Ni icyubahiro nk’Abanyafurika guhitamo ahazaza dushaka-Perezida Kagame

  • NTAWITONDA JEAN CLAUDE
  • Ukwakira 24, 2022
  • Hashize umwaka 1
Image

“Kongera ibikorwa by’ubugiraneza bikozwe n’Abanyafurika ndetse n’Imiryango yabo ni ingenzi cyane, ariko bidashingiye gusa ku mafaranga. Ni icyubahiro nk’Abanyafurika kwihitiramo ahazaza dushaka.”

Perezida wa Repubulika y’u Rwanda Paul Kagame, yabigarutseho kuri uyu wa Mbere taliki ya 24 Ukwakira 2022, mu Nama y’Ihuriro ry’Abagiraneza bakorera ku mugabane w’Afurika (African Philanthropy Forum/APF 2022) iteraniye i Kigali kugeza ejo ku wa Kabiri.

APF ni umuryango ukomeye w’abafatanyabikorwa b’abagiraneza bagamije kwimakaza uburumbuke busangiwe bw’umugabane w’Afurika binyuze mu bikorwa by’ubugiraneza, ishoramari no kubera abandi urumuri.

Inama y’ihuriro ry’uyu mwaka iribanda ku nsanganyamatsiko igira iti: “Abagiraneza b’Afurika mu kuziba Icyuho cy’Ubusumbane bw’Abagabo n’Abagore”, hagamijwe kwimakaza uburinganire bw’abagore n’abagabo no kongera umubare w’abagore mu myanya y’ubuyobozi mu nzego zitandukanye muri Afurika.

Byitezwe ko iyo nama ihuza abafatanyabikorwa mu muryango mugari w’abagiraneza b’Afurika hagamijwe kurushaho kwagura imikoranire itanga umusaruro wagutse by’umwihariko mu bijyanye n’uburinganire no kongerera ubushobozi abagore.

Inama iteraniye i Kigali yitezwe kubaka imfatiro z’ibikorwa bihuriweho bifasha abagizweho ingaruka n’ihohoterwa rishingiye ku gitsina, ubucuruzi, sosiyete sivile ndetse n’ibihugu.

Perezida Kagame yavuze ko hakiri byinshi byo gukora buri wese agahindura imyumvire ku buringanire kugira ngo bubashe gushinga imizi uko bikwiye.

Yongeyeho ko abagabo bagomba gufata iya mbere ariko n’abagore bagashira amanga, bagatinyuka kwanga no kwamagana imikorere n’indi migirire yose ibaheza inyuma.

Perezida Kagame yasabye by’umwihariko abagore bari mu myanya y’ubuyobozi n’imirimo itandukanye kudapfusha ubusa amahirwe bafite ahubwo bagaharanira kuba indashyikirwa n’intangarugero ndetse bagakoresha ayo mahirwe mu guteza imbere bagenzi babo.

Umuyobozi w’inama y’ubutegetsi y’ihuriro African Philanthropy Forum Madamu Tsitsi Masiyiwa avuga ko ubushakashatsi bwerekanye ko kugira ngo Afurika igere ku buringanire bwuzuye hagati y’abagabo n’abagore bisaba indi myaka 140 ukurikije umuvuduko uyu mugabane ugenderaho mu kuziba icyo cyuho.

Ni mu gihe kandi kuziba icyo cyuho mu rwego rw’ubukungu bisaba ko umusaruro mbumbe w’Afurika wiyongeraho miliyari zisaga 360 z’amadorali y’Amerika.

Muri iyi nama y’iminsi 2 ibera i Kigali, biteganyijwe kandi ko hanatangizwa gahunda y’iterambere ry’uburinganire harimo n’ikigega cyiswe “Africa Gender Fund” cyo guteza imbere abagore mu nzego zitandukanye.

Madamu Jeannette Kagame na we ari mu bitabiriye iyo nama, bikaba bivugwa ko u Rwanda rwatoranyijwe nk’igihugu kiyakira kuko ari intangarugero ku Isi mu kwimakaza uburinganire bw’abagore n’abakobwa, ndetse umugore akaba yarahawe ijambo mu myanya y’ubuyobozi.

  • NTAWITONDA JEAN CLAUDE
  • Ukwakira 24, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE