Perezida Kagame na Gen Muhoozi muri Siporo igamije kurwanya Kanseri y’ibere

  • NTAWITONDA JEAN CLAUDE
  • Ukwakira 16, 2022
  • Hashize imyaka 2
Image

Kuri iki Cyumweru taliki ya 16 Ukwakira 2022, Perezida wa Repubulika y’u Rwanda Paul Kagame, Gen. Muhoozi Kainerugaba uri mu ruzinduko rw’ikiruhuko mu Rwanda na Madamu Jeannette Kagame, bitabiriye Siporo Rusange (Car Free Day) yatangiwemo ubutumwa bwo kurwanya kanseri y’ibere.

Ni mu gihe u Rwanda rukomeje kwifatanya n’Isi kwizihiza Umunsi Mpuzamahanga wahariwe kurwanya Kanseri y’Ibere wabaye ku ya 13 Ukwakira, ku nsanganyamatsiko igira iti: “Twirinde  Kanseri y’ibere tuyisuzumishe hakiri kare kuko ivurwa igakira”.

Mu gihe hasanzwe hatangwa ubutumwa bwo gukumira no kurwanya indwara zitandura muri rusange, umwihariko wo kuri iki Cyumweru ni uko hatanzwe ubutumwa bugamije kwirinda no kurwanya kanseri y’ibere , bukazakomeza gutangwa mu gihe cy’ukwezi.

Ni ubukangurambaga bwatangiye uyu munsi muri Siporo rusange yabimburiwe n’urugendo rwahereye kuri BK Arena kugera kuri Kigali Height, ari na ho hatangirijwe ubwo bukangurambaga n’ibikorwa byo gusuzuma ku buntu Kanseri y’Ibere.

Minisiteri y’Ubuzima ivuga ko Kanseri y’ibere iri muri kanseri ziri ku isonga mu guhitana abagore ku Isi. Mu mwaka wa 2020, abagore bibasiwe n’iyo ndwara ni miliyoni 2 n’ibihumbi 300, muri bo 685,000 bahitanywe na yo.

Mu Rwanda, mu mwaka wa 2020 abapimwe bagasanganwa Kanseri y’ibere bagera kuri 650 (13% by’abarwaye indwara za kanseri) ari na yo mpamvu ari ngombwa kongera imbaraga mu bukangurambaga kugira ngo abantu bitabire kwisuzumisha hakiri kare kuko abarenga 50% barwaye kanseri y’ibere bayisuzumishije bakerewe bityo ubuvuzi bahawe ntibutange umusaruro mwiza.

Minisitiri w’Ubuzima Dr. Ngamije Daniel, yavuze ko nubwo indwara za Kanseri ari ikibazo cyugarije Abanyarwanda, Leta y’u Rwanda yafashe ingamba zikomeye zigamije guhangana.

Yagize ati: “Izo ngamba zirimo kugabanya umubare w’abarwara kanseri zikwiriye kwirindwa, kongera umubare w’abipimisha kanseri hakiri kare, kongera ubuvuzi bw’indwara za kanseri, kwita ku barembye babagabanyiriza ububabare, gukorana n’abafatanyabikorwa batandukanye no gushaka ingengo y’imari igenewe ibikorwa byo kwirinda no kuvura kanseri.”

Yakomeje agira ati: “Mu rwego rwo guhangana n’indwara za kanseri, u Rwanda rwashyizeho ingamba zo gukangurira abantu gukumira ibishobora gukurura kanseri, kwipimisha hakiri kare, no kuvura abagaragaye ko bayirwaye,”

Ishami ry’Umuryango w’Abibumbye ryita ku Buzima (OMS), ritangaza ko 40% by’indwara za kanseri zishobora kwirindwa, bityo abaturage barakangurirwa kwirinda ibintu byose bishobora kuzitera cyane cyane birinda kunywa itabi, inzoga nyinshi, bitabira gukora siporo, kandi birinda n’umubyibuho ukabije.

Ubukangurambaga bwateguwe muri uku kwezi ko kurwanya Kanseri y’ibere hateguwe ibikorwa bitandukanye birimo gutanga ubutumwa butandukanye bugamije kurwanya indwara ya Kanseri y’ibere ndetse no kuyisuzumisha ku buntu. 

Iki gikorwa  kirareba abari n’abategarugori  bose bafite imyaka 30 kuzamura, cyangwa ku myaka iyo ari yo yose igihe umuntu yaba afite bimwe mu bimenyetso  bya Kanseri y’ibere nk’akabyimba mu ibere n’ibindi.

Biteganyijwe ko abizitabira izi gahunda, bazahabwa n’amahirwe yo gusuzumwa Kanseri y’inkondo y’umura, by’umwihariko ikazaba ibera mu bigo nderabuzima n’íbitaro byose by’akarere ka Kicukiro Nyanza, Gicumbi, Nyagatare, ndetse n’Ibitaro bya Gisirikare bya Kanombe, Ivuriro Shema Clinic na Frontier Polyclinics.

  • NTAWITONDA JEAN CLAUDE
  • Ukwakira 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE