Ngororero: ‘Kubera iki kandi mpari’ igisubizo ku kwigira kw’Abanyarwanda

  • NYIRANEZA JUDITH
  • Mutarama 31, 2024
  • Hashize ibyumweru 3
Image

Gahunda ya ‘Kubera iki kandi mpari’ yatangirijwe mu rwunge rw’Amashuri rwa Hindiro, kuri uyu wa Gatatu tariki ya 31 Mutarama 2024, mu Karere ka Ngororero ni umuyoboro ugamije ko abifite batirebaho gusa, ahubwo bita ku batishoboye bakabaremera bikabafasha kwigira.

Ubutumwa bwatanzwe n’umuyobozi w’ikigo Nyiranduhura Esperance bwibanze ku gufashanya, buri Munyarwanda akigira.

Yagize ati: “Abarezi n’Abanyeshuri tuzirikane ko Abanyarwanda twahisemo kuba umwe nk’uko duhora tubyibutswa na Nyakubahwa Perezida Paul Kagame. Bityo tugomba gufashanya ku buryo nta n’umwe ukwiye kugira icyo abura kandi twe tugifite, tugomba gufashanya kugira ngo twese dushobore guterera imbere icyarimwe.”

Ni gahunda yatangijwe n’Ubuyobozi bw’Umurenge wa Hindiro, igamije kurushaho gushyigikira ubumwe bw’Abanyarwanda aho ugize icyo abura abaturanyi be bishyira hamwe bakakimushakira bakakimuha ntiyifuze kandi bo bakwishyira hamwe bakakimushakira akakibona.

Abanyeshuri bo mu miryango itishoboye borojwe na bagenzi babo biyemeje gufata neza ayo matumgo

Ni gahunda yibanda ku gufasha abana b’imfubyi birera, abageze mu zabukuru batagira ubitaho, kugarura abana mu ishuri, gufasha abafite ibibazo by’ubuzima bibagoye (abamaranye uburwayi igihe kirekire, abafite ubumuga bwo mu mutwe,…), kurandura ibibazo bibangamiye imibereho myiza y’Abaturage (Human security issues).

Ni muri urwo rwego muri iri shuri rya GS Hindiro, abanyeshuri bava mu miryango itishoboye ubwo hatangizwaga iyo gahunda muri iki kigo bikozwe n’Abanyeshuri bagenzi babo, abarezi ndetse n’umuyobozi w’ishuri bavuga ko bateye ikirenge mu cya Perezida Kagame waremeye Abanyarwanda batishoboye binyuze muri gahunda zitandukanye, ariko cyane cyane  gahunda ya Girinka Munyarwanda.

Mu gufasha bagenzi babo bo mu miryango itishoboye babahaye inkoko 29, inkwavu 5, imyenda y’ishuri mishya ku batayigira 9, abanyeshuri 4 bahawe ibishyimbo kilogarama 100.

Abanyeshuri 5 bahawe amakaye 30, abanyeshuri batanu baguriwe inkweto zo kwigana, abanyeshuri 5 bishyuriwe umusanzu basabwaga wo kunganira gahunda yo kurira ku ishuri (School feeding).

Hanatangijwe kandi Club “Kubera Iki Kandi Mpari” izakurikirana imikorere y’iyi gahunda.

Ni umuhango witabiriwe n’abayobozi bo mu nzego zitandukanye, abihaye Imana, ababyeyi b’abana bafashijwe.  Abo bana bashyikirijwe amatungo n’ibindi ni abatishoboye batoranyijwe na bagenzi babo.

Padiri Fidèle Karasira ushinzwe urubyiruko muri Paroisse Catholique ya Muramba, ikaba ari nayo nyiri iki kigo ifatanyije na Leta ku bw’amasezerano.

Padiri Karasira na we yashimiye abanyeshuri, abarezi ndetse n’Ubuyobozi bw’ishuri ko buri Gushyira mubikorwa iyi Gahunda y’umurenge nkuko bari babisabwe ubwo iyi Gahunda yatangizwaga mu Murenge ku wa 09 Mutarama 2024.

Yibibukije ko ibi bikorwa byo gufasha ari ikimenyetso cy’ubukirisito nyabwo kuko kigaragaza urukundo rukomeye kandi Imana ubwayo yivugiye ko ari urukundo.

 Yabasabye gukomeza gukundana no kugira umutima wita ku batishoboye, imfubyi n’Abapfakazi kuko uwiteka azabibahembera.

Umwe mu banyeshuri borojwe ashima kuba bagenzi babo baritanze bakabaremera, agahamya ko azafata neza amatungo yorojwe akazamufasha gutera imbere.

  • NYIRANEZA JUDITH
  • Mutarama 31, 2024
  • Hashize ibyumweru 3
TANGA IGITEKEREZO
clarisseu61@gmail.com says:
Gashyantare 1, 2024 at 6:39 pm

Iyi gahunda ni nziza cyane.nabandi bakabaye bafatiraho urugero.

Andika igitekerezo

AMATEGEKO AGENGA IYANDIKA RY'IGITEKEREZO CYAWE