Perezida Kagame yasabye ba Minisitiri bashya guharanira ubuzima bwiza

  • NTAWITONDA JEAN CLAUDE
  • Ukuboza 1, 2022
  • Hashize umwaka 1
Image

“Aba ku buryo bw’umwihariko barahiye uyu munsi bagiye muri Minisiteri y’Ubuzima. Minisiteri ifite uruhare rukomeye, birumvikana, mu buzima bw’abantu ariko noneho no mu majyambere y’igihugu. Iyo ubuzima bw’abantu bumeze neza, bashobora gukora ibyo bashinzwe bityo Igihugu kigatera imbere.”

Ni ubutumwa bukubiye mu mpanuro Perezida wa Repubulika y’u Rwanda Paul Kagame yagejeje kuri Minisitiri w’Ubuzima mushya Dr. Nsanzimana Sabin ndetse n’Umunyamabanga wa Leta muri Minisiteri y’Ubuzima Dr. Yvan Butera, barahiriye inshingano nshya baheruka guhabwa.

Ku wa Kabiri taliki ya 29 Ugushyingo, ni bwo Dr. Nsanzimana Sabin yagizwe Minisitiri w’Ubuzima (MINISANTE) nyuma y’amezi icyenda agizwe Umuyobozi Mukuru w’ibitaro Bikuru bya Kaminuza bya Butare, ndetse mbere yaho yabaye  Umuyobozi Mukuru  w’Ikigo cy’Igihugu cy’Ubuzima (RBC).

Dr Yvan Butera we yagizwe Umunyamabanga wa Leta muri Minisiteri y’Ubuzima aho asimbuye Lt Col. Dr Mpunga Tharcisse wagizwe Umuyobozi w’Ikigo cy’Ubuvuzi no Kwigisha ku rwego rwa Kaminuza cya Kigali (CHUK).

Dr. Nsanzimana Sabin wagizwe Minisitiri w’Ubuzima, yasimbuye Dr. Ngamije Daniel wari umaze igihe muri izi inshingano.

Minisitiri Dr. Nsanzimana Sabin ni inararibonye mu buvuzi bw’indwara z’ibyorezo nka SIDA akaba yarabaye umwarimu muri Kaminuza y’u Rwanda.

Perezida Kagame yashimye abo ba Minisitiri bashya binjiye muri Minisiteri y’Ubuzima kuba bemeye kurahira, ashimangira ko adashidikanya ku bushake, ubushobozi n’ibindi bijyanye no gukorera Igihugu n’Abanyarwanda uko bikwiye.

Yabamenyesheje ko mu mirimo bahawe nibashaka koroshya imirimo yo gukorera Igihugu izoroha ariko nibayiremereza nta kizayibuza kuremera ndetse bikaba byateza n’ibindi bibazo.

Ati: “Biremera cyane cyane iyo abantu bitekerezaho kurusha uko batekereza imirimo y’igihugu cyangwa abo bakwiriye kuba bakorana na bo, bakorera, kugira ngo twese ibintu bigende neza dutere imbere. Ariko nabasezeranya ko ubundi ubufatanye burahari, igihe rero bazaba biteguye gufatanya n’abo basanze n’abazaza, ibintu bizagenda neza.”

Umukuru w’Igihugu yakomeje avuga ko abarahiye batangiye inshingano muri Minisiteri y’Ubuzima ifite uruhare rukomeye mu buzima bw’Abantu no mu iterambere ry’Igihugu, bityo abasaba guharanira ko ubuzima bw’abantu bumera neza no muri ibi bihe hari ibibazo byinshi bibuhungabanya.

Ati: “Minisiteri y’Ubuzima ifite uruhare rukomeye mu buzima bw’abantu no mu majyambere y’Igihugu. Iyo ubuzima bw’abantu bumeze neza bashobora gukora ibyo bashinzwe bityo Igihugu kigatera imbere. Ibi turabizi bihereye ku bintu byinshi by’amateka n’ibyo tugenda duhura na byo nk’ibyorezo bitandukanye, harimo ndetse n’icyo tukirimo n’ubungubu kijyanye na COVID-19.

Ntabwo ari byo byonyine hari n’ibindi byinshi, ubwo rero ndibwira ko aba bamaze kurahira bazadukorera imirimo uko ikwiye tugakorana na bo na twe dukora iyacu, tugahangana n’ibyo bibazo bitari bike ku buryo tubitsinda tugatera imbere.”

Nyuma yo kwakira indahiro kandi, Perezida Kagame yanakomoje ku ngingo zitandukanye zirebana na Politiki y’u Rwanda, aho yashimangiye ko abakeka ko u Rwanda ari ruto bakibwira ko ari insina ngufi buri wese acaho amakoma bibeshya cyane.

  • NTAWITONDA JEAN CLAUDE
  • Ukuboza 1, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE