Perezida Kagame arakira indahiro z’abayobozi binjiye muri Guverinoma

  • Imvaho Nshya
  • Kanama 2, 2022
  • Hashize imyaka 2
Image

Kuri uyu wa Kabiri taliki ya 2 Kanama 2022, biteganyijwe ko Perezida wa Repubulika y’u Rwanda Paul Kagame yakira indahiro z’abayobozi bashya binjiye muri Guverinoma y’u Rwanda nk’uko byemejwe n’Itangazo ryaturutse mu Biro bya Minisitiri w’Intebe taliki ya 30 Nyakanga 2022.

Abahawe inshingano bageza indahiro ku Mukuru w’Igihugu ni Minisitiri w’Ishoramari rya Leta Eric Rwigamba na Ildephonse Musafiri wabaye Umunyamabanga wa Leta muri Minisiteri y’Ubuhinzi n’Ubworozi (MINAGRI).

Umuhango wo kurahira urabera mu Nteko Ishinga Amategeko mu masaha y’igicamunsi, uraza kuyoborwa na Perezida Kagame.

Rwigamba abaye Minisitiri wa mbere uyoboye Minisiteri y’Ishoramari rya Leta yitezweho kuzahura ishoramari rya Leta ribyazwa inyungu, ndetse ikaba izanagira uruhare mu kugaragaza amahirwe y’ishoramari Leta yakora rikayibyarira inyungu.

Hari kandi no gukurikiranira hafi ishoramari Leta yamaze gukora mu bigo bitandukanye, gushyira mu bikorwa gahunda yo kwegurira ibigo bimwe na bimwe abikorera aho bibaye ngombwa ndetse no gukomeza guharanira kwimakaza imikoranire myiza na bo.

Inshingano nyinshi zeguriwe iyo Minisiteri zabarizwaga mu Rwego rushinzwe Iterambere mu Rwanda (RDB). Abasesengura ibijyanye n’ubukungu bavuga ko gushyiraho Minisiteri ishinzwe ishoramari rya Leta bifite inyungu ikomeye mu micungire no guhuza ibikorwa Leta yashoyemo imari, kuko hari ibikunze kudindira cyangwa bigahomba. 

Eric Rwigamba afite ubunararibonye mu ishyirwa mu bikorwa rya gahunda zifitanye isano n’urwego rw’imari, igenamigambi ry’imishinga n’ibindi. Mbere yari Umuyobozi Mukuru w’Ishami rishinzwe guteza imbere urwego rw’Imari muri Minisiteri y’Imari n’Igenamigambi (MINECOFIN).

Musafiri we yasimbuye Dr. Ngabitsinze Jean Chrysostome wagizwe Minisitiri w’Ubucuruzi n’Inganda (MINICOM) asimbuye Uwamaliza Béata Habyarimana wahise agirwa Umuyobozi Mukuru wa BK Group ihuje ibigo bine by’ubucuruzi bikomeye mu Rwanda birimo Baki ya Kigali.

Mbere yo guhabwa inshingano, yakoraga nk’Umuyobozi Nshingwabikorwa w’Inama ishinzwe Ingamba na Politiki mu Biro bya Perezida wa Repubulika, umwanya yari amazemo imyaka itandatu.

  • Imvaho Nshya
  • Kanama 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE