Nyamasheke:  Barinubira kumara imyaka 50 barema isoko ridashinga

  • BAHUWIYONGERA SYLVESTRE
  • Mutarama 30, 2024
  • Hashize amezi 4
Image

Abacururiza mu isoko rya Ville  rihereryee mu Kagari ka Bisumo, Umurenge wa Cyato, Akarere ka Nyamasheke, ariko riremwa n’abaturage bavuye mu Mirenge inyuranye y’Akarere ka Nyamasheke ndetse n’aka Nyamagabe mu Ntara y’Amajyepfo.

Abarirema binubira ko ari rimwe mu masoko akomeye barema ariko rikaba rimaze imyaka 50 ridashinga kubera uburyo barinyagirirwamo mu gihe cy’imvura no mu gihe cy’izuba bakazongwa n’ivumbi ryinshi kubera ko ritubakiwe.

Abazi amateka y’iryo soko, babwiye Imvaho Nshya ko mu 1974 ari bwo iri soko ryatangijwe n’uwari Burugumesitiri w’iyari  Komini Kirambo, rikaba ryaratangiye ari nyakatsi none kugeza n’uyu munsi rikaba ridasakaye.

Bavuga ko iyi mikorere yasubije inyuma cyane mu iterambere, abarirema baturutse mu Mirenge ya Macuba, Karambi, Rangiro, Kanjongo n’indi y’Akarere ka Nyamasheke n’iy’Akarere ka Nyamagabe.

Muri iyi myaka abarirema ngo batangiye kugabanyuka kubera ko babonaga bakora bahomba bitewe n’impinduka ziba mu kirere.

Hari ubwo imvura igwa ikabanyagira, hakarokoka ibicuruzwa babaga barokoye bagiye kugama na ho ibyasigaye mu isoko bigatwarwa n’umuvu w’amazi.

Hategekimana Gabriel uricururizamo imyenda, yagize ati:  “Birababaje cyane kuba isoko ryitwa ko ari ryo rikomeye mu Murenge wose rimeze ritya, bikwereka uko duhagaze mu iterambere kuko isoko riri mu biranga Umurenge wihagazeho. Imyaka ibaye 50 turi mu kajagari nk’aka, abayobozi bagiye basimburana muri iki gihe cya Leta y’Ubumwe bazaga batwizeza isoko ryiza tutanyagirirwamo, bakagenda ntacyo bakoze.”

Ndikumana Alexis, uhagarariye abacururiza muri iyo santere y’ubucuruzi, avuga ko iyi myaka 50 yose yo gucururiza mu isoko ridashinga isa n’iyababereye imfabusa mu iterambere.

Ni isoko rimaze imyaka 50 ritangijwe ariko rikaba ryaradindiye kandi rihuza abaturage benshi

Ati: “Isoko ribi nk’iri ridushyira mu bwigunge rwose. N’uduti bamwe bagiye bashyiraho imvura yagiye itunyagira tukabora. Uwazanye ibicuruzwa nimugoroba ahambira ibyo atagurishije akabitahana ku mutwe cyangwa akabibitsa, abo utwo duti twaboranye bakanika hasi ibicuruzwa.

Iyo imvura iguye ibatunguye bitwarwa n’umuvu bigatuma batazarigarukamo, ibicuruzwa bikaba bike tugahora mu bukene bugaragara kandi dukora.”

Anavuga ko iyi mikorere yagiye ituma n’igihe ryagombaga gutangiriraho no gutahaho kigabanyuka, rikarema mu ma saa saba ryagombaga guhera mu gitondo kandi rigataha hakibona hakumirwa ubujura.

Basaba Akarere kububakira isoko rifatika, cyangwa kagahuza abashoramari bari muri uyu Murenge n’abawuvukamo bakaganira icyakorwa bakabona isoko rya kijyambere.

Bayavuge Thimothée uhagarariye Urugaga rw’Abikorera mu Murenge wa Cyato, avuga ko kuba Umurenge wose ufite udusoko twa nimugoroba gusa usanga bitajyanye n’icyerekezo cy’Iguhugu.

Ati: “Ntacyo Umukuru w’Igihugu Paul Kagame aba atakoze ngo dutere imbere rwose. Ahubwo abayobozi batwegereye batabona nk’iki kibazo kandi kivugwa kenshi ni bo babizambya. Nk’ubu iri soko ryubakiye abantu bagakorera ahameze neza, rigashyirwamo ibyangombwa byose by’ibanze nk’uko tubibona mu yandi masoko, abantu bacuruza neza, bakagura imodoka zigataha ino ku bwinshi nk’ahandi…”

Umuyobozi w’Akarere ka Nyamasheke Mupenzi Narcisse, avuga ko ku bufatanye n’abafatanyabikorwa b’Akarere bagiye kureba icyahakorwa ngo iryo soko ryubakwe.

Ati: “Birumvikana ko ahageze ibikorwa remezo utirirwa uhamagarira abaturage iterambere, barizana bakarishaka. Ku bufatanye n’abafatanyabikorwa bacu n’abaturage b’uriya Murenge tugiye kurebera hamwe icyakorwa ngo baremere isoko ahafatika. Turizera ko nidushakira hamwe igisubizo tutazahava tutakibonye.”

Ikibazo cy’amasoko atubakiye neza n’ayubakiye bamwe mu bayarema bakavuga ko yubatse ahatababereye, kiragaragara mu mirenge hafi ya yose y’Akarere ka Nyamasheke.

Meya Mupenzi avuga ko iki ari kimwe mu bibahangayikishije, bagomba kugerageza gukemura uko ubushobozi buzagenda buboneka.

Aba baturage bagaragaza ko kutagira isoko bibadindiza cyane mu iterambere
  • BAHUWIYONGERA SYLVESTRE
  • Mutarama 30, 2024
  • Hashize amezi 4
TANGA IGITEKEREZO
DUSINGIZIMANA THEODOMIR says:
Mutarama 30, 2024 at 6:16 pm

Twishimiye kuba itangazamakuru ridahwema kutuba hafi iwacu I Nyamasheke kandi twishimiye ko hari icyo ubuyobozi bw,akarere kacu bugiye kubikoraho.

DUSINGIZIMANA THEODOMIR says:
Mutarama 30, 2024 at 6:16 pm

Twishimiye kuba itangazamakuru ridahwema kutuba hafi iwacu I Nyamasheke kandi twishimiye ko hari icyo ubuyobozi bw,akarere kacu bugiye kubikoraho.

Manirafasha Japheth says:
Mutarama 30, 2024 at 8:05 pm

Nukuri ntagushidikanya niharebwe icyakorwa maze iryosoko ryubacyirwe bityo bizafasha amarikoreramo nabarintunda 0781071345

Andika igitekerezo

AMATEGEKO AGENGA IYANDIKA RY'IGITEKEREZO CYAWE