Nyabihu: Bahereye ku mafaranga y’Ubudehe biyubakira irerero (ECD)

  • NTAWITONDA JEAN CLAUDE
  • Ukwakira 5, 2022
  • Hashize imyaka 2
Image

Abaturage bo mu Mudugudu wa Cyinkenke, mu Murenge wa Mukamira mu Karere ka Nyabihu, nyuma yo kubona ko hari abana bato bafite ikibazo cy’imirire mibi, bishatsemo ibisubizo byo kugikemura biyubakira Urugo Mbonezamikurire y’Abana Bato (ECD) bafata nk’irerero riri gutanga umusaruro ufatika.

Iri rerero “Igicumbi Mbonezamikurire y’Abana Bato” ubu rirererwamo abagera kuri 60. Abaturage bishimira umusaruro ritanga, aho bagaragaza ko ritangira bari bafitemo abana 5 bafite imirire mibi ikabije (bari mu ibara ry’umutuku), bitaweho ubu ibipimo byabo bihagaze neza baragana  mu ibara  ry’icyatsi.

Nsabimana Innocent umwe muri aba baturage biyubakiye irerero, akaba yari umubitsi batangiza iki gikorwa, yasobanuye uko igitekerezo bakigize.

Mu kiganiro n’itangazamakuru, yagize ati: “Amashuri yasaga  nk’aho ari kure, kandi ababyeyi birirwaga  bashakisha imibereho abana bakabura ubitaho, ntibarye mu buryo bukwiriye, biza gutuma bamwe batangira kugwingira haba mu mikurire ndetse no mu bwenge, turavuga tuti hari icyo twakora kugira ngo turere abana bacu mu buryo bwiza kandi bwazatanga umusaruro ejo hazaza”.

Yakomeje avuga ko bafashe ikibanza bari baraguze bahereye ku mafaranga ibihumbi 600 bahawe muri gahunda y’Ubudehe, bashakisha ubushobozi bwo kubaka ishuri n’igikoni kugira ngo abana bakiri bato bajye bitabwaho.

Batangiye batekereza kubaka ishuri ry’inshuke ariko babonye hatangiye kuboneka ikibazo cy’imirire mibi n’igwingira ry’abana bahitamo kubaka irerero.

Nsabimana yavuze ko ababyeyi bagiye bakusanya amafaranga aho muri uyu mudugudu ufite ingo 204 nibura umuturage yatanze agera ku bihumbi 10, bongeraho umuganda kugira ngo inzu yuzure, bunganirwa n’ Ubuyobozi bw’Akarere n’Umushinga wa Gikuriro kuri Bose uterwa inkunga na USAID.

Nk’uko yakomeje abivuga, irerero ryatanze umusaruro, batangira no kujya bahinga imboga n’imbuto mu isambu bafite bakagaburira  abana ndetse bakanabashakira amata. Uretse indyo yuzuye bagaburirwa,  banahahererwa uburezi n’uburere.

Abaturage bishatsemo ibisubizo mu kurwanya imirire mibi

Ati: “Twari twahereye ku bana b’imyaka 3 uko bagenda bakura ukabona harimo n’ab’imyaka 5 bafite ikibazo. Iyi nzu yari ifite icyumba kimwe tuyicamo kabiri kugira ngo abana tubashyire hamwe dukurikije imyaka yabo”.

Mukashyaka Clenia na we ni umubyeyi wagarutse ku mpinduka zazanywe n’irerero.

Ati: “Igihe abana batazaga mu irerero, wasangaga badafite ubumenyi mu kinyabupfura ariko ubu usanga bafungutse mu mbamutima n’imibanire n’abandi, imirire na yo ni ntamakemwa. Irerero ryakemuye ikibazo cyo kugwigira kuko mbere wasangaga umubyeyi agurira umwana igi nka rimwe mu mwaka ariko hano tuyabaha nka kabiri mu cyumweru, tukabaha amata[…]”.

Barihuta Musoni Jean de Dieu na we ati: “ … aha tumaze kuhagera twahigiye gutegura indyo yuzuye, turwanya imirire mibi mu bana”.

Ababyeyi babonye ko bikeya umuntu afite ashobora kubyifashisha akanoza imirire y’umwana. 

Simpenzwe Pascal Umuyobozi w’Akarere ka Nyabihu wungirije ushizwe imibereho myiza,  yavuze ko ahanini ikibazo cy’igwingira kiba gishingiye ku buryo ababyeyi bashobora kuba badafite amakuru y’ikiritera n’icyo bakora kugira ngo ryirindwe, akaba ari yo mpamvu bashyize imbaraga mu kubigisha.

Ati: “Icyo twagishyizemo imbaraga, dufatanyije n’abafatanyabikorwa bacu, navuga nk’Umushinga ugamije gukumira no kurwanya igwingira mu bana SPRP, wadufashije byinshi kugira ngo dushobore kwegera ababyeyi mu ngo zabo; umubyeyi ukimara gusama kugeza k’urimo konsa umwana w’imyaka 2 tukamwegera tukamwigisha”.

Ikindi ni uguteza imbere ingo mbonezamikurire aho abana barengeje imyaka 3 kugeza kuri 6 bakirwa bagakurikiranwa.

Nk’uko Simpenzwe yabigarutseho, muri aka karere mu myaka itanu (2015-2020) bari bafite igwingira riri kuri 59%, ariko  ubufatanye bw’abaturage, Akarere n’abafatanyabikorwa mu guhangana n’iki kibazo bwatumye  rigabanukaho  12,3%, rigera kuri 46,7%.

Ati: “Nubwo uyu mubare ukibabaje, abana bakiri benshi, ariko hari icyakozwe kandi gikomeje gukorwa kugira ngo muri 2024, tuzabe tugeze kuri 19% cyangwa se munsi yaho”.

Abana bari mu mirire mibi aka karere gafite ni 92, abari  mu mutuku ni 12.

Mukashyaka Clenia avuga ko irerero ryazanye impinduka mu mikurire y’abana babo
  • NTAWITONDA JEAN CLAUDE
  • Ukwakira 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE