Nyuma y’uwariye chocolat imeze nk’isabune, iza Toblerone zakuwe ku isoko

  • NTAWITONDA JEAN CLAUDE
  • Ugushyingo 20, 2022
  • Hashize umwaka 1
Image

Ku wa Kane w’iki Cyumweru, ni bwo umwe mu bakiliya ba rimwe mu masoko ya Kijyambere agezweho mu Mujyi wa Kigali yanditse ku rukuta rwe rwa Twitter asaba Ikigo cy’Igihugu gishinzwe Ubuziranenge bw’Imiti n’Ibiribwa (Rwanda FDA) gukurikirana ibya shokola (Shokola) zaguzeho iyo yatamiyeho akumva imeze nk’isabune.

Ubutumwa bwe bwari buherekejwe n’ifoto y’iyo yaguze ikamuhombera yatumye benshi mu bahahira mu masoko agezweho bagaragaza imbogamizi bajya bahura na zo, aho bamwe bavuga ko bahuye n’icyo kibazo bakibwira ko byari nk’impanuka.

Uwatabaje Rwanda FDA we yavugaga ko bimubayeho inshuro eshatu, ariko kuri iyi nshuro ho ngo byari bikabije. Ati: “Sinzi ibiri muri iyo chocolat n’uburemere bw’ingaruka byateza. Bimeze nk’isabune ivanze n’amazi ya javeri (bleach).”

Ubuyobozi bwa Rwanda FDA bwahise bumusubiza ko bukurikirana icyo kibazo, ndetse nyuma yo kwikorera ubugenzuzi icyo kigo gisaba ko shokola zo mu bwoko bwa Toblerone zikurwa ku isoko byihuse ndetse zigasubizwa aho zaranguwe.

Rwanda FDA yaragenzuye isanga zimwe muri izo shokola zifite ikibazo cy’ubuziranenge aho bigaragara ko zahinduye ibara ndetse no gukomera kwazo mu buryo budasanzwe.

Rwanda FDA yavuze ko ikuye ku isoko nimero za shokola zo mu bwoko bwa TOBLERONE ziri mu byiciro binyuranye zakozwe n’uruganda rwo mu Busuwisi.

Abaranguye nomero za shokola za TOBLERONE 100g (Swiss milk chocolate with Honey & Almond Nougat) 00Y4122241 Mfd date: – Exp dates: 02.09.2023; TOBLERONE 100g (Swiss dark chocolate with Honey & Almond Nougat) 00Y4021971 Mfd date: 15.05.2022 Exp date: 15.11.2023; TOBLERONE 50g (Swiss milk chocolate with Honey & Almond Nougat) 00Y2121041 Mfd date: – Exp date: 10.06.2023 zakorewe n’Uruganda Mondelez International rwo mu Busuwisi, barasabwa kuzisubiza aho baziranguriye.

Abinjiza za shokola, abaziranguza n’abazidandaza baba bafite nimero za shokola za TOBLERONE zatanzwe mu mbonerahamwe barasabwa kuzikura ahagurishirizwa bagahagarika kuzigurisha.

Abinjiza za shokola, n’abaziranguza mu gihugu barasabwa kwakira izabagarukiye, bagatanga raporo kuri Rwanda FDA igizwe n’ingano y’izo binjije, izabagarukiye n’ingano y’izo bafite zose hamwe.  Iyo raporo igomba kugera kuri Rwanda FDA mu minsi 15 uhereye igihe itangazo rizihagarika ryasohokeye.

Abantu bose baba baraguze nomero za shokola zavuzwe haruguru barasabwa guhagarika kuzikoresha, kandi ababa bifuza amakuru arenzeho, cyangwa gutanga amakuru  ku buziranenge bw’ibiribwa n’imiti bukemangwa barasabwa guhamagara kuri 0789193529 cyangwa 0788 771 663 bakohereza emeli (email) kuri inforwandafda.gov.rw.

Iyi shokola ngo imeze nk’isabune ivanze n’ibinyabutabire bikesha imyenda
  • NTAWITONDA JEAN CLAUDE
  • Ugushyingo 20, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE