Ngororero: Amarerero yo mu cyayi, igisubizo ku kibazo cy’imirire mibi

  • NTAWITONDA JEAN CLAUDE
  • Ugushyingo 21, 2022
  • Hashize umwaka 1
Image

Abakora mu marerero yubatse mu cyayi cy’Uruganda rw’Icyayi cya Rubaya mu Karere ka Ngororero, bahamya ko yafashije abana kugira ubuzima bwiza, bigakemura ikibazo cy’imirire mibi n’igwingira.

Si ku bana gusa kuko ababyeyi babo bakora akazi ko gusoroma icyayi bakora batuje, bizeye umutekano w’abana babo kuko baba bari mu marerero bakitabwaho mu rwego rw’ubuzima, bagahabwa amafunguro aboneye abarinda kugira ikibazo cy’imirire mibi n’igwingira, ndetse bagahabwa ubumenyi bw’ibanze bubategurira kwiga neza icyiciro gikurikiraho mu mashuri abanza.

Niyonizeye Emelance, umwe mu barezi b’abo bana yavuze nta cyo bajya babura mu kwita ku buzima bw’abo bana, ari mu ishuri, ari mu byo bahabwa byo kubafasha mu buzima bw’imirire.

Yagize ati: “Nta kintu tujya tubura, igikoma tukibonera ku gihe, amata tuyabonera igihe buri kimwe cyose nta mbogamizi dufite”.

Abajijwe niba iryo rereo Atari rito yavuze ko amarerero hateganywa ko azagurwa, kuko ataraba mato, kuko biterwa n’ibihe ababyeyi baje mu kazi, kuko abana hari igihe baza ari 30, ubundi 20.

Abana bahabwa indyo yuzuye bigafasha mu guhangana n’imirire mibi n’igwingira mu bana (Foto Nyiraneza J.)

Umwe mu babyeyi bakora muri urwo ruganda yavuze ko amarerero yubatse mu ruganda yabafashije gukora batuje kuko baba bizeye ko abana babo nta kibazo bafite.

Yagize ati: “Hano ku ruganda dukora dutuje kubera ko abana bacu baba bari mu irerero. Iyo tuje mu kazi tuzana abana hano mu irerero, ibyo bikabafasha kugira ubuzima bwiza.

Umuyobozi w’uruganda rw’icyayi rwa Rubaya, Havugimana Mutabazi Jean yatangarije Imvaho Nshya ko hari amarerero afasha abana guca ukubiri n’ikibazo cy’imirire mibi.

Ati: “Hano dufite amarerero atuma dushobora kuba twafasha abana b’abakozi bacu kumererwa neza. Mu by’ukuri hari abagiye baza ubona bari mu ibara ry’umuhondo cyangwa iry’umutuku, ariko nyuma yo gufatwa neza urabona ko bavuye muri icyo cyiciro ubu bakaba bageze mu cyatsi kibisi.  

Si byo byonyine kuko n’ababyeyi babo ntibashoboraga gutanga umusaruro ukwiye, ariko kuva babona aho bashobora gusiga abana babo ntibanyagirwe, ntibakubitwe n’izuba ubungubu abana bameze neza, ababyeyi baratanga umusaruro ukwiye. […] Umubyeyi wasoromaga ibilo 30 by’icyayi kubera kubikorana n’umwana, ubu asigaye asoroma yikubye kabiri akaba yanageza no kuri Kilogarama 70 ku munsi”.

Yakomoje ku mubare w’amarerero, avuga ko azakomeza kongerwa hirya no hino.

Ati: “Hano muri Ngororero hari ikibazo cyo kwagura, ntituzongera iri rerero ahubwo tuzongera amarerero hirya no hino atuma abana bisanzura. Iyi ni gahunda y’Igihugu natwe dushyira mu bikorwa izi gahunda dufatanyije n’Inzego z’ibanze tubona ifasha, ni gahunda kandi ifasha mu mibereho y’abana haba mu mibereho y’abana bacu mu buzima, kandi tugerageza kubigisha ku buryo bazava mu  cyiciro kimwe bajya mu kindi, barateguwe. Bakura mu gikuriro no mu mitekerereze, kuko iyo ufashe umwana neza akura neza akazavamo n’umuntu muzima”. 

Yongeyeho ko uko bagenda bongera amarerero n’abana bazarushaho kuba benshi.  Ati: “Ubu dufite ubushobozi bwo kwakira abana 50, ariko twavuga ko turi hafi kongeraho abandi 25 kuko tugiye kubaka […..], turanitegura kubaka ishuri ribanza, ibyo byose ni inyungu y’umwana kuko tuzakomeza kumwitaho”.

Ubuyobozi bw’Akarere ka Ngororero butangaza ko mu kwita ku buzima,  mu rwego rwo guhashya imirire mibi n’igwingira mu bana hamaze kubakwa amarerero agezweho 10, amarerero 20 y’ibanze n’amarerero ashingiye ku ngo 1113, yakira abana barenga 23,000 bitabwaho n’ababarera barenga 1,100.

  • NTAWITONDA JEAN CLAUDE
  • Ugushyingo 21, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE