ku ngamba zo kwitegura guhangana n’ibyorezo by’ahazaza ahuriramo n’Umuherwe Bill Gates n’abandi bayobozi batandukanye mu rwego rw’ubuzima.

Biteganyijwe nanone ko Perezida Kagame akiri i Davos aza kugirana ikiganiro n’abanyamakuru ari kumwe n’Umuyobozi Mukuru w’Ikigo Pfizer Albert Bourla, kigaruka ku bufatanye bushya bugamije guharanira kugeza imiti y’ingenzi kuri bose.

Mu gihe harimo kuba iyi nama, Perezida Kagame yanahuye n’abandi bayobozi barimo Francis deSouza uyobora Ikigo Illumina cyifashisha ikoranabuhanga mu kwiga no guhindura utunyangingo tw’ibinyabuzima.

Inama ya WEF itanga amahirwe yihariye ahuriza hamwe abayobozi b’Isi bakungurana ibitekerezo ku ngingo zitandukanye, no gutanga ibitekerezo bishya bigamije kubaka imiryango yishakamo ibisubizo.

H.H Sheikh Khalifa bin Zayed al-Nahyan yahitanywe n’uburwayi yagize guhera mu 2014
  • NTAWITONDA JEAN CLAUDE
  • Gicurasi 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE