Perezida Kagame yasabye ubufatanye mu kurandura imbasa yagarutse muri Afurika

  • NTAWITONDA JEAN CLAUDE
  • Ukuboza 11, 2022
  • Hashize umwaka 1
Image

Mu kwezi kwa Kanama k’umwaka wa 2020 ni bwo Komisyo Nyafurika ishinzwe gutanga ibyemezo (Africa Regional Certification Commission) yashimangiye ko Umugabane w’Afurika utakirangwamo virusi y’imbasa y’igikatu, nyuma yo kwemezwa n’Ishami ry’Umuryango w’Abibumbye ryita ku Buzima (OMS).

Nyuma y’umwaka n’igice, iyo nkuru yarahindutse kuko OMS yongeye gutanga impuruza ko iyo virusi yongeye kugaragara mu bice by’Afurika by’umwihariko mu kwezi kwa Gashyatare 2022, nyuma y’umwana w’i Lilongwe muri Malawi wayirwaye mu Gushyingo 2021, agatangira uyu mwaka yamaze kumutera ubumuga.

Ikigo cy’Umuryango w’Abibumbye gishinzwe gukwirakwiza inkingo (Gavi) gitangaza ko igaruka muri Afurika rya virusi y’igikatu rigaragaza ko kuba yari ikigaragara gusa muri Afghanistan na Pakistan byari ikibazo gikomeye ku Isi yose, nk’uko COVID-19 yabigaragaje neza ko agashirira gato gashobora gutwika ishyamba.

Perezida wa Repubulika y’u Rwanda Paul Kagame, yagaragaje ko icyorezo cya COVD-19 cyagabanyije imbaraga ibihugu by’Afurika byari bimaze imyaka n’imyaka bishyira muri gahunda yo gukingira, ari na byo byatumye iyi virusi yongera kuzura umugara ku mugabane w’Afurika.

Nko mu Rwanda, Minisiteri y’Ubuzima itangaza ko virusi y’imbasa iheruka kugaragara mu myaka ikabakaba 30 ishize, kubera imbaraga zashyizwe muri gahunda y’ikingira itangira umwana akivuka kugeza agejeje ku mezi atatu n’igice.

Perezida Kagame yasabye ibihugu by’Afurika kuvugurura ukwiyemeza byari bifite mu kurandura iyi ndwara itera ubumuga n’imfu zibasira abadakingiwe, ubwo yitabiraga Inama yiga ku kongerera umubiri ubudahangarwa no kurandura burundu indwara y’imbasa, yateraniye Dakar muri Senegal ku wa Gatandatu taliki ya 10 Ukuboza 2022.

Iyo nama yateguwe kandi iyoborwa na Perezida wa Senegal akaba n’Umuyobozi w’Umuryango w’Afurika Yunze Ubumwe (AU) Macky Sall, watumiye  Perezida Kagame nk’umwe mu bagejeje ijambo ku bayitabiriye barimo Abakuru b’Ibihugu by’Afurika, abahagarariye Sosiyete Sivile, Imiryango Mpuzamahanga n’impuguke.

Intego nyamukuru yari iyo gushishikariza Abakuru b’Ibihugu by’Afurika kongera kwiyemeza gushyira imbaraga zihagije mu kubahiriza Amasezerano arebana no kongerera ubudahangarwa umubiri yashyiriweho umukono i Addis Ababa muri Ethiopia.

Perezida Kagame yavuze ko nubwo mu myaka ibiri ishize byatangajwe ko Afurika itakirangwamo virusi y’imbasa y’igikatu, icyorezo cya COVID-19 cyahungabanyije akamenyero ko gukingira, bituma indwara z’abana zirimo n’imbasa zongera ubukana bwazo.

Yagize ati: “Mu kuvugurura ukwiyemeza gushyira mu bikorwa amasezerano ya Addis Ababa arebana no kongera ubudahangarwa bw’umubiri, dushobora kurandura burundu amoko yose y’imbasa tugasubira ku murongo mwiza wo gukingira abana muri rusange. Miliyari 2.6 z’amadolari y’Amerika zimaze gukusanywa muri gahunda mpuzamahanga yo kurandura burundu indwara y’imbasa, ziduteza indi ntambwe itwegereza iyo ntsinzi, ariko hari izindi milyari 2.2 z’amadolari y’Amerika zisigaye gukusanywa.”

Yakomeje ashimangira ko kubaka ubushobozi bwo gukorera inkingo muri Afurika ari ingenzi cyane kugira ngo uyu mugabane uharanire umutekano w’ubuzima usesuye. Avuga ko hari intambwe nziza imaze guterwa mu Rwanda, Senegal n’Afurika y’Epfo, binyuze muri gahunda ya AU ishyigikira ibikorwa byo gukorera inkingo muri Afurika.

Perezida Kagame yongeyeho ko ibyo byagezweho ku nkunga y’Umuryango w’Ubumwe bw’u Burayi n’abandi bafatanyabikorwa barimo Umuryango Bill & Melinda Gates Foundation, GAVI, Ishami ry’Umuryango w’Abibumbye ryita ku Bana (UNICEF), n’Ishami ry’Umuryango w’Abibumbye ryita ku Buzima (OMS).

Nanone kandi yagaragaje ko Afurika yishimira kuba harashyizweho Ikigo Nyafurika gishinzwe Ubugenzuzi n’Ubuziranenge bw’Imiti (AMA), mu guharanira ko imiti n’inkingo bikorerwa muri Afurika biba byujuje ubuziranenge bukenewe ku rwego mpuzamahanga.

Yongeyeho ati: “Ubuzima ni uburenganzira, ndetse igihe cyose buri muntu atishimira kugera kuri serivisi z’ubuzima bw’ibanze harimo no kubona inkingo, nta n’umwe utekanye. Dufite ubushobozi n’ubumenyi. Bityo, reka dukorere hamwe tuvugurure ukwiyemeza dushyira mu kurandura burundu indwara y’imbasa.”

Mu mwaka wa 2017 ni bwo Abakuru b’Ibihugu by’Afurika biyemeje bwa mbere gushyigikira amasezerano ya Addis Ababa mu guharanira ko buri wese muri Afurika agerwaho n’inyungu zuzuye zo kongerera umubiri ubudahangarwa, hatitawe ku wo ari we n’aho atuye.  

  • NTAWITONDA JEAN CLAUDE
  • Ukuboza 11, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE