Perezida Kagame yasabye Abanyarwanda kwiha agaciro no kumenya amateka

  • NTAWITONDA JEAN CLAUDE
  • Nyakanga 4, 2023
  • Hashize amezi 11
Image

Perezida wa Repubulika Paul Kagame, yakomoje ku mateka y’Urugamba rwo kubohora u Rwanda rwatangijwe n’abemeye kwitanga batizigama no gutanga ubuzima bwabo, asaba Abanyarwanda kumva neza, bagakora ndetse bakamenya ayo mateka y’igihugu cyabo,  bagahora bihesha agaciro, ari na ko birinda gusubira mu mateka mabi yaranze Igihugu cyabo.

Mu kiganiro cyihariye yagiranye n’Ikigo cy’Igihugu cy’Itangazamakuru (RBA) kuri uyu wa Kabiri taliki ya 4 Nyakanga, yizihijweho Umunsi Mukuru wo Kwibohora ubaye ku nshuro ya 29, Perezida Kagame yasabye Abanyarwanda guhora bihesha agaciro, bumva amateka mabi Igihugu cyanyuzemo bakayahindura baharanira iterambere, kuko nta muntu uzabaha icyo bifuza batagiharaniye.

Ati: “Abanyarwanda dukwiriye kuba turi umwe, dukora, twubaka Igihugu cyacu, dutera imbere nk’ibindi bihugu tubona hanze hariya hose; gutera imbere, kubaho neza, ntiduhore dukennye, dusabiriza, turi mu mwiryane nk’uko nabivuze… Icyo nsaba Abanyarwanda rero ni icyo ngicyo cyo guhora biha agaciro, bumva amateka mabi ya mbere twanyuzemo, icyabiteye kigahinduka mu bihe tugezemo, tukabikorera, tukabiharanira, bityo tukaba abo dukwiriye kuba turi bo.”

Yongeye gukomoza ku ijambo yavuze ku Cyumweru taliki ya 2 Nyakanga, aho yashimangiye ko kubohora u Rwanda byasabye ikiguzi cy’amaraso, kubera ko kugira ngo amateka mabi ahinduke hari Abanyarwanda bemeye kwitanga abenshi batakaza ubuzima, abandi baracyariho ariko baracyafite ibikomere.

Yavuze ko amateka y’u Rwanda atangira nk’ay’ibindi bihugu byose ku Isi, ariko akaba yarajemo ubukoloni bukagira igihe cyabwo bikitwa ko burangiye hakajyaho ubwigenge, “ariko icyo gihe bisa nk’aho ari ubukoloni bwakomeje.”

Yakomeje agira ati: “Ndetse ni ho havuye ibibazo byinshi by’Abanyarwanda, impunzi zabaye nyinshi guhera mu 1960, ibibazo byinshi byo kudatera imbere, u Rwanda ruguma ari urukene, rukomeza kuba urw’umwiryane hagati y’abantu, biragenda bishingira ku Muhutu, Umutsi, Umutwa, iba ari yo Politiki ntiyaba Politiki yo kubaka u Rwanda n’Abanyarwanda ngo bagire aho bashingira batera imbere.”

Igisobanuro nyakuri cyo Kwibohora ni uguharanira iterambere- Dr. Ngirente – ImvahoNshya

Ibyo bibazo byose rero ni byo byaje kuvamo urugamba rwo kwibohora, rwatangiye mu buryo bweruye mu mwaka wa 1990, rwitabirwa n’Abanyarwanda bari mu Gihugu n’abari hanze yacyo, nubwo hari n’ababirwanyaga ushingiye no kuri Leta yariho icyo gihe.

Yavuze ko urugamba rwo kubohora u Rwanda rwarangiye ruhitanye Abanyarwanda benshi, buri wese akwiye kumeya ayo mateka, ati: “Icyo umuntu yahamagarira Abanyarwanda kwitabira ni ukumva neza, ni ugukora, ni ukumenya ayo mateka, no kubumvisha ko ibyo [ubukene, umwiryane, gusabiriza, Jenoside n’ibindi] atari byo byari bibereye u Rwanda, ntabwo ari byo bibereye Abanyarwanda.”

Yavuze ko intego ari uguhora hahindurwa ibitagenda neza u Rwanda rukagera aho rutekanye, ruteye imbere ndetse rushobora kubaho neza, kandi rukabana n’ibindi bihugu neza.

Umwenda afitiye Abanyarwanda ni uwo na bo bifitiye ubwabo

Perezida Kagame avuga ko nubwo hari intambwe ishimishije imaze guterwa, ugereranyije aho u Rwanda rwavuye n’aho rugeze uyu munsi, hakiri byinshi bitaragerwaho ari na wo mwenda abayobozi n’Abanyarwanda muri rusange bifitiye kuko nta wundi uzabibakorera cyangwa ngo byizane.

Ati: “Umwenda ni ibyari bisigaye gukorwa cyangwa se byari mu ngamba zo gukorwa bitagezweho, nk’Umuyobozi nyine tuba twaragize amasezerano, twarakoze ingamba z’ibikorwa ibyinshi bigakorwa. Ni yo mpamvu u Rwanda muri rusange ruteye imbere ngereranyije n’aho tuvuye, navuga ko hari intambwe ndende yatewe ariko ntabwo bihagije. Aho dukeneye kuba tugera n’aho turi, turacyari kure nubwo aho tuvuye ari kure cyane ugereranyije n’aho turi ubu.”

Yavuze ko iyo avuga ko afitiye umwenda Abanyarwanda mu bihe bitandukanye, aba ativuga ubwe gusa ahubwo aba avuga abayobozi n’Abanyarwanda bose muri rusange kuko ntawuzabaha ibyo bifuza mu gihe bo ubwabo batabiharaniye.

Ati; “Uwo mwenda rero ni uwo kugera aho dukwiriye kuba tugera. Kandi mbivuga ngira ngo abantu bongere intambwe kuko hari byinshi bidakorwa byari bikwiye kuba bikorwa, kandi dufite ubushobozi bwo kubikora.”

Yavuze ko mu bidindiza urugendo rwo kugeza Abanyarwanda aho bifuza kugera, harimo uburangare bwa bamwe no gukora ibidakwiriye gukorwa, asaba ko umubare w’abakora ibyiza warushaho kwiyongera kuruta uw’abakora ibidakwiye kugira ngo umuvuduko w’iterambere na wo wiyongere.

  • NTAWITONDA JEAN CLAUDE
  • Nyakanga 4, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE