Nyamasheke: Impanuka y’imodoka yahitanye umunyonzi wari utwaye ibisheke

  • Imvaho Nshya
  • Ugushyingo 18, 2023
  • Hashize amezi 3
Image

Saa kumi n’ebyiri n’igice z’igitondo cyo kuri uyu wa Gatandatu, tariki 18 Ugushyingo 2023, mu muhanda wa kaburimbo Kivu belt, mu Mudugudu wa Munimba habereye impanuka yahitanye umunyonzi witwa Hakizimana Donatien.

Mu Mudugudu wa Munimba, Akagari ka Rugali, Umurenge wa Macuba, mu Karere ka Nyamasheke, ni igice kimanuka cyane aho uwo umunyonzi wari utwaye ibisheke, yashatse kunyura ku ikamyo yari itwaye amavuta yerekeza i Rusizi, ibisheke biyifataho, umunyozi agwa mu mapine yayo ahita apfa.

Amakuru Umunyamabanga Nshingwabikorwa w’Umurenge wa Macuba, Habimana Alfred yatangarije Imvaho Nshya ni  uko ubwo iyi kamyo  ifite plaque RAD 547Y,yari itwawe n’uwitwa Bwanakweli Jean,yamanukaga muri iki gice yikoreye amavuta yo guteka iyavanye mu Mujyi wa Kigali iyajyanye mu wa Rusizi, umunyonzi wari uhetse ibisheke ku igare, avuduka cyane, yashatse kuyinyuraho ibisheke biyifataho agwa mu mapine yayo, ahita apfa.

Uyu munyonzi witwaga Hakizimana Donatien w’imyaka 33, akigwa mu mapine y’iyi kamyo umushoferi ngo ntiyahise abimenya, yakomeje aragenda undi ayirimo,abimenya ageze muri nka metero 50 uvuye aho yayinjiriyemo, ageze mu Murenge wa Kanjongo, abona guhagarara, asanga umunyonzi  yapfiriyemo, n’umwirondoro we ntiwahita umenyekana kuko yamaze igihe kinini muri ayo mapine bamukuramo.

Gitifu Habimana ati: “Uyu mugabo asize umugore n’abana 2 akuwe muri aya mapine umwirondoro we waje kumenyekana, dusanga ari uwo mu Mudugudu wa Karamba, Akagari ka Mutongo, Umurenge wa Macuba. Kubera ko batwara ibisheke babitambitse, yashatse guca kuri iriya kamyo ibisheke  biyifataho, biramukurura bimutura mu mapine yayo, arangirika bikomeye ari ko guhita shiramo umwuka”.

Iyi mpanuka yabereye hafi ya kamera y’umutekano izwi ku izina rya sofiya, hakaba hari hashize umwaka urengaho gato nanone habereye indi mpanuka y’ikamyo yanagonze iyi kamera umushoferi wari uyitwaye akahasiga ubuzima.

Hari hashize ikindi gihe habereye impanuka ya Hiyasi Minibisi, yari irimo abari baturutse i Rubavu, baje guhemba umukobwa wabo wari warabyaye, atuye i Kamembe mu mujyi wa Rusizi, igwa munsi y’umuhanda abari bayirimo hafi ya bose irabahitana.

Gitifu w’Umurenge wa Macuba,Habimana Alfred,avuga ko hakunze no kubera izindi mpanuka kuko hahanamye cyane, agasaba  abatwara ibinyabiziga n’abagenda n’amaguru kujya bitondera aka gace kuko kagira ingusho cyane.

Yanasabye ababishinzwe ko bareba uburyo aka gace kashyirwamo ibyapa biburira kuko akeka ko bamwe mu bahagwa baba batanahazi neza, agakeka ko byagabanya izi mpanuka zihibasira.

Iyi mpanuka ije abatuye iyi ntara bataribagirwa indi  mpanuka  y’imodoka yari yikoreye inka, yabereye ahitwa mu Kadasomwa, mu mujyi wa Rusizi kuri uyu wa Gatanu, tariki ya 17 Ugushyingo 2023, igahita abantu 3 n’inka 18.

Abakoresha umuhanda barasabwa n’ubuyobozi kwigengesera, n’abatwara ibinyabiziga  bakubahiriza amategeko y’umuhanda ngo izi mpanuka zirindwe.

Umurambo wa nyakwigendera,nyuma yo gukurwa muri aya mapine wajyanwe ku bitaro bya Kibogora gukorerwa isuzuma mbere yo gushyingurwa.

BAHUWIYONGERA SYLVESTRE

  • Imvaho Nshya
  • Ugushyingo 18, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE