Perezida Kagame yasabye abayobozi gukemura ibibazo by’abaturage bwangu

  • NTAWITONDA JEAN CLAUDE
  • Kanama 27, 2022
  • Hashize imyaka 2
Image

Perezida wa Repubulika y’u Rwanda Paul Kagame, yagiriye uruzinduko mu Karere ka Nyamasheke kuri uyu wa Gatandatu taliki ya 27 Kanama 2022, avuga ko nta gishobora kugerwaho hatabayeho ubufatanye bw’inzego ari abaturage ndetse n’ubuyobozi bakuzuzanya kugira ngo ibibazo bigihari bikemuke vuba na bwangu.

Yagize ati: “Nta gishoboka hatariho kuzuzanya kw’inzego, ariko inzego zirimo abayobozi, ndashaka kuvugana n’abayobozi, kubabwira ngo barusheho kwegera abaturage no kumenya ibibazo byabo, no gukorana na bo kugira go bikemuke vuba na bwangu.”

Yagarutse ku mahirwe aboneka mu Karere ka Nyamasheke, avuga ko n’ubwo Igihugu cyacu uko giteye n’ibice bitandukanye buri kimwe kigira umwihariko ariko kikagira n’ibyo gisangiye n’ibindi bice by’Igihugu,  abasaba kuyabyaza umusaruro, ngo bagere ku iterambere.

Ati: “Muri Nyamasheke mwegereye i Kivu, mwegereye ishyamba, ibyo ubwabyo hari byinshi dushobora kubikoresha tukagera kuri byinshi, iby’ubuhinzi bw’icyayi cyane cyane ahazengurutse iri shyamba rya Nyungwe, iby’ubukerarugendo,…  byavuzwe, byinshi bishoboka ni ugushaka uburyo bishorwamo tubikoresha neza.

Ntabwo Leta yabikora yonyine nta nubwo abaturage babikora bonyine icyo gihe ntiyaba ari bugere kure. Ni ukubishoramo imari tukabizamura bikatwungukira”.

Yavuze ko nubwo hari intambwe yatewe, ariko hakiri ibisaba kongerwamo imbaraga ngo bikemurwe kugira ngo Igihugu kigere ku iterambere ryifuzwa.

Ati: “Mu bibazo navuze hari ibiba bigoye bikomeye bishakirwa amikoro aba ataboneka ibyo abantu bashyiramo imbaraga hakarebwa uko byagerwaho”.

Perezida Paul Kagame ari kumwe n’abayozi batandukanye

Bimwe muri ibyo bibazo ni ibijyanye n’itunganywa ry’imihanda itameze neza kuri ubu, rimwe na rimwe hakaba haba hagomba gushakishwa uburyo n’ubushobozi bwo kuyitunganya, amashyanyarazi n’amazi bitaragera ku kigero cyifuzwa.

Kuri ibi bibazo Perezida Kagame yijeje ko Leta itazahwema kubishakira ibisubizo.

Ati “Iby’imihanda mbisubiyeho turaza kubikurikirana ku buryo bwihuta. Hari RTDA mwavuze itarabonye ingengo y’imari ngo ikore ibyo igombye kuba ikora, ubwo Leta iraza kubikurikirana.”

Yongeyeho ati: “Ikigo gicunga amashanyarazi yose, ibijyanye n’ibikorwa remezo, inyubako, imihanda n’ibindi turaza kureba ibishoboka bikorwe mu buryo bwihuse.

Iby’icyayi turifuza gukomeza kugiteza imbere n’ibindi bishobora guha Abanyarwanda akazi, ibyo ari byo byose”.

Umukuru w’Igihugu Kagame yishimiye kubona umwanya wo guhura n’abatuye Nyamasheke, bakaganira ku byateza imbere Igihugu, muri rusange.

Yashimiye n’izindi nzego zirimo inzego za Leta, abikorera, amatorero, amadini, abikorera n’abandi bafatanyabikorwa bo hanze y’Igihugu ari ibihugu cyangwa imiryango mpuzamahanga kuko turakorana turuzuzanya ni ho tuvanana imbaraga zo kugira ibikorwa biduteza imbere.

Perezida Kagame yashimiye abaturage ba Nyamasheke ku bintu bitandukanye bafatanyamo n’inzego zitandukanye.

Ati: “Ari imyifatire mu bibazo n’ukuntu mufatanya n’inzego by’umwihariko umutekano, inzego z’umutekano ukuntu zashoboye guhashya umwanzi ntizabigeraho mudafatanyije namwe mwabigizemo uruhare ngo batsinde uwo mwanzi. Nimukomereze aho rero”.

Ubufatanye ni ngombwa kuri byose no mu iterambere. Iterambere rikenera umuco wo gukora, gukora ibyiza, rikanakenera n’ubufatanye muri ibyo bikorwa.

Abaturage batanze ibitekerezo, bashima Ubuyobozi Bukuru bw’Igihugu bwabagiriye inama zikabafasha kwiteza imbere. Ababajije ibibazo bahawe ibisubizo ibindi bihabwa umurongo.

Mugabe Eric wo mu Murenge wa Kirimbi mu Kagari ka Karengera yavuze uburyo yiteje imbere na gahunda yatangiye yo guteza imbere uburezi abikesha inama z’Umukuru w’Igihugu.

Ati: “Imbaraga mfite nzikura ku gitekerezo mwampaye. Urubyiruko turi imbaraga z’igihugu ndetse twiyubakemo icyizere.

  • NTAWITONDA JEAN CLAUDE
  • Kanama 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE